“ലവൊദിക്ക്യയിലെ സഭയുടെ ദൂതന്നു എഴുതുക: വിശ്വസ്തനും സത്യവാനുമായ സാക്ഷിയായി ദൈവസൃഷ്ടിയുടെ ആരംഭമായ ആമേൻ എന്നുള്ളവൻ അരുളിച്ചെയുന്നതു:” (വെളിപ്പാട് 3:14)

☛ വെളിപ്പാട് പുസ്തകത്തിൽ, സൂര്യതേജസ്സോടെ യോഹന്നാൻ ദർശിച്ച മനുഷ്യപുത്രനോട് സദൃശനായവൻ “ദൈവസൃഷ്ടിയുടെ ആരംഭം” (The beginning of the creation of God) എന്ന് തന്നെത്തന്നെ വിശേഷിപ്പിച്ചിരിക്കയാൽ, അവൻ ദൈവത്തിൻ്റെ ആദ്യത്തെ സൃഷ്ടിയാണെന്ന് ചിലർ വിചാരിക്കുന്നു. ➟രണ്ട് കാര്യങ്ങൾ ആദ്യമേ പറയാം: ഒന്നാമത്, വെളിപ്പാടിലെ “മനുഷ്യപുത്രനോട് സദൃശ്യനായവൻ” (One like unto the Son of man) യേശു ആണെന്ന് വചനം പറയുന്നില്ല. രണ്ടാമത്, ഇനിയത് യേശു ആണെന്ന് വാദിച്ചാലും “ദൈവസൃഷ്ടിയുടെ ആരംഭം” (The beginning of the creation of God) എന്ന പ്രയോഗത്തിന് “ദൈവത്തിൻ്റെ ആദ്യത്തെ സൃഷ്ടി” എന്ന് വ്യാകരണപരമായും വചനപരമായും അർത്ഥവുമില്ല. പിന്നെങ്ങനെ യേശു ദൈവത്തിൻ്റെ ആദ്യത്തെ സൃഷ്ടിയാണെന്ന് പറയാൻ കഴിയും?

☛ വചനത്തെ സ്വയമായിട്ടല്ല; വചനംകൊണ്ടാണ് വ്യാഖ്യാനിക്കേണ്ടത്. ദൈവവചനത്തോടൊപ്പം മാനുഷിക വ്യാഖ്യാനങ്ങളും തിരുകിക്കയറ്റിയതിൻ്റെ പരിണിത ഫലമായിട്ടാണ്, ഏകസത്യദൈവം ത്രിത്വമായതും, ചലർക്ക് യേശു ഏകദൈവവും, വേറെ ചിലർക്ക് അവൻ ദൈവത്തിൻ്റെ ആദ്യത്തെ സൃഷ്ടിയായതും, ഒരേ ബൈബിൾ വിശ്വസിക്കുന്ന അമ്പതിനായിത്തോളം വ്യത്യസ്ത വിഭാഗങ്ങൾ (Denominations) ഉടലെടുത്തതും. എന്നിട്ടും വ്യാഖ്യാനങ്ങൾ അനർഗളനിർഗളം തുടർന്നുകൊണ്ടിരിക്കയാണ്.

☛ ആരംഭം:
➦ “Beginning” എന്നർത്ഥമുള്ള “ആർഖെ” (Archē) എന്ന ഗ്രീക്കുപദം അറുപതോളം പ്രാവശ്യമുണ്ട്. ആദി, ആരംഭം, തുടക്കം, മൂലം, മൂലകാരണം, മൂലാധാരം എന്നൊക്കെ പദത്തിന് അർത്ഥമുണ്ട്. സത്യവേദപുസ്തകത്തിൽ ആദി (മത്താ, 19:4; 19:18), ആരംഭം (24:8; 24:29), അധികാരം (ലൂക്കൊ, 12:12; 20:20), കോണ് (പ്രവൃ, 10:11) പൂർവ്വകാലം (എബ്രാ, 1:10), ആദ്യം (എബ്രാ, 3:14; 5:12), അല്ഫ (വെളി, 1:8; 21:6) എന്നിങ്ങനെയാണ് പരിഭാഷ ചെയ്തിരിക്കുന്നത്.

☛ സൃഷ്ടിയുടെ ആരംഭം: 
➦ “ലവൊദിക്ക്യയിലെ സഭയുടെ ദൂതന്നു എഴുതുക: വിശ്വസ്തനും സത്യവാനുമായ സാക്ഷിയായി ദൈവസൃഷ്ടിയുടെ ആരംഭമായ ആമേൻ എന്നുള്ളവൻ അരുളിച്ചെയുന്നതു:” (വെളി, 3:14). ഈ വേദഭാഗത്ത്, “hē archē tēs ktiseōs tou Theou” എന്ന പ്രയോഗത്തിൻ്റെ “hē archē” എന്ന ആദ്യഭാഗം നിർദ്ദേശിക വിഭക്തിയിലുള്ള ഏകവചനം (Nominative Case Singular) ആണ്. അതിനെയാണ് സത്യവേദപുസ്തകത്തിൽ “ആരംഭം” (the beginning) എന്ന് പരിഭാഷ ചെയ്തിരിക്കുന്നത്. എന്നാൽ മലയാളം പരിഭാഷയിൽ ഒരു പ്രശ്നമുണ്ട്; അത് താഴെ മനസ്സിലാകും. അടുത്തഭാഗമായ ❛tēs ktiseōs tou Theou❜ എന്നത് സംബന്ധിക വിഭക്തിയിലുള്ള ഏകവചനം (Genitive Case Singular) ആണ്. “ദൈവത്തിൻ്റെ സൃഷ്ടിയുടെ” (of the creation of God) എന്നാണർത്ഥം. “ദൈവത്തിൻ്റെ സൃഷ്ടിയുടെ ആർഖെ” എന്ന് ഏകവചനത്തിൽ പറഞ്ഞാൽ, ഭാഷാപരമായി ആദ്യത്തെ സൃഷ്ടി എന്ന് അർത്ഥം വരുന്നില്ല. “സൃഷ്ടി” എന്ന പദം ബഹുവചനം ആയാലാണ് “ആർഖെ” (Beginning) എന്ന പദത്തിന് ഒന്നാമത്തേത് (ആദ്യത്തേത്) എന്ന് അർത്ഥം വരുന്നത്. അല്ലെങ്കിൽ, സൃഷ്ടിക്ക് കാരണം (ഹേതു) എന്നാണ് അർത്ഥം വരുന്നത്. അഥായത്, അവിടെ “ദൈവത്തിൻ്റെ സൃഷ്ടികളുടെ” (of the creations of God) എന്ന ബഹുവചനം ആയിരുന്നെങ്കിൽ, സൃഷ്ടികളിൽ ഒന്നാമത്തെ (ആദ്യത്തെ) സൃഷ്ടി എന്ന് അർത്ഥം വരുമായിരുന്നു. “ദൈവസൃഷ്ടിയിൽ ആദ്യത്തവൻ” അല്ലെങ്കിൽ, “ഒന്നാമത്തവൻ” എന്ന് ഏകവചനത്തിൽ പറഞ്ഞാൽ, ആ പ്രയോഗംതന്നെ പരമ അബദ്ധമാണ്. തന്മൂലം, പ്രസ്തുത വേദഭാഗത്തെ “ആർഖെ” (Beginning) എന്ന പദത്തിന്, ആരംഭം എന്നല്ല അർത്ഥം; “കാരണം, ഹേതു” എന്നൊക്കെയാണ് അർത്ഥമെന്ന് മനസ്സിലാക്കാം.

☛വചനത്തെളിവുകൾ:
➦ “യേശു ഇതിനെ അടയാളങ്ങളുടെ ആരംഭമായി ഗലീലയിലെ കാനാവിൽവെച്ച് ചെയ്ത് തന്റെ മഹത്വം വെളിപ്പെടുത്തി.” (യോഹ, 2:11). ഈ വേദഭാഗത്തെ “അടയാളങ്ങൾ” എന്ന ബഹുവചനം ശ്രദ്ധിക്കുക. ഇവിടെ, “അടയാളങ്ങളുടെ” (of miracles) എന്നർത്ഥമുള്ള “sēmeion” എന്ന നാമപദം സംബന്ധിക വിഭക്തിയിലുള്ള ബഹുവചനം (Genitive Case Plural) ആയതുകൊണ്ടാണ്, “ആർഖേൻ” (archēn) എന്ന പ്രതിഗ്രാഹിക വിഭക്തിയിലുള്ള (Accusative Case) പദത്തിന് “ആരംഭം” (ആദ്യത്തെ/ഒന്നാമത്തെ) എന്ന് അർത്ഥം വന്നത്. യേശു ചെയ്ത അനേക അടയാളങ്ങളിൽ ആദ്യത്തേതാണ് കാനാവിലെ കല്യാണവിരുന്നിൽ വെള്ളം വീഞ്ഞാക്കിയ അത്ഭുതം. യേശു ഒരു അടയാളം മാത്രമാണ് ചെയ്തിരുന്നതെങ്കിൽ, അതിനെ ആരംഭം (ആദ്യത്തെ) എന്ന് എങ്ങനെ പറയും? അവൻ അനേകം അടയാളങ്ങൾ ചെയ്തതുകൊണ്ടാണ്, അതിൽ ആദ്യത്തെ അടയാളത്തെ “അടയാളങ്ങളുടെ ആരംഭം” എന്ന് യോഹന്നാൻ പിൽക്കാലത്ത് എഴുതുന്നത്. “അടയാളങ്ങൾ” എന്ന നാമപദം (Noun) ബഹുവചനമായപോലെ, വെളിപ്പാടിൽ “സൃഷ്ടികൾ” അഥവാ, “ദൈവത്തിൻ്റെ സൃഷ്ടികളുടെ ആർഖെ” എന്ന ബഹുവചന ആയിരുന്നെങ്കിൽ, മനുഷ്യപുത്രനോട് സദൃശൻ സൃഷ്ടികളിൽ ഒന്നാമനാണ് അല്ലെങ്കിൽ, ദൈവത്തിൻ്റെ ആദ്യത്തെ സൃഷ്ടിയാണെന്ന് അർത്ഥം വരുമായിരുന്നു. എന്നാൽ അവിടെ “ദൈവത്തിൻ്റെ സൃഷ്ടിയുടെ ആർഖെ” എന്ന ഏകവചനമാണ് ഉപയോഗിച്ചിരിക്കുന്നത്. അതിനാൽ, അവൻ “ദൈവസൃഷ്ടിയുടെ കാരണക്കാരൻ” അല്ലെങ്കിൽ, “സൃഷ്ടിക്ക് ഹേതുവായവൻ” എന്നാണ് ശരിയായ അർത്ഥം.

☛ഏകവചനത്തിൻ്റെ തെളിവ്: 
➦ “യഹോവാഭക്തി ജ്ഞാനത്തിന്റെ ആരംഭമാകുന്നു. അവയെ ആചരിക്കുന്ന എല്ലാവർക്കും നല്ല ബുദ്ധി ഉണ്ടു; അവന്റെ സ്തുതി എന്നേക്കും നിലനില്ക്കുന്നു.” (സങ്കീ, 111:11 – സദൃ, 1:7; 9:10). ക്രിസ്തുവും അപ്പൊസ്തലന്മാരും ആദിമസഭയും ഉപയോഗിച്ചിരുന്നതും പുതിയനിയമത്തിലേക്ക് ഉദ്ധരണികൾ എടുത്തിരിക്കുന്നതുമായ LXX-ൽ പ്രസ്തുത വാക്യങ്ങളിൽ “ആരംഭം” (Beginning) എന്നർത്ഥമുള്ള “ആർഖെ” (Archē) എന്ന പദമാണാ. ഇവിടെ, യഹോവാഭക്തി ജ്ഞാനത്തിൽ ഒന്നാമത്തേത് എന്നോ, ആദ്യത്തേത് എന്നോ അല്ല അർത്ഥമാക്കുന്നത്; ഭക്തൻ്റെ ജ്ഞാനത്തിനു “കാരണം” (ഹേതു) യഹോവയോടുള്ള ഭക്തിയാണ് എന്നാണർത്ഥം.

☛മറ്റൊരു വ്യക്തമായ തെളിവ്:
➦ “സൃഷ്ടിയുടെ ആരംഭത്തിങ്കലോ ദൈവം അവരെ ആണും പെണ്ണുമായി ഉണ്ടാക്കി.” (മർക്കൊ, 10:6). ഇവിടെയും “സൃഷ്ടി” എന്ന അർത്ഥത്തിൽ ഉപയോഗിച്ചിരിക്കുന്നത്, “ക്തീസെയോസ്” (ktíseos) എന്ന ഏകവചനമാണ്. സൃഷ്ടികളിൽ ആദ്യമായി മനുഷ്യനെയല്ല സൃഷ്ടിച്ചത്. എല്ലാ സൃഷ്ടികൾക്കും അവസാനമാണ് മനുഷ്യനെ സൃഷ്ടിച്ചത്. പ്രത്യുത, “സൃഷ്ടികളുടെ ആരംഭത്തിൽ” അവരെ ആണും പെണ്ണുമായി ഉണ്ടാക്കി, എന്ന് ബഹുവചനത്തിൽ പറഞ്ഞിരുന്നെങ്കിൽ, ആദാമിനെയും ഹവ്വയെയുമാണ് ദൈവം ആദ്യം സൃഷ്ടിച്ചതെന്ന് അർത്ഥം വരും. എന്നാൽ അത് വാസ്തവം അല്ലാത്തതിനാലാണ്, “സൃഷ്ടിയുടെ ആരംഭത്തിൽ“ എന്ന ഏകവചനം പറഞ്ഞിരിക്കുന്നത്. ഇവിടെയും “സൃഷ്ടിയുടെ ആരംഭം” (The beginning of the creation) എന്നർത്ഥത്തിൽ “archēs ktiseōs” എന്ന വെളിപ്പാടിലെ അതേ പ്രയോഗമാണ് ഇവിടെയും ഉള്ളത്. അതുകൊണ്ട്, ദൈവത്തിൻ്റെ ആദ്യത്തെ സൃഷ്ടി ആദവും ഹവ്വായും ആണെന്ന് ആരെങ്കിലും പറയുമോ? സ്വർഗ്ഗീയ സൈന്യത്തെയും ആകാശഭൂമികളെയും ഭൂമിയിലെ മറ്റ് ജീവജാലങ്ങളെയും സൃഷ്ടിച്ചശേഷമാണ് മനുഷ്യരെ സൃഷ്ടിച്ചത്. മനുഷ്യൻ സൃഷ്ടിയുടെ മകുടം ആയതുകൊണ്ടാണ്, അവനെ ആരംഭത്തിൽ സൃഷ്ടിച്ചു എന്ന് പറയുന്നത്: (ഉല്പ, 1:28-30). അല്ലാതെ, അവനെ ആദ്യം സൃഷ്ടിച്ചതുകൊണ്ടല്ല. ഭാഷയ്ക്ക് ഒരു വ്യാകരണവും അത് ഉപയോഗിക്കാൻ ഒരു നിയമവുമുണ്ട്. അല്ലാതെ, വല്ലവിധേനയും ഉപദേശം ഉണ്ടാക്കുമ്പോഴാണ് ദുരുപദേശമാകുന്നത്.

☛ ബഹുവചനത്തിൻ്റെ തെളിവ്:
➦ ബഹുവചനത്തിൽ പറഞ്ഞിരിക്കുന്നതിൻ്റെ തെളിവും ബൈബിളിലുണ്ട്: “നാം അവന്റെ സൃഷ്ടികളിൽ ഒരുവിധം ആദ്യഫലമാകേണ്ടതിനു അവൻ തന്റെ ഇഷ്ടം ഹേതുവായി സത്യത്തിന്റെ വചനത്താൽ നമ്മെ ജനിപ്പിച്ചിരിക്കുന്നു.” (യാക്കോ, 1:18). ഇവിടെ, ബഹുവചനത്തെ കുറിക്കുന്ന ഗ്രീക്കുപദം “ക്തീസ്മാതോൻ” (ktismáton) എന്ന സംബന്ധിക വിഭക്തിയിലുള്ള ബഹുവചനം (Genitive Case Plural) ആണ്. ഈ വേദഭാഗത്ത് “സൃഷ്ടികൾ” (Creatures) എന്ന ബഹുവചനം ശ്രദ്ധിക്കുക. വീണ്ടുംജനിച്ചവർ സൃഷ്ടിക്ക് കാരണമല്ല; സൃഷ്ടികളിൽ ആദ്യഫലം (firstfruits) അല്ലെങ്കിൽ, എല്ലാ സൃഷ്പ്രടികളിലുംവെച്ച് പ്രഥമസ്ഥാനം നല്കാൻ വേണ്ടിയാണ് ദൈവം നമ്മെ അവൻ്റെ വചനത്താൽ വീണ്ടും ജനിപ്പിച്ചിരിക്കുന്നത്. തന്മൂലം, “ദൈവസൃഷ്ടിയുടെ ആർഖെ” എന്ന് പറഞ്ഞാൽ, ദൈവസൃഷ്ടിക്ക് കാരണം/ഹേതു എന്നാണ് ആ പ്രയോഗത്തിൻ്റെ ശരിയായ അർത്ഥമെന്ന് അസന്ദിഗ്ധമായി മനസ്സിലാക്കാം.

☛ യേശു ആരാണ്; അല്ലെങ്കിൽ അവൻ്റെ അസ്തിത്വം (Existence) എന്താണ്? എന്ന് പലർക്കും അറിയില്ല. അതുകൊണ്ടാണ്, അവൻ ദൈവമാണെന്ന് ചിലരും, ആദ്യത്തെ സൃഷ്ടിയാണെന്ന് മറ്റുചിലരും, വെറും മനുഷ്യരാണെന്ന് വേറെ ചിലരും വിചാരിക്കുന്നത്. [കാണുക: ക്രിസ്തുവിനെ അറിയുക]