യേശുവിൻ്റെ ഇരുപ്രകൃതിവാദം വാസ്തവമോ?

യേശുവിൻ്റെ ഇരുപ്രകൃതിവാദം സത്യമോ? ദൈവപുത്രനായ യേശുക്രിസ്തു സമ്പൂർണ്ണദൈവവും സമ്പൂർണ്ണമനുഷ്യനുമെന്ന ഇരുപ്രകൃതി ഉള്ളവനാണെന്ന് ട്രിനിറ്റിയുടെ ദൈവശാസ്ത്രം പഠിപ്പിക്കുന്നു. “സമ്പൂർണ്ണ ദൈവമായിരിക്കുന്നതിനോടൊപ്പം ക്രിസ്തു സമ്പൂണ്ണ മനുഷ്യനുമാണ്.” [Systematic Theology, Page, 229]. ട്രിനിറ്റി മാത്രമല്ല; വൺനെസ്സുകാരും അങ്ങനെ വിശ്വസിക്കുന്നവരാണ്. “സമ്പൂർണ്ണദൈവം, പൂർണ്ണദൈവം” എന്നീ പ്രയോഗങ്ങൾതന്നെ കൾട്ടാണ്. അപുർണ്ണതയുടെ പൂർണ്ണതയെയല്ല; സൽഗുണപൂർണ്ണൻ ആയവനെയാണ് ബൈബിൾ ദൈവം എന്ന് വിശേഷിപ്പിക്കുന്നത്. (മത്താ, 5:48). ദൈവശാസ്ത്രത്തിലല്ലാതെ, സമ്പൂർണ്ണദൈവം എന്ന പ്രയോഗം വചനത്തിൽ ഒരിടത്തും കാണാൻ കഴിയില്ല. ദൂതന്മാർക്കുപോലും വംശാവലിയോ, ജനനമോ, മരണമോ ഇല്ലാതിരിക്കെ; ക്രൂശിൽമരിച്ച ദൈവപുത്രൻ നിത്യനായ ദൈവമാണെന്നും ട്രിനിറ്റിയുടെ ദൈവശാസ്ത്രം പറയുന്നു: [പേജ് 228]. സത്യദൈവത്തിന് വംശാവലിയോ, ജനനമോ, മരണമോ ഇല്ലെന്നത് ബൈബിളിൻ്റെ ബാലപാഠമാണ്: (സങ്കീ, 90:2; 1തിമൊ, 6:16). പരിശുദ്ധാത്മാവ് മറിയത്തിൻ്റെ ഉദരത്തിൽ ഉല്പാദിപ്പിച്ചത് ഒരു ദൈവത്തെയോ, ദൈവവും മനുഷ്യനുമെന്ന ഇരുപ്രകൃതിയുള്ളവനെയോ ആണെന്ന് കരുതുന്നവരുടെ ദൈവസങ്കല്പം എന്താണാവോ!

☛ ഇരുപ്രകൃതിയെന്ന ഉപദശത്തിൻ്റെ ഉത്ഭവം
➟ യേശുവിൻ്റെ ഇരുപ്രകൃതിയെന്ന ഉപദേശം AD 451-ലെ കൽക്കദോൻ സൂനഹദോസിൽ (Council of Chalcedon) ഉണ്ടാക്കിയതാണ്. യേശുവെന്ന ഒരു വ്യക്തിയിൽ “ഇരുപ്രകൃതി” (Two Nature) ഉണ്ടെന്ന സിദ്ധാന്തത്തെയാണ് “ഹൈപ്പോസ്റ്റാറ്റിക് യൂണിയൻ” (Hypostatic Union) എന്ന് പറയുന്നത്. “വ്യക്തി” (Person) എന്നാൽ “മനുഷ്യൻ, ആൾ, ഒരാൾ” എന്നൊക്കെയാണർത്ഥം. ഒരു വ്യക്തിയിൽ ഇരുപ്രകൃതി എങ്ങനെയുണ്ടാകുമെന്ന് ആരും ചോദിക്കരുത്. യേശു എന്ന് പേരുള്ള ദേഹവും (1പത്രൊ, 2:24), ദേഹിയും (മത്താ, 26:38), ആത്മാവുമുള്ള (ലൂക്കൊ, 23:46) മനുഷ്യനിൽ (യോഹ, 9:11) ദൈവം എന്ന മറ്റൊരു പ്രകൃതി ഉള്ളകാര്യം ഏകദൈവത്തിനോ, ഏകമനുഷ്യനായ യേശുക്രിസ്തുവിനോ, അപ്പൊസ്തലന്മാർക്കോ അറിയില്ല. അറിഞ്ഞിരുന്നുവെങ്കിൽ, വചനത്തിൽ ഉണ്ടാകുമായിരുന്നു. അതിനാൽ, ബൈബിളിലോ, ലോകപുസ്തകങ്ങളിലോ അങ്ങനെയൊന്ന് ആരു അന്വേഷിക്കരുത്. ⟦അർദ്ധനാരീശ്വരൻ എന്നൊരു സങ്കല്പം ഹൈന്ദവരുടെ ഇടയിലുണ്ട്. ഇത് അതുക്കും മേലെയാണ്⟧. ഈ പദംപോലും ദൈവശാസ്ത്രത്തിലല്ലാതെ, ലോകഭാഷകളിലെ ഒരു നിഘണ്ടുവിലും തിരയരുത്; കണ്ടെത്താൻ കഴിയില്ല. സഭ സ്ഥാപിതമായതിനും 418 വർഷത്തിനും ബൈബിൾ എഴുതി പൂർത്തീകരിച്ചതിനും 355 വർഷത്തിനും ശേഷവും ഉണ്ടാക്കപ്പെട്ട ഉപദേശമാണ് യേശുവിൻ്റെ ഇരുപ്രകൃതി. 

☛ ത്രിത്വോപദേശത്തിൻ്റെ കാലക്രമം
➟ ട്രിനിറ്റിയുടെ ഉപദേശങ്ങളൊക്കെ ഉണ്ടാക്കിയ കാലക്രമം ഇപ്രകാരമാണ്: AD 325-ലെ നിഖ്യാ സുനഹദോസ് (Council of Nicaea) ദൈവത്തിൻ്റെ മനുഷ്യപ്രത്യക്ഷതയായ ക്രിസ്തുവിനെ, “സത്യദൈവത്തിൽനിന്നു ജനിച്ച മറ്റൊരു സത്യദൈവം” ആക്കി. AD 362-ൽ ഈജിപ്തിലെ അലക്സാണ്ട്രിയ സുനഹദോസിൽവെച്ച് (Synod of Alexandria) “ഒരു സത്തയിൽ/സാരാംശത്തിൽ മൂന്നു വ്യക്തികൾ” (Three persons in one substance) എന്ന ഉപദേശം ഉണ്ടാക്കി. അഥവാ, ഏകസത്യദൈവത്തെ മൂന്ന് വ്യക്തി അഥവാ, മനുഷ്യരാക്കി. ⟦വ്യക്തി (Peson) എന്ന പദം ദൈവത്തെ കുറിക്കുന്നതല്ല; മനുഷ്യരെ കുറിക്കുന്നതാണ്. ദൈവം വ്യക്തിയാണെന്നോ, ദൈവത്തിൽ വ്യക്തികളുണ്ടെന്നോ വചനം പറയുന്നില്ല⟧. AD 381-ലെ കോൺസ്റ്റാൻ്റിനോപ്പിൾ സുനഹദോസ് (Council of Constantinople) ദൈവത്തിൻ്റെ ആത്മാവായ പരിശുദ്ധാത്മാവിനെ “ദൈവത്തിൽനിന്ന് വിഭിന്നനായ വ്യക്തിയും ദൈവവും” ആക്കി. AD 431-ലെ എഫെസൊസ് സുനഹദോസ് (Council of Ephesus) യേശുവെന്ന പാപരഹിതനായ മനുഷ്യൻ്റെ അമ്മയായ മറിയത്തെ “ദൈവമാതാവു” (Theotokos) ആക്കി. AD 451-ലെ കൽക്കദോൻ സൂനഹദോസിൽ (Council of Chalcedon) യേശു എന്ന് പേരുള്ള  പാപരഹിതായ മനുഷ്യനെ (യോഹ, 9:11; 1യോഹ, 3:5) ദൈവവും മനുഷ്യനുമെന്ന “ഇരുപ്രകൃതിയുള്ളവൻ” (Two Nature) ആക്കി. AD 1431-1445-ലെ ഫ്ലോറൻസ് സുനഹദോസിൽ (Council of Florence) “പരിശുദ്ധാത്മാവിനെ പിതാവിൽനിന്നും പുത്രനിൽനിന്നും പറപ്പെടുന്ന മറ്റൊരു വ്യക്തിയാക്കി.” അതായത്, ഏകദേശം 1100 വർഷം നീണ്ടുനിന്ന “ഫിലിയോക്” (Filioque) വിവാദത്തിന് തിരശ്ശീല വീണത് അപ്പോഴാണ്. എന്നുവെച്ചാൽ, AD 325-മുതൽ 1445-വരെയുള്ള 1120 വർഷം സുനഹദോസുകൾ തച്ചിനിരുന്ന് ഉണ്ടാക്കിയ ഉപദേശമാണ് ത്രിത്വം. അമ്മ മറിയത്തെ ദൈവമാതാവാക്കിയ അതേ സഭാപിതാക്കന്മാരാണ് ഇരുപത് വർഷം കഴിഞ്ഞപ്പോൾ യേശുവിനെ ഇരുപ്രകൃതിയുള്ളവൻ ആക്കിയത്. യേശുവിൻ്റെ ഇരുപ്രകൃതി സത്യമാണെങ്കിൽ, മറിയ ദൈവമാതാവാണെന്നതും സത്യമാകണം. അഥവാ, അവൻ്റെ ഇരുപ്രകൃതിയിൽ വിശ്വസിക്കുന്നവർ മറിയ ദൈവമാതാവാണെന്നും വിശ്വസിക്കണം. അനാദ്യന്തനിത്യനായ ദൈവത്തിനും അമ്മയുണ്ട് എന്നത് എത്ര മനോഹരമായ ദുരുപദേശമാണ്! ത്രിത്വം നാലാം നൂറ്റാണ്ടിൽ ഉണ്ടാക്കാൻ തുടങ്ങിയ ഉപദേശമാണെന്ന് ട്രിനിറ്റിയുടെ ദൈവശാസ്ത്രംതന്നെ സമ്മതിക്കുന്നുണ്ട്. [Systematic theology, Pege, 147] 

☛ ത്രിത്വത്തിലെ വ്യക്തികളുടെ പ്രകൃതി
➟ ബൈബിളിലെ ദൈവം ഒരുത്തൻ മാത്രം (Monos Theos ⁃ The only God) ആണ്: (യോഹ, 5:44; 17:3; റോമ, 16:27; 1തിമൊ, 1:17; യൂദാ, 1:25). ഈ ദൈവം വ്യക്തിയാണെന്നോ, ദൈവത്തിൽ വ്യക്തികളുണ്ടെന്നോ വചനം പറയുന്നുല്ല. എന്നാൽ ട്രിനിക്ക് ദൈവം ഒരുത്തനല്ല; മൂന്നു വ്യക്തികളാണ്. അതിൽ യേശു എന്ന് പേരുള്ള ദേഹവും (1പത്രൊ, 2:24), ദേഹിയും (മത്താ, 26:38), ആത്മാവുമുള്ള (ലൂക്കൊ, 23:46) മനുഷ്യനിൽ (യോഹ, 9:11) ദൈവം എന്ന മറ്റൊരു പ്രകൃതികൂടി ഉണ്ടെന്നാണ് ട്രിനിറ്റിയുടെ അവകാശവാദം. പിതാവല്ല പുത്രൻ; പുത്രനല്ല പരിശുദ്ധാത്മാവ്; പരിശുദ്ധാത്മാവല്ല പിതാവ്. സമനിത്യരും വ്യത്യസ്തരുമായ മൂന്ന് വ്യക്തിയാണ് ട്രിനിറ്റിക്കുള്ളത്. അതായത്, എല്ലാ അർത്ഥത്തിലും സമന്മാരായ മൂന്നു വ്യക്തികളാണ് അവരുടെ ദൈവം എന്നാണ് അവർ അവകാശപ്പെടുന്നത്. ഇനി ട്രിനിറ്റിയിലെ വ്യക്തികളുടെ പ്രകൃതി (Nature) അവരുടെ ഭാഷയിൽ ഒന്നു പരിശോധിക്കാം: ➟പിതാവ് പൂർണ്ണദൈവം, ➟പരിശുദ്ധാത്മാവ് പൂർണ്ണദൈവം, ➟പുത്രൻ പൂർണ്ണദൈവവും പൂർണ്ണമനുഷ്യനും. ➟പിതാവിനും പരിശുദ്ധാത്മാവിനും ഏകപ്രകൃതിയും പുത്രന് ഇരുപ്രകൃതിയും. ഇതിലെവിടെയാണ് സമത്വമുള്ളത്? അപ്പോൾ, മൂന്ന് വ്യക്തികളുടെ സമത്വമെന്ന ഉപദേശം സ്വാഹ! ദുരുപദേശങ്ങൾ എല്ലായ്പ്പോഴും പരസ്പരവിരുദ്ധമായിരിക്കും. ആരും ഇതൊന്നും കാര്യമാക്കണ്ട. ശക്തിയോടെ പിന്നെയും അതിൽത്തന്നെ വിശ്വസിക്കുക.

☛ ബൈബിളിൻ്റെ ഉപദേശം
➟ യേശുവിന്റെ ദൈവവും മനുഷ്യനുമെന്ന ഇരുപ്രകൃതിക്ക് ബൈബിളിൽ യാതൊരു തെളിവിവും കാണാൻ കഴിയില്ല. ബൈബിളിലെ ദൈവപുത്രനായ യേശു ഏതൊരു മനുഷ്യനെപ്പോലെയും ഏകപ്രകൃതി ഉള്ളവനാണ്. യേശുവിൻ്റെ പ്രകൃതി (Nature) എന്താണെന്ന് ദൈവശ്വാസീയമായ തിരുവെഴുത്ത് സത്യംചെയ്ത് പറഞ്ഞിട്ടുണ്ട്: “യേശുവിന്നു എതിരെ നിന്നിരുന്ന ശതാധിപൻ അവൻ ഇങ്ങനെ പ്രാണനെ വിട്ടതു കണ്ടിട്ടു: ഈ മനുഷ്യൻ ദൈവപുത്രൻ ആയിരുന്നു സത്യം (Truly this man was the Son of God) എന്നു പറഞ്ഞു.” (മർക്കൊ, 15:39). “മനുഷ്യൻ” (Man) എന്നത് യേശുവിൻ്റെ “പ്രകൃതിയും” (Nature), “പുത്രൻ” (Son) എന്നത് ഏകമനുഷ്യനായ യേശുവിൻ്റെ “പദവിയും” (Title) ആണ് (റോമ, 5:15). ഇതല്ലാതെ മറ്റൊരു പ്രകൃതി യേശുവിനില്ല. എബ്രായർ 2:16-ൻ്റെ KJV പോലുള്ള പല ഇംഗ്ലീഷ് പരിഭാഷകളിലും മലയാളത്തിലെ വിശുദ്ധ ഗ്രന്ഥത്തിലും BSI-യുടെ സത്യവേദപുസ്തകം സമകാലിക പരിഭാഷയിലും “അവിടുന്നു മാലാഖമാരുടെ പ്രകൃതിയല്ലല്ലോ സ്വീകരിച്ചത്, പിന്നെയോ അബ്രഹാമിന്‍റെ സന്തതികളുടെ പ്രകൃതിയത്രേ” എന്നാണ് കാണുന്നത്. അതായത്, ക്രിസ്തു അബ്രാഹാമിൻ്റെ സന്തതിയെ രക്ഷിക്കാൻ, അവൻ്റെ പ്രകൃതിയുമായാണ് വന്നത്. വീണ്ടെടുപ്പുകാരൻ ചാർച്ചക്കാരനായിരിക്കണം എന്നത് പ്രമാണമാണ്: (രൂത്ത് 2:20 ⁃ സങ്കീ, 49:7-9). അല്ലെങ്കിൽ വീണ്ടെടുക്കാൻ പറ്റില്ല. ദൈവത്തിനൊ, ദൈവവും മനുഷ്യനുമെന്ന ഇരുപ്രകൃതിയുള്ളവനോ, ദൂതനോ ചാർച്ചക്കാനാകാൻ പറ്റില്ല. യേശുവിന് ഇരുപ്രകൃതിയാണ് ഉണ്ടായിരുന്നതെങ്കിൽ, ദൈവപുത്രൻ മനുഷ്യനാണെന്ന് സത്യംചെയ്ത് പറയുമായിരുന്നോ?

☛ യഹോവ മാത്രം ദൈവം:
➟ ❝യഹോവ നമ്മുടെ ദൈവമാകുന്നു; യഹോവ ഏകൻ തന്നേ❞ (The Lord our God is one God) എന്നാണ് ക്രിസ്തു മുഖ്യകല്പനയായി പഠിപ്പിച്ചത്: (ആവ, 6-4 ⁃ മർക്കൊ, 12:29). അല്ലാതെ, ഞാൻ ദൈവമാണെന്നോ, ഞങ്ങൾ ദൈവമാണെന്നോ അല്ല പഠിപ്പിച്ചത്. ക്രിസ്തുവിൻ്റെ വാക്കുകേട്ട ശാസ്ത്രി പറഞ്ഞത്: “ഗുരോ, നീ പറഞ്ഞതു സത്യം തന്നേ; ഏകനേയുള്ളൂ; അവനല്ലാതെ മറ്റൊരുത്തനുമില്ല” (Master, thou hast said the the truth: for there is one God; and there is none other but he) എന്നാണ്: (മർക്കൊ, 12:32). ശാസ്ത്രിയുടെ വാക്കുകൾ ശ്രദ്ധിക്കുക: “ദൈവം (പിതാവ്) ഏകനേയുള്ളൂ” (there is one God) എന്ന് പറഞ്ഞശേഷം, “അവൻ അല്ലാതെ മറ്റൊരുത്തനുമില്ല” (there is none other but he) അഥവാ, യഹോവയല്ലാതെ മറ്റൊരുത്തനുമില്ലെന്ന് “അവൻ” (𝐡𝐞) എന്ന പ്രഥമപുരുഷ (3rd Person) ഏകവചന സർവ്വനാമത്തിൽ ഖണ്ഡിതമായാണ് പറഞ്ഞത്. അതുകേട്ട യേശുവിൻ്റെ മറുപടി അതിലും ശ്രദ്ധേയമാണ്: “നീ ദൈവരാജ്യത്തോടു അകന്നവനല്ല.” (മർക്കൊ, 12:34). താനും ദൈവം ആയിരുന്നെങ്കിൽ, പിതാവായ യഹോവ ഒരുത്തൻ മാത്രമാണ് ദൈവമെന്ന് മുഖ്യകല്പനയായി യേശു പഠിപ്പിക്കുമോ?

☛ ഒരേയൊരു ദൈവം
➟ പിതാവാണ്, “ഏകദൈവം ⁃ The only God” (Joh, 5:44), “പിതാവാണ് ഏകസത്യദൈവം ⁃ Father, the only true God” (Joh, 17:3), ദൈവമായ കർത്താവിനെ (യഹോവ) മാത്രം (only) ആരാധിക്കണം” (മത്താ, 4:10;ലൂക്കൊ, 4:8), “എൻ്റെ പിതാവ് മാത്രമാണ് (only) സകലവും അറിയുന്നതു” (മത്താ, 24:36) എന്നൊക്കെയാണ് ക്രിസ്തു പഠിപ്പിച്ചത്. മേല്പറഞ്ഞ അഞ്ച് (4+1) വാക്യങ്ങളിലും ഗ്രീക്കിൽ ”ഒരേയൊരു, മാത്രം” (only) എന്നർത്ഥമുള്ള “മോണോസ്” (Monos) എന്ന പദമാണ് ഉപയോഗിച്ചിരിക്കുന്നത്. ഗ്രീക്കിലെ Monos, ഇംഗ്ലീഷിലെ Alone, Only, മലയാളത്തിലെ “ഒരേയൊരു, മാത്രം, തനിയെ” എന്നിവ മറ്റാരെയും ഉൾപ്പെടുത്താത്ത (Exclusive) പദങ്ങളാണ്. “ഏകദൈവം“ (The only God) എന്ന് പ്രഥമപുരുഷനിൽ (3rd Person) ക്രിസ്തു പഠിപ്പിച്ചത് പിതാവിനെക്കുറിച്ചാണ്. Monos Theos-ൻ്റെ അർത്ഥം: ഒരു ദൈവം എന്നല്ല; ഒരേയൊരു ദൈവം (The only God) എന്നാണ്. പിതാവാണ് ഒരേയൊരു ദൈവം എന്ന് ക്രിസ്തു പഠിഫ്ലിച്ചാൽ, പിന്നെ താനും മറ്റാരും ദൈവം അല്ലെന്നാണർത്ഥം. Pater ho monos alethinos Theos-ൻ്റെ അർത്ഥം: പിതാവ് സത്യദൈവം ആണെന്നല്ല; പിതാവാണ് ഒരെയൊരു ലത്യദൈവം (Father, the only true God) എന്നാണ്. പിതാവ് മാത്രമാണ് സത്യദൈവം എന്ന് പുത്രൻ പഠിപ്പിച്ചാൽ, പിതാവല്ലാതെ പുത്രനും സ്വർഗ്ഗത്തിലും ഭൂമിയിലുമുള്ള മറ്റരുത്തനും സത്യദൈവം അല്ലെന്നാണർത്ഥം. “മീതെ സ്വർഗ്ഗത്തിലും താഴെ ഭൂമിയിലും യഹോവ തന്നേ ദൈവം, മറ്റൊരുത്തനുമില്ല എന്നു നീ ഇന്നു അറിഞ്ഞു മനസ്സിൽ വെച്ചുകൊൾക.” (ആവ, 4:39 ⁃ ആവ, 3:24;യോശു, 2:11;1രാജാ, 8:23;2ദിന, 6:14;സങ്കീ, 73:25). “പിതാവിനെ മാത്രം (only) ആരാധിക്കണം എന്ന് Monos-കൊണ്ട് പുത്രൻ പഠിപ്പിച്ചാൽ, പിതാവല്ലാതെ താനും മറ്റൊരുത്തനും ആരാധനയ്ക്ക് യോഗ്യനല്ലെന്നാണർത്ഥം. “എൻ്റെ പിതാവ് മാത്രമാണ് (only) സകലവും അറിയുന്നതു” എന്ന് Monos-കൊണ്ട് പുത്രൻ പഠിപ്പിച്ചാൽ, പിതാവല്ലാതെ താനും മറ്റൊരുത്തനും സർവ്വജ്ഞാനി അല്ലെന്നാണർത്ഥം. പിതാവ് മാത്രം ദൈവം, അവൻ മാത്രം സത്യദൈവം, അവനെ മാത്രം ആരാധിക്കണം, അവൻ മാത്രമാണ് സകലവും അറിയുന്നത് എന്നൊക്കെ യേശു ഖണ്ഡിതമായി പഠിപ്പിച്ചിരിക്കെ, അവൻ എങ്ങനെ സമ്പൂർണ്ണ ദൈവമാകും? താൻ ദൈവവും മനുഷ്യനുമെന്ന ഇരുപ്രകൃതി ഉള്ളവനായിരുന്നെങ്കിൽ അത് മറച്ചുവെച്ചുകൊണ്ട്, ദൈവം ഒരുത്തൻ മാത്രമാണെന്നും പിതാവ് മാത്രമാണ് സത്യദൈവമെന്നും വായിൽവഞ്ചനയില്ലാത്ത പുത്രന് എങ്ങനെ പഠിപ്പിക്കുമായിരുന്നില്ല.

☛ എൻ്റെ ദൈവവും നിങ്ങളുടെ ദൈവവും
➟ ക്രൂശിൽ കിടന്നുകൊണ്ട് യേശു തൻ്റെ ദൈവത്തെ വിളിച്ച് ഉറക്കെ നിലവിളിക്കുന്നതായി കാണാം: “ഏകദേശം ഒമ്പതാംമണി നേരത്തു യേശു: “ഏലീ, ഏലീ, ലമ്മാ ശബക്താനി” എന്നു ഉറക്കെ നിലവിളിച്ചു; “എന്റെ ദൈവമേ, എന്റെ ദൈവമേ, നീ എന്നെ കൈവിട്ടതു എന്തു” എന്നർത്ഥം.” (മത്താ, 27:46; സങ്കീ, 22:1 ⁃ മർക്കൊ, 15:33). ഒരു ദൈവം മറ്റൊരു ദൈവത്തോടല്ല; യേശു എന്ന് പേരുള്ള മനുഷ്യൻ തൻ്റെ ദൈവവും പിതാവും ആയവവനെ വിളിച്ചാണ് നിലവിളിച്ചത്: (യോഹ, 9:11; ലൂക്കൊ, 23:46). ഉയിർന്നെഴുന്നേറ്റ യേശു മഗ്ദലക്കാരത്തി മറിയയോട് പറഞ്ഞതും ശ്രദ്ധിക്കുക: “എന്റെ പിതാവും നിങ്ങളുടെ പിതാവും എന്റെ ദൈവവും നിങ്ങളുടെ ദൈവവുമായവന്റെ അടുക്കൽ ഞാൻ കയറിപ്പോകുന്നു എന്നു അവരോടു പറക എന്നു പറഞ്ഞു.” (യോഹ, 20:17). ഈ വേദഭാഗം ശ്രദ്ധിക്കുക, എന്റെ പിതാവും ദൈവവും നിങ്ങളുടെ പിതാവും ദൈവവും ഒരുവനാണെന്നാണ് യേശു പഠിപ്പിച്ചത്. അതായത്, ദൈവപുത്രനായ യേശുക്രിസ്തുവിൻ്റെയും വിശ്വാസികളുടെയും ദൈവം, പിതാവായ യഹോവ ഒരുത്തൻ മാത്രമാണ്. യേശു ദൈവമായിരുന്നെങ്കിൽ, ദൈവത്തിനും ഒരു ദൈവമുണ്ടാകുമോ?

☛ മനുഷ്യനായ എന്നെകൊല്ലാൻ നോക്കുന്നു
➟ ദൈവത്തോടു കേട്ടിട്ടുള്ള സത്യം നിങ്ങളോടു സംസാരിച്ചിരിക്കുന്ന മനുഷ്യനായ എന്നെ നിങ്ങൾ കൊല്ലുവാൻ നോക്കുന്നു.” (യോഹ, 8:40 ⁃ മത്താ, 11:19; ലൂക്കൊ, 7:34). ഈ വേദഭാഗം ശ്രദ്ധിച്ചാൽ, ദൈവത്തിൽനിന്ന് മനുഷ്യനായ തന്നെ വ്യക്തമായി വേർതിരിച്ചാണ് ക്രിസ്തു പഠിപ്പിച്ചതെന്ന് കാണാൻ കഴിയും. തനിക്ക് “ദൈവം” (God) എന്ന മറ്റൊരു പ്രകൃതികൂടി ഉണ്ടായിരുന്നെങ്കിൽ, അത് മറച്ചുവെച്ചുകൊണ്ട് ദൈവത്തിൽനിന്ന് തന്നെ വേർതിരിച്ച് പഠിപ്പിക്കുമായോ, താൻ മനുഷ്യനാണെന്ന് പഠിപ്പിക്കുകയോ ചെയ്യുമായിരുന്നില്ല.

☛ ഹൃദയശുദ്ധിയുള്ളവർ ദൈവത്തെ കാണും
➟ ദൈവത്തെയും ക്രിസ്തുവിനെയും വേതിരിച്ച് പറയുന്ന മൂന്നൂറോളം വാക്യങ്ങളുണ്ട്. അതിൽ ക്രിസ്തു ദൈവത്തിൽനിന്ന് തന്നെ വേർതിരിച്ച് പഠിപ്പിക്കുന്ന അനേകം വാക്യങ്ങളുമുണ്ട്: യേശുവിൻ്റെ ഗിരിപ്രഭാഷണത്തിലെ (The sermon on the mount) ഈ വാക്യം ശ്രദ്ധിക്കുക: “ഹൃദയ ശുദ്ധിയുള്ളവർ ഭാഗ്യവാന്മാർ; അവർ ദൈവത്തെ കാണും.” (മത്താ, 5:8). ഇവിടെ ശ്രദ്ധിക്കുക:  വാക്യത്തിൻ്റെ രണ്ടാംഭാഗത്ത്, “അവർ (ഹൃദയശുദ്ധിയുള്ളവർ) ദൈവത്തെ കാണും” (They shall see God) എന്ന് ഭാവികാലത്തിലാണ് പറയുന്നത്. അത് ഗ്രീക്കിൽ, “Autoi ton Theon opsontai” എന്നാണ്. അതിൽ, opsontai എന്ന ക്രിയാപദം (verb) പ്രഥമപുരുഷനിലും (3rd person) ഭാവികാലത്തിലും (Future tense) ഉള്ളതാണ്. ഇതിൻ്റെയർത്ഥം “അവർ കാണും” (They shall see) എന്നാണ്. അതായത്, “അവർ ദൈവത്തെ കാണുന്നു” എന്ന് വർത്തമാനകാലത്തിലല്ല (Present tense); “അവർ ദൈവത്തെ കാണും” എന്ന് ഭാവികാലത്തിലാണ് പറയുന്നത്. അതായത്, ഇപ്പോൾ പുരുഷാരം കാണുന്നത് ദൈവത്തെയല്ല; ഹൃദയശുദ്ധിയുള്ളവർ ഭാവിയിൽ കാണാനുള്ളവനാണ് ദൈവം. ക്രിസ്തു ദൈവവും മനുഷ്യനുമെന്ന ഇരുപ്രകൃതി ഉള്ളവൻ ആയിരുന്നെങ്കിൽ, അവൻ്റെ വായിൽനിന്ന് പുറപ്പെട്ട വാക്കുകൾക്ക് എന്ത് വിശ്വാസ്യതാണ് ഉള്ളത്? താൻ ദൈവവും മനുഷ്യനുമെന്ന ഇരുപ്രകൃതിയുള്ളവൻ ആയിരുന്നെങ്കിൽ, അവരുടെ കണ്ണുകൾക്ക് മുമ്പിൽ ഇരുന്നുകൊണ്ട് “ദൈവത്തെ ഭാവിയിൽ നിങ്ങൾ കാണും” എന്ന് ഒരിക്കലും പറയുമായിരുന്നില്ല. 

☛ ദൈവത്തിൽ വിശ്വസിപ്പിൻ, എന്നിലും വിശ്വസിപ്പിൻ
➟ “നിങ്ങളുടെ ഹൃദയം കലങ്ങിപ്പോകരുതു; ദൈവത്തിൽ വിശ്വസിപ്പിൻ, എന്നിലും വിശ്വസിപ്പിൻ.” (യോഹ, 14:1). ഇതൊരു ദൈവത്തിൻ്റെ വാക്കുകളല്ല; ദൈവത്തോടു കേട്ടിട്ടുള്ള സത്യം നമ്മോടു സംസാരിച്ചിരിക്കുന്ന മനുഷ്യനായ യേശുവിൻ്റെ വാക്കുകളാണ്: (യോഹ, 8:40). ഉത്തമപുരുഷനായ (1st person) യേശു മധ്യമപുരുഷനായ (2nd person) ശിഷ്യന്മാരോടാണ് “നിങ്ങളുടെ ഹൃദയം കലങ്ങിപ്പോകരുതു” എന്ന് പറഞ്ഞത്. “ദൈവത്തിൽ വിശ്വസിപ്പിൻ” എന്ന് പിതാവായ ദൈവത്തെ പ്രഥമപുരുഷനിലാണ് (3rd person) പറയുന്നത്. താനും ദൈവമാണെങ്കിൽ, ദൈവത്തെ പ്രഥമപുരുഷനിൽ വേർതിരിച്ചു പറയാതെ, “ദൈവമായ/ദൈവങ്ങളായ ഞങ്ങളിൽ വിശ്വസിപ്പിൻ” എന്ന് പറയുമായിരുന്നു. അതാണ് ഭാഷയുടെ നിയമം. തന്നെയുമല്ല, “ദൈവത്തിൽ വിശ്വസിപ്പിൻ, എന്നിലും വിശ്വസിപ്പിൻ” എന്നിങ്ങനെ ദൈവത്തെയും തന്നെയും വ്യക്തമായി വേർതിരിച്ചാണ് പഠിപ്പിച്ചത്. താനും ദൈവമായിരുന്നെങ്കിൽ, ദൈവവും മനുഷ്യനുമെന്ന ഇരുപ്രകൃതിയുള്ളർ\ൻ ആയിരുന്നെങ്കിൽ ദൈവത്തെ പ്രഥമപുരുഷനിൽ വിശേഷിപ്പിക്കുകയോ, ദൈവത്തിൽനിന്ന് തന്നെ വേർതിരിച്ച് പഠിപ്പീക്കുകയോ ചെയ്യുമായിരുന്നില്ല.

☛ ദൈവം ഒരുവനല്ലാതെ നല്ലവൻ ആരുമില്ല
➟ “ഒരു പ്രമാണി യേശുവിനോടു: നല്ല ഗുരോ, ഞാൻ നിത്യജീവനെ അവകാശമാക്കേണ്ടതിന്നു എന്തു ചെയ്യേണം എന്നു ചോദിച്ചു. അതിന്നു യേശു: എന്നെ നല്ലവൻ എന്നു പറയുന്നതു എന്തു? ദൈവം ഒരുവനല്ലാതെ നല്ലവൻ ആരും ഇല്ല.” (ലൂക്കോ, 18:18-19). സമവീക്ഷണ സുവിശേഷങ്ങളിലെല്ലാം ഈ സംഭവം രേഖപ്പെടുത്തിയിട്ടുണ്ട്: (മത്താ, 9:16-17;മർക്കൊ, 10:17-18). യേശു നല്ലവനല്ല എന്നല്ല പറഞ്ഞിതനർത്ഥം; ദൈവപുത്രനെയും അരിമത്യയിലെ യോസേഫിനെയും നല്ലവനെന്ന് ബൈബിൾതന്നെ വിശേഷിപ്പിച്ചിട്ടുണ്ട്: (ലൂക്കൊ, 23:50;യോഹ, 7:12). എന്നാൽ ആത്യന്തികമായി ❛നല്ലവൻ❜ എന്ന പദവിക്ക് യോഗ്യനായി ദൈവം ഒരുത്തൻ മാത്രമേയുള്ളു: (എസ്രാ, 3:11; സങ്കീ, 34:8; 86:5; 100:5; 106:1). ക്രിസ്തു താൻ ദൈവമല്ലാത്തതുകൊണ്ടും ആരാധനയ്ക്കോ, ദൈവമഹത്വത്തിനോ യോഗ്യൻ അല്ലാത്തതുകൊണ്ടാണ്, ദൈവത്തിൻ്റെ പദവിയായ “നല്ലവൻ” എന്നു വിളിച്ചപ്പോൾ താൻ നിഷേധിച്ചത്; അല്ലാതെ താൻ നല്ലവൻ അല്ലാത്തതുകൊണ്ടല്ല. (Joh, 5:44, Joh, 17:3, Joh, 8:40; മത്താ, 4:10). പ്രമാണി യേശുവിനെ “ദൈവം” എന്നല്ല; “നല്ലവൻ” എന്നാണ് വിളിച്ചത്. തന്നെ നല്ലവനെന്ന് വിളിച്ചതുപോലും നിഷേധിച്ച ദൈവപുത്രൻ ദൈവമാണെന്ന് പറയുന്നവർ, ക്രിസ്തുവിനെ കള്ളനാക്കുകയാണ് ചെയ്യുന്നത്. തന്നെയുമല്ല, “ദൈവം ഒരുവനല്ലാതെ നല്ലവനില്ല” എന്ന് പ്രഥമപുരുഷനിലാണ് (3rd person) വിശേഷിപ്പിക്കുന്നത്. അതായത്, ദൈവത്തിൽനിന്ന് മനുഷ്യനായ തന്നെ വേർതിരിച്ചാണ് പറയുന്നത്. താൻ ദൈവവും മനുഷ്യനുമെന്ന ഇരുപ്രകൃതിയുള്ളവൻ ആയിരുന്നെങ്കിൽ, ദൈവത്തിൻ്റെ പദവിയായ “നല്ലവൻ” എന്ന് വിളിച്ചപ്പോൾ ക്രിസ്തു നിഷേധിക്കുകയോ, ദൈവത്തെ പ്രഥമപുരുഷനിൽ വിശേഷിപ്പിക്കുകയോ ചെയ്യുമായിരുന്നില്ല. ഭാഷയെ അതിലംഘിച്ചുകൊണ്ട് ഉപദേശം ഉണ്ടാക്കാനാണെങ്കിൽ, മുന്നല്ല; മുപ്പത്തി മുക്കോടി ദൈവങ്ങളെ വേണമെങ്കിലും ഉണ്ടാക്കാം. എന്നിട്ട് ഒടുവിൽ എന്തുചെയ്യും?

☛ ദൈവം ഒരുത്തൻ മാത്രം
➟ “ശാസ്ത്രിമാരും പരീശന്മാരും: ദൈവദൂഷണം പറയുന്ന ഇവൻ ആർ? ദൈവം ഒരുവൻ അല്ലാതെ പാപങ്ങളെ മോചിപ്പാൻ കഴിയുന്നവൻ ആർ എന്നു ചിന്തിച്ചുതുടങ്ങി.” (ലൂക്കൊ, 5:21). ഇവിടെപ്പറയുന്ന “ഒരേയൊരു ദൈവം” (The only God) പുത്രനാണെന്ന് കരുതുന്നവരുണ്ട്. എന്നാൽ ദൈവം ഒരുവൻ അല്ലാതെ പാപങ്ങളെ മോചിപ്പാൻ കഴിയുന്നവൻ ആർ എന്ന് ചിന്തിച്ചവർതന്നെ, യേശുവെന്ന മനുഷ്യന് ദൈവം കൊടുത്ത അധികാരമാണെന്ന് കണ്ട് ദൈവത്തെ മഹത്വപ്പെടുത്തുന്നത് കാണാം: (മത്താ, 9:8). ഈ വേദഭാഗത്ത്, “ദൈവം ഒരുവൻ” എന്നത് ഗ്രീക്കിൽ മോണോസ് ഹോ തെയോസ് (Monos ho Theos) ആണ്. Monos ho Theos-ൻ്റെ അർത്ഥം: ദൈവം ഒരുവൻ എന്നല്ല; “ഒരേയൊരു ദൈവം” (The only God) എന്നാണ്. ഈ പ്രയോഗം പുത്രനെ കുറിക്കുന്നതല്ല; പിതാവിനെ കുറിക്കുന്നതാണ്. ഇതുപോലെ ദൈവം Monos Theos ആണെന്ന് പറയുന്ന പല വാക്യങ്ങളുണ്ട്: (റോമ, 16:26; 1തിമൊ, 1:17; യൂദാ, 1:24). ഗ്രീക്കിലെ Monos എന്ന പദവും ഇംഗ്ലീഷിലെ Only എന്ന പദവും മലയാളത്തിലെ മാത്രം എന്ന പദവും മറ്റാരെയും ഉൾപ്പെടുത്താത്ത (Exclusive) പദമാണ്. ക്രിസ്തു ദൈവവും മനുഷ്യനുമെന്ന ഇരുപ്രകൃതിയുള്ളവൻ ആയിരുന്നെങ്കിൽ, പിതാവ് ഒരുത്തർ മാത്രമാണ് ദൈവമെന്ന് എഴുത്തുകാരും അപ്പൊസ്തലന്മാരും Monos കൊണ്ട് ഖണ്ഡിതമായി പഠിപ്പിച്ചിരിക്കുമായിരുന്നില്ല. ഭാഷയെ അതിക്രമിക്കുന്നതാണ് പ്രധാന ദുരുപദേശം.

☛ പിതാവായ ഏകദൈവമേ നമുക്കുള്ളൂ
➟ “ആകാശത്തിലോ ഭൂമിയിലോ ദേവന്മാർ എന്നു പേരുള്ളവർ (വിളിക്കപ്പെടുന്നവർ) ഉണ്ടെന്നുവരികിലും പിതാവായ ഏക ദൈവമേ നമുക്കുള്ളു; അവൻ സകലത്തിന്നും കാരണഭൂതനും നാം അവന്നായി ജീവിക്കേണ്ടതും ആകുന്നു. യേശുക്രിസ്തു എന്ന ഏക കർത്താവും നമുക്കു ഉണ്ടു; അവൻ മുഖാന്തരം സകലവും അവൻ മുഖാന്തരം നാമും ആകുന്നു.” (1കൊരി, 8:5-6). വാക്യം ശ്രദ്ധിക്കുക: “സ്വർഗ്ഗത്തിലോ ഭൂമിയിലോ ദൈവങ്ങൾ (gods) എന്നു വിളിക്കപ്പെടുന്നവർ ഉണ്ടെന്നുവരികിലും, പിതാവായ ഏക ദൈവമേ നമുക്കുള്ളു” എന്നാണ് പൗലൊസ് പഠിപ്പിക്കുന്നത്. “പിതാവായ ഏക ദൈവമേ നമുക്കുള്ളു” (For us there is but one God, the Father) എന്ന് പറഞ്ഞാൽ, മറ്റൊരു ദൈവം പിന്നെ ഇല്ലെന്നാണ്. പുത്രനും ദൈവമാണെങ്കിൽ, “പിതാവായ ഏക ദൈവമേ നമുക്കുള്ളു” എന്ന പ്രയോഗം പരമാബദ്ധമാണ്. അടുത്തവാക്യം: “എല്ലാവർക്കും മീതെയുള്ളവനും എല്ലാവരിലും കൂടി വ്യാപരിക്കുന്നവനും എല്ലാവരിലും ഇരിക്കുന്നവനുമായി എല്ലാവർക്കും ദൈവവും പിതാവുമായവൻ ഒരുവൻ.” (എഫെ, 4:6). ഈ വേദഭാഗവും ശ്രദ്ധിക്കുക: “എല്ലാവർക്കും ദൈവവും പിതാവുമായവൻ ഒരുവൻ” (One God and Father of all) എന്നാണ് പറയുന്നത്. പാതാവല്ലാതെ മറ്റൊരു ദൈവമുണ്ടെങ്കിൽ, ഈ പ്രയോഗവും അബദ്ധമാണ്. ക്രിസ്തു ദൈവവും ആയിരുന്നെങ്കിൽ, ഒരേയൊരു ദൈവം പിതാവാണെന്ന് പൗലൊസ് പഠിപ്പിക്കുമായിരുന്നോ?

☛ യേശുക്രിസ്തുവിൻ്റെ ദൈവവും പിതാവും
➟ ദൈവപുത്രനായ യേശുക്രിസ്തുവിൻ്റെ ദൈവത്തെ അപ്പൊസ്തലന്മാർ വാഴ്ത്തുന്നതും സ്തുതിക്കുന്നതും സ്തോത്രം ചെയ്യുന്നതുമായ ഏഴു വാക്യങ്ങൾ ബൈബിളിലുണ്ട്. “നമ്മുടെ കർത്താവായ യേശുക്രിസ്തുവിന്റെ ദൈവവും പിതാവുമായി എന്നേക്കും വാഴ്ത്തപ്പെട്ടവൻ ഞാൻ ഭോഷ്കല്ല പറയുന്നതു എന്നറിയുന്നു.” (2കൊരി, 11:31; എഫെ, 1:3; എഫെ, 1:17 ⁃ റോമ, 15:5; 2കൊരി, 1:3; കൊലൊ, 1:5; 1പത്രൊ, 1:3). യോഹന്നാനും യേശുക്രിസ്തുവിൻ്റെ ദൈവത്തെക്കുറിച്ച് പഠിപ്പിച്ചിട്ടുണ്ട്: (വെളി, 1:6). ⟦സംശയമുള്ള വാക്യങ്ങൾ ഗ്രീക്കിലോ, ഇംഗ്ലീഷിലോ പരിശോധിക്കുക⟧ അതായത്, അപ്പൊസ്തലന്മാരുടെ ദൈവം ദൈവപുത്രനായ യേശുക്രിസ്തുവല്ല; യേശുക്രിസ്തുവിൻ്റെ ദൈവമാണ്. യേശു ദൈവവും മനുഷ്യനുമെന്ന ഇരുപ്രകൃതിയുള്ളവൻ ആയിരുന്നെങ്കിൽ, അപ്പൊസ്തലന്മാർ വാഴുത്തുകയും സ്തുതിക്കുകയുംചെയ്ത യേശുക്രിസ്തുവിൻ്റെ ദൈവം ആരാണെന്ന് പറയും? ദൈവവും മനുഷ്യനുമെന്ന ഇരുപ്രകൃതിയുള്ളവനും ഒരു ദൈവമുണ്ടാകുമോ?

☛ യേശു എന്നു പേരുള്ള മനുഷ്യൻ
➟ അപ്പൊസ്തലന്മാരും അവൻ മനുഷ്യനാണെന്ന് ആവർത്തിച്ച് സാക്ഷ്യപ്പെടുത്തിയിട്ടുണ്ട്: മനുഷ്യൻ (മത്താ, 26:72), യേശു എന്നു പേരുള്ള മനുഷ്യൻ (യോഹ, 9:11), പുരുഷനായ (Man) നസറായനായ യേശു (പ്രവൃ, 2:23), ഏകമനുഷ്യനായ യേശുക്രിസ്തു (റോമ, 5:15), മനുഷ്യൻ (1കൊരി, 15:21), രണ്ടാം മനുഷ്യൻ (1കൊരി, 15:47), ഏകപുരുഷൻ (One man) (2കൊരി, 11:2), മനുഷ്യനായ ക്രിസ്തുയേശു (1തിമൊ, 2:6) മുതലായവ. യേശു ദൈവവും ആയിരുന്നെങ്കിൽ, അപ്പൊസ്തലന്മാർ ഒരിക്കൽപ്പോലും അത് പറയാതെ, പിതാവായ ഏകദൈവമേ നമുക്കുള്ളെന്നും യേശു മനുഷ്യനാണെന്നും ആവർത്തിച്ച് പഠിപ്പിച്ചത് എന്തുകൊണ്ടാണ്? യേശു അപ്പൊസ്തലന്മാരെക്കുറിച്ച് പഠിപ്പിച്ച സവിശേഷമായ ഒരുകാര്യമുണ്ട്: “നിങ്ങളുടെ വാക്കു കേൾക്കുന്നവൻ എന്റെ വാക്കു കേൾക്കുന്നു; നിങ്ങളെ തള്ളുന്നവൻ എന്നെ തള്ളുന്നു; എന്നെ തള്ളുന്നവൻ എന്നെ അയച്ചവനെ തള്ളുന്നു.” (ലൂക്കൊ, 10:16). [കാണുക: ഏകദൈവമായ പിതാവും ഏകമനുഷ്യനായ പുത്രനും]

☛ യേശുവിനെ നേരിൽക്കണ്ടവർ
➟ ഒന്നാം നൂറ്റാണ്ടിൽ അവനെ നേരിട്ടുകണ്ട എല്ലാത്തരം ആളുകളും അവൻ മനുഷ്യനാണെന്ന് സാക്ഷ്യപ്പെടുത്തിയിട്ടുണ്ട്: യോഹന്നാൻ സ്നാപകൻ (യോഹ, 1:30), പുരുഷാരം (മത്താ, 9:8), ശമര്യാസ്ത്രീ (യോഹ, 4:29), ചേകവർ (യോഹ, 7:46), പിറവിക്കുരുടൻ (യോഹ, 9:11), പരീശന്മാർ (യോഹ, 9:16), യെഹൂദന്മാർ (യോഹ, 10:33), മഹാപുരോഹിതന്മാർ (യോഹ, 11:47), കയ്യാഫാവ് (യോഹ, 11:50), വാതിൽ കാവൽക്കാരത്തി (യോഹ, 18:17), പീലാത്തോസ് (ലൂക്കൊ, 23:4), ശതാധിപൻ (മർക്കൊ, 15:39), ന്യായാധിപസംഘം (പ്രവൃ, 5:28). യേശു ദൈവവും മനുഷ്യനുമെന്ന ഇരുപ്രകൃതിയുള്ളവൻ ആയിരുന്നെങ്കിൽ, കുറഞ്ഞപക്ഷം അവന് വഴിയൊരുക്കിയ യോഹന്നാൻ സ്നാപകനെങ്കിലും അതറിയാതിരിക്കുമോ? അവൻ മനുഷ്യനാണെന്ന് ദൈവാത്മാവ് 36 പ്രാവശ്യം അക്ഷരംപ്രതി ആലേഖനംചെയ്ത് വെച്ചിട്ടുണ്ട്. [കാണുക: ഏകമനുഷ്യനായ യേശുക്രിസ്തു]. 

☛ചരിത്രകാരനായ ജോസീഫസ്
➟ “യേശു എന്ന ഒരു ജ്ഞാനിയായ മനുഷ്യൻ” എന്നാണ് സുപ്രസിദ്ധ യഹൂദാ ചരിത്രകാരനായ ഫ്ലാവിയസ് ജോസീഫസ് (37-100) “യഹൂദന്മാരുടെ പുരാതനത്വം” (The Jewish Antiquities) എന്ന തൻ്റെ കൃതിയിൽ യേശുവിനെപ്പറ്റി രേഖപ്പെടുത്തിയിട്ടുള്ളത് [Antiquities of the Jews – Book XVIII, 3:3). ജോസീഫസിനും യേശുവിൻ്റെ ഇരുപ്രകൃതിയുടെ കാര്യം അറിയില്ലായിരുന്നു.

☛ മറിയയുടെ മക്കൾ:
➟ യേശുവിന് “മനുഷ്യൻ” എന്ന ഏകപ്രകൃതി മാത്രമേയുള്ളൂ എന്നതിൻ്റെ വ്യക്തമായ തെളിവാണ്, അവനെ പ്രസവിച്ചത് മറിയ എന്ന മനുഷ്യസ്ത്രീ ആയിരുന്നു എന്നത്. “മറിയയുടെ മകൻ” (മർക്കൊ, 6:3), “യേശുവിന്റെ അമ്മ” (യോഹ, 2:3) എന്നിങ്ങനെ 37 പ്രാവശ്യം പറഞ്ഞിട്ടുണ്ട്. യേശുവിൻ്റെ സഹോദരന്മാരെക്കുറിച്ചും പറഞ്ഞിട്ടുണ്ട്:
☛ കൊയ്നേ ഗ്രീക്കിൽ അല്ലെങ്കിൽ LXX-ലും New Testament-ലും “അപ്പനമ്മമാരുടെ സഹോദരങ്ങളുടെ പുത്രനെ/പുത്രന്മാരെ” (Cousin/Cousins) കുറിക്കാൻ “Anepsios” (ἀνεψιὸς) എന്ന ഏകവചനവും (Singular), “Anepsiois” (ἀνεψιοῖς) എന്ന ബഹുവചനവും (Plural) കാണാം: (കൊലൊ, 4:10; തോബി, 7:2 ⁃ സംഖ്യാ, 36:11). എന്നാൽ യേശുവിൻ്റെ സഹോദരന്മാരെ (Brothers) കുറിക്കാൻ ആ പദമല്ല; യഥാർത്ഥ സഹോദരന്മാരെ കുറിക്കുന്ന “Adelphoi” (ἀδελφοὶ) എന്ന പദമാണ് ഉപയോഗിച്ചിരിക്കുന്നത്.
☛ പദോൽപ്പത്തി: ❛“A” (ἀ – Alpha) “ഒരേ” (The same), “Delphus” (δελφύς) “ഗർഭപാത്രം” (The womb) എന്നീ രണ്ട് പദങ്ങൾ ചേർന്നാണ് പദമുണ്ടായത്. ഒരേ ഗർഭപാത്രത്തിൽ നിന്ന് വന്നവനാണ് “സഹോദരൻ” (Adelphos ⁃ Brother). Adelphoi എന്ന ബഹുവചനപദം 11 പ്രാവശ്യം കാണാം: (മത്താ, 12:46; 12:47; മത്താ, 13:55; മർക്കൊ, 3:31; 3:32; ലൂക്കൊ, 8:19; 8:20; യോഹ, 2:12; 7:3 7:5; 7:10). POC-യിൽ “പിതൃവ്യപുത്രൻ” (കൊളോ, 4:10; തോബി, 7:2), “പിതൃസഹോദരന്‍മാരുടെ പുത്രന്‍മാർ” (സംഖ്യ, 36:11) എന്നിങ്ങനെയാണ് കാണുന്നത്.
☛ കർത്താവിൻ്റെ സഹോദരിമാരെ (𝐒𝐢𝐬𝐭𝐞𝐫𝐬) കുറിക്കാൻ “Adelphai” (ἀδελφαὶ) എന്ന സ്ത്രീലിംഗപദം (Feminine) രണ്ടുപ്രാവശ്യം കാണാം: (മത്താ, 13:56; മർക്കൊ, 6:3). “സഹോദരി” (Sister) എന്നർത്ഥമുള്ള “Adelphe” (ἀδελφή) എന്ന ഏകവചന (Singular) പദത്തിൻ്റെ ബഹുവചന (Plural) രൂപമാണിത്. ലാസറിൻ്റെ സഹോദരിമാരെ കുറിക്കാനും ഈ പദം ഉപയോഗിച്ചിട്ടുണ്ട്: (യോഹ, 11:3). അതിനാൽ യേശുവിൻ്റെ അമ്മ അവൻ്റെ സ്വന്തം അമ്മയായിരിക്കുന്നപോലെ, അവൻ്റെ സഹോദരന്മാരും സഹോദരിമാരും സ്വന്തം തന്നെയാണെന്ന് അസന്ദിഗ്ധമായി മനസ്സിലാക്കാം.
☛ മറിയത്തെ “കർത്താവിൻ്റെ അമ്മ” എന്ന് പറഞ്ഞിരിക്കുന്നപോലെ, അവളുടെ മറ്റ് മക്കളെ “കർത്താവിൻ്റെ സഹോദരൻ, സഹോദരന്മാർ” എന്നും വ്യക്തമായി പറഞ്ഞിട്ടുണ്ട്: (ലൂക്കൊ, 1:43 ⁃ ഗലാ, 1:19; 1കൊരി, 9:5). ഗ്രീക്കിലും ഇംഗ്ലീഷിലും യഥാക്രമം He meter Kyriou ⁃ The mother of the Lord, Ton adelphon tou Kyriou ⁃ the brother of the Lord, Hoi adelphoi tou Kyriou ⁃ The brothren of the Lord എന്നാണ്. ഒന്നാമത്തേതിൽ സ്ത്രീലിംഗ ഏകവചന (Feminine Singular) ആർട്ടിക്കിളും, രണ്ടാമത്തേതിൽ പുല്ലിംഗ ഏകവചന (Masculine Singular) ആർട്ടിക്കിളും, മൂന്നാമത്തേതിൽ പുല്ലിംഗ ബഹുവചന (Masculine Plural) ആർട്ടിക്കിളും ആണ് ഉപയോഗിച്ചിരിക്കുന്നത് എന്ന വ്യത്യാസം മാത്രമേയുള്ളൂ. പരിശുദ്ധാത്മാവിനാൽ അവൾ ഒരു പാപരഹിതനായ മനുഷ്യക്കുഞ്ഞിനെ ഗർഭംധരിച്ചു എന്നതൊഴിച്ചാൽ, മറ്റൊരത്ഭുതവും അവൻ്റെ ജനനത്തോടുള്ള ബന്ധത്തിൽ പറഞ്ഞിട്ടില്ല. യേശുവിന് ഇരുപ്രകൃതി ആയിരുന്നെങ്കിൽ, മറിയത്തിൻ്റെ മറ്റു മക്കളെ യേശുവിൻ്റെ സഹോദരന്മാർ/സഹോദരിമാർ എന്ന് പറയുമായിരുന്നില്ല. ഒരേ പ്രകൃതിയുള്ളവരെ മാത്രമേ സഹോദരന്മാർ/സഹോദരിമാർ എന്ന് വിശേഷിപ്പിക്കുകയുള്ളൂ. പിന്നെങ്ങനെ അവൻ ദൈവവും മനുഷ്യനുമെന്ന ഇരുപ്രകൃതിയുള്ളവൻ ആണെന്ന് പറയാൻ പറ്റും?

☛ യേശുവിൻ്റെ സംക്ഷിപ്ത ചരിത്രം
➟ യേശുവിൻ്റെ ജീവചരിത്രം പരിശോധിച്ചാൽ, അവൻ ദൈവമല്ല; മനുഷ്യനാണെന്ന് ആർക്കും മനസ്സിലാകും: കന്യകയായ മറിയ പ്രസവിച്ചത് ദൈവത്തെയോ, ദൈവവും മനുഷ്യനുമെന്ന ഇരുപ്രകൃതിയുള്ളവനെയോ, ദൂതനെയോ, ക്രിസ്തുവിനെയോ, ദൈവപുത്രനെയോ അല്ല; അവളുടെ ആദ്യജാതനായ മനുഷ്യക്കുഞ്ഞിനെയാണ്: (ലൂക്കൊ, 2:7 ⁃ യോഹ, 8:40). 
➟ നമ്മുടെ പാപപരിഹാരാർത്ഥം പരിശുദ്ധാത്മാവിനാൽ മറിയത്തിൻ്റെ ഉദരത്തിൽ ഉല്പാദിതമായവനും (മത്താ, 1:18-20; ലൂക്കൊ, 2:21), 
➟ അവളുടെ ആദ്യജാതനായി ഉത്ഭവിച്ചവനും (ലൂക്കൊ, 1:35; ലൂക്കൊ, 2:7),
➟ അബ്രാഹാമിൻ്റെ സന്തതിയായ പുരുഷപ്രജയാകയാൽ എട്ടാം നാളിൽ പരിച്ഛേദനയേറ്റ് പ്രവചനപോലെ യേശു എന്ന് പേർ വിളിക്കപ്പെട്ടവനും (ഉല്പ, 17:10-14; മത്താ, 1:21; ലൂക്കൊ, 1:31 ⁃⁃ ലൂക്കൊ, 2:21), 
➟ മറിയത്തിൻ്റെ ആദ്യജാതനാകയാൽ പിന്നെയും മുപ്പത്തിമൂന്നുദിവസം കഴിഞ്ഞ് ദൈവത്തിനർപ്പിച്ചിട്ട് വീണ്ടെടുപ്പുവില കൊടുത്ത് വീണ്ടെടുക്കപ്പെട്ടവനും (ലൂക്കൊ, 2:7; 2:22-24 ⁃⁃ ലേവ്യ, 12:4) 
➟ ദൈവകൃപയോടെ ജ്ഞാനംനിറഞ്ഞ് ആത്മാവിൽ ബലപ്പെട്ടവനും (ലൂക്കൊ, 2:40) 
➟ ദൈവത്തിൻ്റെയും മനുഷ്യരുടെയും കൃപയിൽ മുതിർന്നുവന്നവനും (ലൂക്കൊ, 2:52) 
➟ യോർദ്ദാനിൽവെച്ച് പ്രവചനംപോലെ അഭിഷേകം പ്രാപിച്ച് ക്രിസ്തു (അഭിഷിക്തൻ) ആയവനും (യെശ, 61:1 ⁃⁃ ലൂക്കൊ, 3:22; പ്രവൃ, 10:38) 
➟ പ്രവചനങ്ങൾപോലെ പിതാവിനാൽ ❛നീ എൻ്റെ പ്രിയപുത്രൻ❜ എന്ന് വിളിക്കപ്പെട്ടവനും (ലൂക്കൊ, 1:32; ലൂക്കോ, 1:35 ⁃⁃ ലൂക്കൊ, 3:23) 
➟ പരിശുദ്ധാത്മാവ് നിറഞ്ഞവനായി യോർദ്ദാൻവിട്ട് മടങ്ങിയവനും (ലൂക്കൊ, 4:1) 
➟ ആത്മാവിൻ്റെ ശക്തിയോടെ ശുശ്രൂഷിച്ചവനും (ലൂക്കൊ, 4:14-15) 
➟ ദൈവം യിസ്രായേൽ ജനത്തിൻ്റെ ഇടയിൽ അത്ഭുതങ്ങൾ ചെയ്യിച്ചവനും (പ്രവൃ, 2:22 ⁃⁃ ലൂക്കൊ, 5:17) 
➟ ദൈവത്താൽ പാപമോചനം നല്കിയവനും (ലൂക്കൊ, 5:21 ⁃⁃ മത്താ, 9:8) 
➟ എന്റെ ദൈവമേ, എന്റെ ദൈവമേ, നീ എന്നെ കൈവിട്ടതെന്ത് എന്നു ഉറക്കെ നിലവിളിച്ചവനും (മത്താ, 27:47; മർക്കൊ, 15:34; എബ്രാ, 5:7) 
➟ തൻ്റെ മനുഷ്യാത്മാവിനെ പിതാവായ യഹോവയുടെ കയ്യിൽ കൊടുത്തിട്ട്, നിത്യാത്മാവിനാൽ ദൈവത്തിന് തന്നെത്താൻ നിഷ്കളങ്കനായി അർപ്പിച്ചവനും (ലൂക്കൊ, 23:46; സങ്കീ, 31:5; 1തിമൊ, 2:6; എബ്രാ, 9:14) 
➟ മൂന്നാം ദിവസം ദൈവത്താൽ ഉയിർപ്പിക്കപ്പെട്ടവനും (പ്രവൃ, 10:40) 
➟ ഉയിർത്തെഴുന്നേറ്റ അന്നുതന്നെ തൻ്റെയും വിശ്വാസികളുടെയും പിതാവും ദൈവവും ആയവൻ്റെ അടുക്കലേക്ക് കരേറിപ്പോയതും (യോഹ, 20:17) ദൈവമോ, ദൈവവും മനുഷ്യനുമെന്ന ഇരുപ്രകൃതിയുള്ളവനോ അല്ല; യേശു എന്നു പേരുള്ള മനുഷ്യനാണ്: (യോഹ, 9:11). ദൈവത്താൽ ജനിച്ചുജീവിച്ചുമരിച്ചുയിർത്തവൻ എങ്ങനെ ജനനവും മരണവുമില്ലാത്തെ ദൈവമാകും? വചനത്തെയും ഭാഷയെയും എല്ലാ വ്യാകരണ നിയമങ്ങളുടെയും അതിലംഘിക്കാതെ, ദൈവവും മനുഷ്യനുമെന്ന സങ്കരപ്രകൃതി യേശുവിനുണ്ടെന്ന് തെളിയിക്കാൻ സ്വർഗ്ഗത്തിലും ഭൂമിയിലും ആർക്കും കഴിയില്ല.

☛ ജഡത്തിൽ വന്നവൻ
➟ “ദൈവാത്മാവിനെ ഇതിനാൽ അറിയാം; യേശുക്രിസ്തു ജഡത്തിൽ വന്നു എന്നു സ്വീകരിക്കുന്ന ആത്മാവൊക്കെയും ദൈവത്തിൽനിന്നുള്ളതു. യേശുവിനെ സ്വീകരിക്കാത്ത യാതൊരു ആത്മാവും ദൈവത്തിൽനിന്നുള്ളതല്ല. അതു എതിർക്രിസ്തുവിന്റെ ആത്മാവു തന്നേ; അതു വരും എന്നു നിങ്ങൾ കേട്ടിട്ടുണ്ടല്ലോ; അതു ഇപ്പോൾ തന്നേ ലോകത്തിൽ ഉണ്ടു.” (1യോഹ, 4:2-3). യേശുക്രിസ്തു ജഡത്തിൽ അഥവാ, മനുഷ്യനായി വന്നു സ്വീകരിക്കുന്ന/വിശ്വസിക്കുന്ന ആത്മാക്കളാണ് ദൈവത്തിൽനിന്നുള്ളത്. ആ നിലയിൽ യേശുവിനെ സ്വീകരിക്കാത്ത ആത്മാക്കൾ എതിർക്രിസ്തുവിൻ്റെ ആത്മാക്കളാണെന്ന് യോഹന്നാൻ വ്യക്തമാക്കുന്നു. യേശു ദൈവവും മനുഷ്യനുമെന്ന ഇരുപ്രകൃതിയുള്ളവൻ ആയിരുന്നു എന്ന് അവൻ്റെ മാറിൽ ചാരിക്കിടന്നിട്ടുള്ള യോഹന്നാനുപോലും അറിയില്ലായിരുന്നു.

☛ ക്രിസ്തു ആരാണെന്നോ, അവൻ്റെ വീണ്ടെടുപ്പുവേല എന്താണെന്നോ അറിഞ്ഞിരുന്നുവെങ്കിൽ, ഇങ്ങനെയൊരു ഉപദേശം ക്രൈസ്തവസഭയിൽ ഉണ്ടാകില്ലായിരുന്നു. [കാണുക: വീണ്ടെടുപ്പുകാരനായ ക്രിസ്തു]

12 thoughts on “യേശുവിൻ്റെ ഇരുപ്രകൃതിവാദം വാസ്തവമോ?”

Leave a Reply

Your email address will not be published. Required fields are marked *