യാഫെത്ത് (Japheth)

പേരിനർത്ഥം – അവൻ വർദ്ധിപ്പിക്കും

നോഹയുടെ മൂന്നു പുത്രന്മാരിലൊരാൾ. നോഹയ്ക്ക് അഞ്ഞൂറു വയസ്സായശേഷമാണ് മൂന്നു മകളെ ജനിപ്പിച്ചത്. (ഉല്പ, 5:32). ശേം, ഹാം, യാഫെത്ത് എന്നീ ക്രമത്തിൽ മൂന്നാമതായാണ് വംശാവലിപ്പട്ടികകളിൽ യാഫെത്തിൻ്റെ പേര് കാണുന്നത്. (ഉല്പ, 5:32; 6:10; 7:13; 9:18; 10:1; 1ദിന, 1:4). എങ്കിലും, നോഹയുടെ ഇളയമകൻ ഹാമാണെന്നും യാഫെത്തിൻ്റെ ജേഷ്ഠൻ ശേമാണെന്നും പറഞ്ഞിരിക്കയാൽ നോഹയുടെ രണ്ടാമത്തെ മകനാണ് യാഫെത്തെന്ന് മനസ്സിലാക്കാം. (ഉല്പ, 9:22-24; 10:21). യാഫെത്തും ഭാര്യയും ജലപ്രളയത്തിൽ നിന്നും സംരക്ഷിക്കപ്പെട്ടു. (ഉല്പ, 7:7; 1പത്രൊ, 3:20). യാഫെത്തിന് ഏഴു പുത്രന്മാർ ഉണ്ടായിരുന്നു: ഗോമെർ, മാഗോഗ്, മാദായി, യാവാൻ, തൂബൽ, മേശെക്, തീരാസ്. (ഉല്പ, 10:2; 1ദിന, 1:5). യാഫെത്തിന്റെ സന്തതികൾ ജാതികളുടെ ദ്വീപുകളിൽ വസിച്ചു. (ഉല്പ, 10:5). യാഫെത്തിന്റെ സന്തതികളുടെ പേരുകൾ പലതും ഇൻഡോ-യുറോപ്യൻ ജനതയെ കുറിക്കുന്നു. അപ്പനായ നോഹ വീഞ്ഞുകുടിച്ചു നഗ്നനായി കിടന്നപ്പോൾ ശേമും യാഫെത്തും പിതാവിന്റെ നഗ്നത മറച്ചു. തന്മൂലം നോഹ യാഫൈത്തിനെ അനുഗ്രഹിച്ചു. (ഉല്പ, 9:21-27). ഉല്പത്തി10-ലും 1ദിനവൃത്താന്തം 1-ലും യാഫെത്തിന്റെ വംശാവലിയാണ് ആദ്യം ചേർത്തിരിക്കുന്നത്.