ഗൊമോര/ഗൊമൊറ (Gomorrah)

ദൈവം അഗ്നിയും ഗന്ധകവും വർഷിപ്പിച്ചു നശിപ്പിച്ച പട്ടണങ്ങളിലൊന്നായ ഗൊമോര യോർദ്ദാൻ സമതലത്തിൽ സ്ഥിതിചെയ്യുന്നു. (ഉല്പ, 10:19; 13:10; 19:24,28). കനാന്യരുടെ അതിർ നിർദ്ദേശിക്കവെയാണ് ഗൊമോര ബൈബിളിൽ ആദ്യം പറയപ്പെടുന്നത്. (ഉല്പ, 10:19). സൊദോം, ഗൊമോര, ആദ്മ, സെബോയീം, സോവർ എന്നീ പഞ്ചനഗരങ്ങൾ യോർദ്ദാൻ പ്രവിശ്യയിൽ പ്രമുഖങ്ങളാണ്. ഗൊമോര ഏഴുപ്രാവശ്യം സൊദോമിനോടു കൂടെയും, രണ്ടുപ്രാവശ്യം (ഉല്പ, 14:2, 8) മറ്റു നാലു നഗരങ്ങളോടൊപ്പവും, ഒരിക്കൽ മാത്രം സോവർ ഒഴികെ മറ്റു മൂന്നു നഗരങ്ങളോടൊപ്പവും (ആവ, 29:22) പറയപ്പെട്ടിട്ടുണ്ട്. ഗൊമോരയുടെ ദുഷ്ടതയും തത്ഫലമായുണ്ടായ നാശവും ദുഷ്ടതയുടെ നേർക്കുള്ള താക്കീതായി ആവർത്തിച്ചു പ്രസ്താവിക്കുന്നുണ്ട്: (ആവ, 29:22; 32:32; യെശ, 1:9,10; 13:19; യിരെ, 23:14; 49:18; 50:40; ആമോ, 4:11; സെഫ, 2:9; മത്താ, 10:15; റോമ, 9:29: 2പത്രൊ, 2:6; യൂദാ, 7). 

ചാവുകടലിന്റെ തെക്കെ അറ്റത്തു ഇന്നു വെള്ളം മൂടിക്കിടക്കുന്ന സിദ്ദീം താഴ്വരയിലാണ് ഈ പട്ടണങ്ങൾ സ്ഥിതിചെയ്തിരുന്നത്. അബ്രാഹാമിന്റെ കാലത്തു അതു യഹോവയുടെ തോട്ടം പോലെ ആയിരുന്നു. (ഉല്പ, 13:10). ലോത്തിന്റെ കാലത്തു ഗൊമോരാ രാജാവായ ബിർശാ മറ്റു നാലു നഗരങ്ങളിലെ രാജാക്കന്മാരോടൊപ്പം ഏലാം രാജാവായ കെദൊർലാ യോമെരിനോടു യുദ്ധം ചെയ്തു പരാജയപ്പെട്ടു. ഈ യുദ്ധത്തിനു ശേഷം ലോത്തു പിടിക്കപ്പെട്ടു. (ഉല്പ, 14:12). ഏകദേശം 13 വർഷത്തിനു ശേഷം പാപം നിമിത്തം ഗൊമോരയെ അഗ്നിയും ഗന്ധകവും വർഷിപ്പിച്ചു നശിപ്പിച്ചു. (ഉല്പ, 18:20,21; 19:24, 28).