സാദോക് (Zadok)

പേരിനർത്ഥം – നീതിമാൻ

ദാവീദ് രാജാവിന്റെ കാലത്തുണ്ടായിരുന്ന മഹാപുരോഹിതൻ. അഹീത്തുബിന്റെ പുത്രനായ സാദോക് അഹരോന്റെ പുത്രനായ എലെയാസാറിന്റെ കുടുംബത്തിൽ പെട്ടവനായിരുന്നു. (1ദിന, 24:3). അഹരോനിൽ നിന്നും പതിനൊന്നാമത്തെ തലമുറയിലാണ് സാദോക് പുരോഹിതൻ. സാദോക്കും അവന്റെ പിതൃഭവനത്തിലെ 22 പ്രഭുക്കന്മാരും ആയി ഹെബ്രോനിൽ വന്നു ദാവീദിന്റെ പക്ഷം ചേർന്നു. (1ദിന, 12:26-28). ഇതു മറ്റൊരു സാദോക് ആയിരിക്കാമെന്നു കരുതുന്നവരും ഉണ്ട്. അന്നുമുതൽ എല്ലാ പ്രതിസന്ധികളിലും സാദോക് ദാവീദിന്റെ കൂടെ ഉറച്ചുനിന്നു. അബ്ശാലോമിന്റെ മത്സരത്തിൽ ദാവീദ് യെരൂശലേം വിട്ടോടി. അപ്പോൾ സാദോക്കും ലേവ്യരും നിയമപ്പെട്ടകം ചുമന്നുകൊണ്ടു ദാവീദിനു പിന്നാലെ ചെന്നു. എന്നാൽ ദാവീദിന്റെ കല്പനയനുസരിച്ച് സാദോക്ക് യെരൂശലേമിൽ താമസിച്ചുകൊണ്ടു വാർത്തകൾ രഹസ്യമായി രാജാവിനെ അറിയിച്ചുവന്നു. (2ശമൂ, 15:24- 29; 17:15). അബ്ശാലോമിന്റെ മരണശേഷം ദാവീദിനെ മടക്കിവിളിക്കുവാൻ മൂപ്പന്മാരെ പ്രേരിപ്പിച്ചത് സാദോക്കും അബ്യാഥാരും ആയിരുന്നു. (1ദിന, 19:11-15). ദാവീദിന്റെ വാർദ്ധക്യത്തിൽ അദോനീയാവ് മത്സരിച്ചപ്പോൾ യോവാബും അബ്യാഥാരും അവന്റെ പക്ഷം ചേർന്നു. എന്നാൽ സാദോക് ദാവീദിനോടു കൂറു പുലർത്തി. ദാവീദിന്റെ ഹിതപ്രകാരം ശലോമോനെ രാജാവായി അഭിഷേകം ചെയ്തത് സാദോക് ആയിരുന്നു. (1രാജാ, 1:34,39). ശലോമോൻ രാജാവായപ്പോൾ അബ്യാഥാരിനെ പൗരോഹിത്യത്തിൽ നിന്നും നീക്കി പകരം സാദോക്കിനെ പൗരോഹിത്യത്തിൽ സ്ഥിരപ്പെടുത്തി. (1രാജാ, 2;27, 35). ഇതിനുശേഷം സാദോക്കിന്റെ പ്രവർത്തനങ്ങളെ കുറിച്ചുള്ള പരാമർശമൊന്നുമില്ല. ശലോമോന്റെ ഉദ്യോഗസ്ഥന്മാരുടെ പട്ടികയിൽ സാദോക്കിനെ പുരോഹിതൻ എന്നു രേഖപ്പെടുത്തിയിട്ടുണ്ട്. (1രാജാ, 4:4; 1ദിന, 29:22).

സാത്താൻ (Satan) 

ബൈബിളിൽ 53 പ്രാവശ്യം സാത്താൻ പ്രയോഗിച്ചിട്ടുണ്ട്. സാത്താൻ (Satan) എന്ന എബ്രായ പദത്തിനു പ്രതിയോഗി അഥവാ എതിരാളി എന്നർത്ഥം. പഴയനിയമത്തിലെ എട്ടു പുസ്തകങ്ങളിൽ 27 പ്രാവശ്യം പ്രതിയോഗി, ദ്രോഹി, എതിരാളി, സാത്താൻ എന്നിങ്ങനെ വിവിധനാമങ്ങളിൽ ആൾ പരാമൃഷ്ടനാണ്. പുതിയനിയമത്തിൽ സാറ്റനൊസ് (Satanas) എന്ന ഗ്രീക്കുപദം 36 പ്രാവശ്യവും, ഡയബൊലൊസ് (diabolos) 38 പ്രാവശ്യവുമുണ്ട്. പുതിയനിയമ എഴുത്തുകാർ എല്ലാരുംതന്നെ സാത്താനെക്കുറിച്ചു പ്രത്യക്ഷമായോ പരോക്ഷമായോ പ്രസ്താവിച്ചിട്ടുണ്ട്. പുതിയനിയമത്തിലെ 20 പുസ്തകങ്ങളിൽ സാത്താൻ പ്രസ്തുതനാണ്. പ്രതിയോഗി എന്ന സാമാന്യാർത്ഥത്തിൽ സാത്താൻ എന്ന പദം പ്രയോഗിച്ചിട്ടുള്ളതിന് ഉദാഹരണമാണ് ‘യഹോവ ഏദോമ്യനായ ഹദദ് എന്ന ഒരു പ്രതിയോഗിയെ (സാത്താനെ) ശലോമോന്റെ നേരെ എഴുന്നേല്പിച്ചു.’ (1രാജാ, 11:14). ‘എതിരാളി അവന്റെ വലത്തു ഭാഗത്തു നില്ക്കട്ടെ’ (സങ്കീ, 109:6) എന്ന ഭാഗത്ത് ‘എതിരാളി’ക്ക് എബ്രായയിൽ സാത്താൻ ആണ്. സാത്താൻ വലത്തുഭാഗത്തു നില്ക്കുന്നതു അനർത്ഥം തന്നെയാണ്. മഹാപുരോഹിതനായ യോശുവയെ എതിർക്കാൻ സാത്താൻ വലത്തുവശത്താണ് നിന്നത്. (സെഖ, 3:1). ദൈവപുത്രന്മാരോടൊപ്പം സാത്താൻ ദൈവമുമ്പാകെ നിൽക്കുന്നതായി ഇയ്യോബിന്റെ ആദ്യത്തെ രണ്ടദ്ധ്യായങ്ങളിൽ കാണാം. ഇയ്യോബിന്റെ നേർക്ക് സാത്താൻ ശത്രുതയോടെ പെരുമാറി. യിസ്രായേൽ ജനത്തെ എണ്ണുവാൻ സാത്താൻ ദാവീദിനെ പ്രേരിപ്പിച്ചു. (1ദിന, 21:1).

സാത്താൻ വിവിധ പേരുകൾ: 

1. അഗാധദൂതൻ (വെളി, 9:11)

2. അപവാദി (വെളി, 12:10) 

3. അബദ്ദോൻ (വെളി, 9:11) 

4. അരുണോദയപുത്രനായ ശുക്രൻ (യെശ, 14:12)

5. ആകാശത്തിലെ അധികാരത്തിനു അധിപതി. (എഫെ, 2:2) 

6. ഈ ലോകത്തിന്റെ ദൈവം (2കൊരി, 4:4)

7. ഈ ലോകത്തിന്റെ പ്രഭു (യോഹ, 12:31) 

8. ദുഷ്ടൻ (യോഹ, 17:15)  

9. പരീക്ഷകൻ (മത്താ, 4:3). 

10. പഴയപാമ്പ് (വെളി, 12:9)

11. പിശാച് (ലൂക്കൊ, 4:3)

12. ബെയെത്സബൂൽ (മത്താ, 12:24) 

13. ഭോഷ്കിന്റെ അപ്പൻ (യോഹ, 8:44) 

14. ഭൂതങ്ങളുടെ തലവൻ (മത്താ, 12:24) 

15. മഹാസർപ്പം (വെളി, 12:3) 

16. സർപ്പം (2കൊരി, 11:3) 

സാത്താനെക്കുറിച്ചുള്ള വ്യക്തമായ വിവരണം നമുക്കു ലഭിക്കുന്നത് പുതിയനിയമത്തിൽ നിന്നാണ്. യേശുവിന്റെ ശുശ്രൂഷയുടെ തുടക്കത്തിൽ സാത്താൻ യേശുവിനെ പരീക്ഷിച്ചു. (മത്താ, 4:1-11;ലൂക്കൊ, 4:1:13; മർക്കൊ, 1:13). അതിനു ശേഷം ഒരു കാലത്തേക്കു പിശാച് യേശുവിനെ വിട്ടുപോയി. പിശാചിന്റെ പ്രവൃത്തികളെ നശിപ്പിക്കാനാണ് യേശു ലോകത്തിൽ വന്നത്. (1യോഹ . 3:8; എബ്രാ, 2:14). പാപം ഒഴികെ സർവ്വത്തിലും യേശു നമുക്കു തുല്യമായി പരീക്ഷിക്കപ്പെട്ടു. (എബ്രാ, 4:15). ദൈവത്തോടും ദൈവജനത്തോടും നിരന്തരം സംഘട്ടനത്തിലാണ് സാത്താനും അവനോടൊപ്പമുള്ള ദുഷ്ടാത്മശക്തികളും. അവനു അധികാരം ലഭിച്ചതാണ്. (ലൂക്കൊ, 4:6). ദൈവം വച്ചിട്ടുള്ള പരിധിയിൽനിന്നു മാത്രമേ അവനു പ്രവർത്തിക്കുവാൻ കഴിയുകയുള്ളൂ. (ഇയ്യോ, 1:12; 2:6; 1കൊരി, 10:13; വെളി, 20:2, 7). സാത്താനും അവന്റെ ദൂതന്മാർക്കും വേണ്ടി ഒരുക്കിയിട്ടുള്ളതാണ് നിത്യാഗ്നി അഥവാ അഗ്നിനരകം. (മത്താ, 25:41). പിശാചിനെ ഗന്ധകത്തീപ്പൊയ്കയിൽ തള്ളിയിടും. (വെളി, 20:10). ഈ ലോകത്തിന്റെ പ്രഭുവിനെ പുറത്ത് തള്ളിക്കളയുമെന്നും (യോഹ, 12:31) ഈ ലോകത്തിന്റെ പ്രഭു വിധിക്കപ്പെട്ടു എന്നും (യോഹ, 16:11) യേശു പ്രസ്താവിച്ചു. 

ആരെയാണ് വിഴുങ്ങേണ്ടത് എന്നന്വേഷിച്ചുകൊണ്ട് അലറുന്ന സിംഹം പോലെ പിശാച് ചുറ്റിത്തിരിയുന്നു. (1പത്രൊ, 5:8). സാത്താൻ വെളിച്ചദൂതന്റെ വേഷം ധരിക്കുന്നു. (2കൊരി, 11:14). പിശാചിന്റെ തന്ത്രങ്ങളോടു എതിർത്തു നിൽക്കേണ്ടതിനു ദൈവത്തിന്റെ സർവ്വായുധവർഗ്ഗം ധരിക്കുവാൻ പൗലൊസ് എഫെസ്യരെ ഉപദേശിച്ചു. (6:11). പിശാചിനോടു എതിർത്തുനില്പിൻ എന്നാൽ അവൻ നിങ്ങളെ വിട്ടു ഓടിപ്പോകും എന്നു യാക്കോബ് വ്യക്തമാക്കി. (4:7). “ദൈവം വിശ്വസ്തൻ; നിങ്ങൾക്കു കഴിയുന്നതിന്നു മീതെ പരീക്ഷ നേരിടുവാൻ സമ്മതിക്കാതെ നിങ്ങൾക്കു സഹിക്കാൻ കഴിയേണ്ടതിന്നു പരീക്ഷയോടു കൂടെ അവൻ പോക്കുവഴിയും ഉണ്ടാക്കും” എന്നു പൗലൊസ് അപ്പൊസ്തലൻ ഉറപ്പു നല്കുന്നു. (1കൊരി, 10:13). 

സാത്താൻ സുവിശേഷത്തെ നിരന്തരം എതിർക്കുന്നു. അവൻ പത്രൊസിൽ കടന്ന് ക്രിസ്തുവിന്റെ ക്രൂശീകരണത്തെ പരാജയപ്പെടുത്തുവാൻ ശ്രമിച്ചു. (മത്താ, 16:23). സാത്താൻ പാറ്റികളയാതിരിക്കേണ്ടതിനു പത്രൊസിനു വേണ്ടി യേശു അപേക്ഷിച്ചു . സാത്താൻ യൂദയിൽ പ്രവേശിച്ചു യേശുവിനെ കാണിച്ചുകൊടുക്കാൻ പ്രേരിപ്പിച്ചു. (ലൂക്കൊ, 22:3; യോഹ, 13:2,27). നാമമാത്രവിശ്വാസികളിൽ സാത്താൻ ശക്തിയായി പ്രവർത്തിക്കുന്നുണ്ട്. ‘സാത്താൻ നിന്റെ ഹൃദയം കൈവശമാക്കിയതു എന്തു’ എന്നാണ് അനന്യാസിനോടു പതൊസ് ചോദിച്ചത്. (പ്രവൃ, 5:3). എലീമാസിനെ പൗലൊസ് വിളിച്ചത് ‘പിശാചിന്റെ മകനേ’ എന്നാണ്. (പ്രവൃ, 13:10). നീതി പ്രവർത്തിക്കാത്തവനും സഹോദരനെ സ്നേഹിക്കാത്തവനും പിശാചിന്റെ മകനാണ്. (1യോഹ, 3:10; യോഹ, 8:44). മനുഷ്യഹൃദയത്തിൽ വിതയ്ക്കപ്പെട്ട വചനം അവൻ എടുത്തു കളയുന്നു. (മർക്കൊ, 4:15). സാത്താന്റെ പ്രവർത്തനം മൂലം ശാരീരികമായ രോഗങ്ങളും മറ്റും ഉണ്ടാകുന്നു. (ലൂക്കൊ, 13:16). 

സാത്താന്നു ഏല്പിക്കുക: ‘ദുഷ്ടപ്രവൃത്തി ചെയ്തവനെ ജഡസംഹാരത്തിനായി സാത്താനെ ഏല്പിക്കുവാൻ’ (1കൊരി, 5:5) അപ്പൊസ്തലൻ ആവശ്യപ്പെടുന്നു സഭയിൽ നിന്നും മുടക്കുകയാണ് സാത്താനെ ഏല്പിക്കുക. (1തിമൊ, 1:20). സഭയിൽ നിന്നു പുറത്താക്കപ്പെട്ട വ്യക്തി ലോകത്തിൻ്റെ ദൈവവും അധിപതിയുമായവൻ്റെ കയ്യിൽ ചെന്നുപെടുന്നു. ലോകത്തിന്റെ അധിപതി സാത്താനാണ്. (2കൊരി, 4:4). സർവ്വലോകവും ദുഷ്ടന്റെ അധീനതയിൽ കിടക്കുന്നു. (1യോഹ, 5:19).

സർഗ്ഗോൻ (Sargon)

പേരിനർത്ഥം – സൂര്യൻ്റെ പ്രഭു

അശ്ശൂർ രാജാവ് (722-705 ബി.സി). സർഗ്ഗോന്റെ പേർ ബൈബിളിൽ പറഞ്ഞിട്ടുള്ളത് യെശയ്യാവ് 20:1-ൽ മാത്രമാണ്. മുൻഗാമിയായ ശല്മനേസ്സർ അഞ്ചാമൻ ബി.സി. 724-ൽ ശമര്യയെ നിരോധിച്ചു. ഈ നിരോധനകാലത്ത് ശല്മനേസ്സർ മരിച്ചു. ബി.സി. 721-ൽ സർഗ്ഗോൻ ശമര്യ പിടിച്ചു. എന്നാൽ ശമര്യയുടെ പതനവുമായി ബന്ധപ്പെടുത്തി സർഗ്ഗോന്റെ പേർ ബൈബിളിൽ പറഞ്ഞിട്ടില്ല. (2രാജാ, 17:1-6). ശമര്യയുടെ പതനത്തിനു ശേഷമാണ് സർഗ്ഗോൻ രാജാവായതെന്നു വിശ്വസിക്കുന്നവരുണ്ട്. സർഗ്ഗോൻ രാജാവായ ഉടൻതന്നെ ഏലാമ്യരുടെ സഹായത്തോടുകൂടി ബാബിലോന്യർ അശ്ശൂരിനെതിരെ മത്സരിച്ചു. അവരെ സർഗ്ഗോൻ കീഴടക്കി. ഗസ്സയെ സഹായിക്കാനെത്തിയ മിസ്രയീം രാജാവ് സോയെ സർഗ്ഗാൻ പരാജയപ്പെടുത്തി. (2രാജാ, 17:4). ഹിത്യരുടെ മഹാനഗരമായ കർക്കെമീശിനെ ബി.സി. 717-ൽ സർഗ്ഗോൻ പിടിച്ചു. യെഹൂദാ അശ്ശൂരിനെതിരെ മത്സരിച്ചു. യെഹൂദയെ കീഴടക്കി എന്നു സർഗ്ഗോൻ അവകാശപ്പെടുന്നെങ്കിലും പറയാവുന്ന ദോഷമൊന്നും യെഹൂദയ്ക്ക് സംഭവിച്ചില്ല. സർഗ്ഗോന്റെ പുത്രനായ സൻഹേരീബിനോടു ഹിസ്ക്കീയാരാജാവു മത്സരിച്ചുവല്ലോ. നീനെവേക്കു 16 കി.മീ വടക്കുകിഴക്കായി ഒരു പുതിയ കൊട്ടാരവും രാജകീയ നഗരവും പണിതു ദുർ-ഷറ്റുകിൻ എന്നു പേരിട്ടു. ബി.സി. 705-ൽ സർഗ്ഗോൻ വധിക്കപ്പെട്ടു. തുടർന്നു പുത്രനായ സൻഹേരീബ് രാജാവായി.

സക്കായി (Zacchaeus)

പേരിനർത്ഥം – കപടമില്ലാത്ത

ചുങ്കക്കാരിൽ പ്രമാണിയും ധനവാനുമായി സക്കായി യെരീഹോവിൽ പാർത്തിരുന്നു. യേശുവിനെ കാണാനുള്ള താൽപര്യം നിമിത്തം വളർച്ചയിൽ കുറിയവനായ സക്കായി കാട്ടത്തിമേൽ കയറി. യേശു ആ സ്ഥലത്തെത്തിയപ്പോൾ മേലോട്ടുനോക്കി സക്കായിയെ പേർ പറഞ്ഞു വിളിച്ചു, താൻ അവനോടു കൂടെ പാർക്കുന്നു എന്നറിയിച്ചു. സഹായിക്കു സന്തോഷം അടക്കാൻ കഴിഞ്ഞില്ല. അവൻ ബദ്ധപ്പെട്ടു ഇറങ്ങി യേശുവിനെ സ്വീകരിച്ചു. അന്യായമായി കരം ഈടാക്കിയിരുന്ന സക്കായിയെ ജനങ്ങൾ പാപി എന്നു മുദ്രയടിച്ചു വെറുത്തിരുന്നു. പുരുഷാരത്തിനു മുന്നിൽ തന്നെ പേരു വിളിച്ചു അംഗീകരിച്ച യേശുവിന്റെ മുന്നിൽ അവൻ വാസ്തവമായി പശ്ചാത്തപിച്ചു. ന്യായപ്രമാണം ആവശ്യപ്പെട്ടതിലേറെ പ്രായശ്ചിത്തം ചെയ്യാമെന്ന് അവൻ ഏറ്റുപറഞ്ഞു. (സംഖ്യാ, 5:6,7). ഇവനും അബ്രാഹാമിന്റെ മകൻ ആകയാൽ ഇന്നു ഈ വീടിന്നു രക്ഷവന്നു എന്നു യേശു പറഞ്ഞു. (ലൂക്കൊ, 19:1-10).

സൻബല്ലത്ത് (Sanballat)

പേരിനർത്ഥം – സീൻ (ചന്ദ്രദേവൻ) ജീവൻ നല്കി

ബാബിലോന്യ നാമമാണിത്. യെരൂശലേമിനു 29 കി.മീറ്റർ വടക്കുപടിഞ്ഞാറുള്ള ബേത്ത്-ഹോരോനിൽ നിന്നുള്ളവനായിരിക്കണം. (യോശു, 10:10). സൻബല്ലത്തിനെ ഹോരോന്യൻ എന്നു പറഞ്ഞിരിക്കുന്നു. (നെഹെ, 2:10,19; 13:28). യെരൂശലേം മതിൽ പുതുക്കിപ്പണിയാനുള്ള നെഹെമ്യാവിന്റെ ശ്രമങ്ങളെ സൻബല്ലത്ത് ആവോളം എതിർത്തു. (നെഹെ, 4:1). ദുർബ്ബലരായ യെഹൂദന്മാർക്കു അതിനു കഴിവില്ല എന്നു പറഞ്ഞ് യെഹൂദന്മാരെ നിന്ദിച്ചു. (നെഹെ, 2:19; 4:3). യുദ്ധം ചെയ്യേണ്ടതിനും കലക്കം വരുത്തേണ്ടതിനും കൂട്ടുകെട്ടുണ്ടാക്കി. (നെഹെ, 4:8). നെഹെമ്യാവിനെ ചതിയിൽ വധിക്കുവാനായി ഓനോ സമഭൂമിയിൽ യോഗം കൂടുവാൻ നെഹെമ്യാവിനെ ക്ഷണിച്ചു. (നെഹെ, 6:2). നെഹെമ്യാവ് തന്ത്രം മനസ്സിലാക്കി വന്നില്ല. തുടർന്നു നെഹെമ്യാവിനെ ഭയപ്പെടുത്തുവാൻ ശ്രമിച്ചു. (നെഹെ, 6:5-14). യെഹൂദന്മാരുടെ ഇടയിൽ സ്വാധീനം ലഭിക്കുവാൻ സൻബല്ലത്ത് തന്റെ മകളെ മഹാപുരോഹിതനായ എല്യാശീബിന്റെ മകനു വിവാഹം കഴിച്ചു കൊടുത്തു. (നെഹെ, 13:28). എല്യാശീബ് തോബീയാവിന്റെ ബന്ധുവായിരുന്നു. (നെഹെ, 13:4). നെഹെമ്യാവ് സൻബല്ലത്തിന്റെ മരുമകനെ ഓടിച്ചുകളഞ്ഞു; തോബീയാവിന്റെ വീട്ടുസാമാനമൊക്കെയും അറയിൽ നിന്നു പുറത്തെറിഞ്ഞു കളഞ്ഞു. (നെഹെ, 13:8). പത്തൊമ്പതാം നൂറ്റാണ്ടിന്റെ അന്ത്യത്തിൽ ഈജിപ്റ്റിൽ നിന്നു കണ്ടെടുത്ത ചില പാപ്പിറസ് എഴുത്തുകളിൽ സൻബല്ലത്തിന്റെ പേര് കാണുന്നുണ്ട്. അയാൾ ശമര്യയിലെ ദേശാധിപതി ആയിരുന്നു.

സൻഹേരീബ് (Sennacherib)

പേരിനർത്ഥം – സീൻ (ചന്ദ്രദേവൻ) സഹോദരന്മാരെ വർദ്ധിപ്പിച്ചു

അശ്ശൂർ രാജാവ് (ബി.സി. 705-681). പിതാവിന്റെ വധത്തിനുശേഷം എതിർപ്പുകളെ അതിജീവിച്ച് രാജാവായി. ഇക്കാലത്തായിരിക്കണം ബെരോദാക്-ബലദാൻ എന്ന ബാബേൽ രാജാവ് ഹിസ്കീയാരാജാവിനു എഴുത്തും സമ്മാനവും കൊടുത്തയച്ചത്. (2രാജാ, 20:12-19; യെശ, 39). ടൈഗ്രീസ് നദിയുടെ കിഴക്കെ കരയിലുള്ള നീനെവേ തലസ്ഥാനമാക്കി കൊട്ടാരങ്ങളും ക്ഷേത്രങ്ങളും നഗരമതിലുകളും അദ്ദേഹം നിർമ്മിച്ചു. സൻഹേരീബ് ഒരു നല്ല യോദ്ധാവായിരുന്നു. രാജ്യത്തിലുടനീളം വിപ്ലവങ്ങളെ അമർച്ച ചെയ്തു. ബി.സി. 689-ൽ ബാബിലോണിനെ നശിപ്പിച്ചു. യെഹൂദയിലെ ഹിസ്കീയാരാജാവും സൻഹേരീബിനെതിരെ മത്സരിച്ചവരിൽ ഉണ്ടായിരുന്നു. സീദോൻ കീഴടക്കിക്കൊണ്ട് അദ്ദേഹം തെക്കോട്ടു തിരിച്ചു. അസ്കലോൻ, ബേത്-ദാഗോൻ, യോപ്പ എന്നിവയും പല പലസ്തീൻ പട്ടണങ്ങളും അദ്ദേഹം പിടിച്ചടക്കി. എൽതെക്കേയിൽ വെച്ച് പലസ്തീന്റെയും ഈജിപ്റ്റിന്റെയും സഖ്യസൈന്യത്തെ പരാജയപ്പെടുത്തി. സൻഹേരീബുമായി സഖ്യത്തിലായിരുന്ന എക്രോൻ രാജാവിനെ ഹിസ്കീയാവ് ബദ്ധനാക്കിയിരുന്നു. സൻഹേരീബ് എക്രോൻ പിടിച്ചെടുത്ത് അതിന്റെ രാജാവിനു മടക്കിക്കൊടുത്തു. യെരൂശലേമിനെ കീഴടക്കിയില്ലെങ്കിലും ഹിസ്കീയാരാജാവിനെ കൂട്ടിലെ പക്ഷിയെന്നപോലെ അടച്ചിട്ടതായി സൻഹേരീബ് അഭിമാനിച്ചു. ഈ ആക്രമണത്തിന്റെ മൂന്നു രേഖകൾ പഴയനിയമത്തിലുണ്ട്. (2രാജാ, 18:13-19:17; 2ദിന, 32:1-22; യെശ, 36:1-37:38).

ഹിസ്കീയാവ് രാജാവിന്റെ വാഴ്ചയുടെ പതിനാലാമാണ്ടിൽ സൻഹേരീബ് യെഹൂദയ്ക്കെതിരെ വന്നു അതിന്റെ ഉറപ്പുള്ള പട്ടണങ്ങളെല്ലാം പിടിച്ചു. ഹിസ്കീയാവ് രാജാവ് കപ്പം കൊടുക്കാമെന്ന് ഏറ്റു. ദൈവാലയ ഭണ്ഡാരത്തിൽ നിന്നും എടുത്തായിരുന്നു കപ്പം കൊടുത്തത്. അന്ത്യശാസനം നല്കുന്നതിനു സൻഹേരീബ് തന്റെ ഉദ്യോഗസ്ഥന്മാരെ അയച്ചു. ഇക്കാലത്ത് അദ്ദേഹം ലാഖീശ് പിടിച്ചു ലിബ്നയ്ക്കെതിരെ തിരിയുകയായിരുന്നു. യെഹൂദാ രാജാവ് തനിക്കെതിരെ വരുന്നു എന്ന് അറിഞ്ഞപ്പോൾ സൻഹേരീബ് വീണ്ടും ഒരു സന്ദേശം ഹിസ്കീയാവിനു അയച്ചു. ഹിസ്കീയാവ് ഇക്കാര്യം പ്രാർത്ഥനയിൽ വെച്ചു. യെശയ്യാ പ്രവാചകൻ ദൈവിക വിടുതലിന്റെ ഉറപ്പുനല്കി. ദൈവം തന്റെ ദൂതനെ അയച്ച് അശ്ശൂർ സൈന്യത്തെ സംഹരിച്ചു. സൻഹേരീബ് സ്വന്തം നാട്ടിലേക്കു മടങ്ങി. (2രാജാ, 19:35,36; 2ദിന, 32:21; യെശ, 37:36,37). നീനെവേയിലേക്ക് മടങ്ങിവന്ന സൻഹേരീബിനെ രണ്ടുപുത്രന്മാർ കൊന്നു. (2രാജാ, 19:37; യെശ, 37:38). ഇളയപുത്രനായ ഏസെർ-ഹദോനെ രാജാവാക്കാൻ സൻഹേരീബ് തീരുമാനിച്ചതായിരുന്നു കാരണം. സൻഹേരീബിനെ കൊന്ന പുത്രന്മാരായ അദ്രമേലെക്കും ശരേസെരും അരാരാത്ത് ദേശത്തിലേക്കു ഓടിപ്പോയി. ഏസെർ-ഹദ്ദോൻ രാജാവായി.

ശെഖേം (Shechem)

പേരിനർത്ഥം – തോൾ

ഹമോരിന്റെ മകൻ. (ഉല്പ, 33:19). യാക്കോബ് ഹമോരിനോടു സ്ഥലം വാങ്ങി യാഗപീഠം പണിതു. അതിനു ഏൽ-എലോഹേ-യിസ്രായേൽ എന്നു പേരിട്ടു. (ഉല്പ, 33:19,20). ശെഖേം യാക്കോബിന്റെ മകളായ ദീനയെ പിടിച്ചു കൊണ്ടുപോയി അവളോടു കൂടെ ശയിച്ചു. അവന്റെ ഹൃദയം ദീനയിൽ രമിക്കുകകൊണ്ട് പിതാവിനെ യാക്കോബിന്റെ അടുക്കൽ അയച്ചു വിവാഹാഭ്യർത്ഥന നടത്തി. ശെഖേമ്യർ പരിച്ഛേദനം ഏല്ക്കണമെന്ന വ്യവസ്ഥയിൽ യാക്കോബ് ദീനയെ വിവാഹം ചെയ്തു കൊടുക്കാമെന്നു സമ്മതിച്ചു. ശെഖേമ്യർ പരിച്ഛേദനം ഏറ്റു വേദന അനുഭവിച്ചു കൊണ്ടിരിക്കുമ്പോൾ ശിമെയോനും ലേവിയും പട്ടണത്തിൽ ചെന്നു പുരുഷന്മാരെയൊക്കെയും കൊന്നുകളഞ്ഞു. ഹമോരും ശെഖേമും വധിക്കപ്പെട്ടു. (ഉല്പ, 34;1-26; ന്യായാ, 9:28; പ്രവൃ, 7:16).

ശേം (Shem)

പേരിനർത്ഥം – പേര്

നോഹയുടെ മൂന്നു പുത്രൻമാരിലൊരാൾ. (ഉല്പ, 5:32). നോഹയ്ക്ക് 500 വയസ്സായശേഷമാണ് മക്കൾ ജനിച്ചതാ. നോഹയോടൊപ്പം ഭാര്യയും പുത്രന്മാരും പുത്രഭാര്യമാരും ജീവരക്ഷയ്ക്കായി പെട്ടകത്തിൽ പ്രവേശിച്ചു. (ഉല്പ, 7:7). ജലപ്രളയത്തിനുശേഷം താൻ നട്ടുവളർത്തിയ മുന്തിരിയിൽ നിന്നുഉള വീഞ്ഞുകുടിച്ചു നോഹ നഗ്നനായി കിടന്നു. ഇളയ മകനായ ഹാം പിതാവിന്റെ നഗ്നത മറയ്ക്കുവാൻ കൂട്ടാക്കിയില്ല. പിതാവിന്റെ നഗ്നത മറയ്ക്കുന്നതിനു ശേം യാഫെത്തിനെ സഹായിച്ചു. നോഹ ഹാമിനെ ശപിക്കുകയും ശേമിനെയും യാഫെത്തിനെയും അനുഗ്രഹിക്കുകയും ചെയ്തു. (ഉല്പ, 9:21-27). ജലപ്രളയത്തിനു രണ്ടു വർഷം കഴിഞ്ഞ് ശേമിനു 100 വയസ്സുള്ളപ്പോൾ അർപ്പക്ഷാദ് ജനിച്ചു; അനന്തരം മറ്റു മക്കളും. (ഉല്പ, 11:10,11; 10:22). ശേമിന്റെ ആയുഷ്ക്കാലം 600 വർഷം. (ഉല്പ, 11:11). ശേം യാഫെത്തിന്റെയും ജ്യേഷ്ഠനാണെന്നു ഉല്പത്തി 10:21 വ്യക്തമാക്കുന്നു. എന്നാൽ യാഫെത്തിന്റെ ജ്യേഷഷ്ഠത്വത്തെക്കുറിച്ചു വാദിക്കുന്നവർ അനേകരാണ്. അബ്രാഹാമും യേശുക്രിസ്തുവും ശേമിന്റെ വംശപാരമ്പര്യത്തിലാണ് ജനിച്ചത്. ശേമിന്റെ സന്തതികൾ കുടിപാർത്ത പ്രദേശങ്ങളുടെ വിവരണം ഉല്പത്തി 10:21-31-ലുണ്ട്. അതു മെഡിറ്ററേനിയൻ സമുദ്രം മുതൽ ഇൻഡ്യാ മഹാസമുദ്രം വരെ വ്യാപിച്ചു കിടക്കുന്നു.

ശേത്ത് (Seth)

പേരിനർത്ഥം – നിയമിച്ചു

ആദാമിന്റെ മൂന്നാമത്തെ മകൻ. ആദാമിനു 130 വയസ്സുള്ളപ്പോഴാണ് ശേത്ത് ജനിച്ചത്. ആദാം തന്റെ ഭാര്യയെ പിന്നെയും പരിഗ്രഹിച്ചു; അവൾ ഒരു മകനെ പ്രസവിച്ചു: കയീൻ കൊന്ന ഹാബെലിന്നു പകരം ദൈവം എനിക്കു മറ്റൊരു സന്തതിയെ തന്നു എന്നു പറഞ്ഞു അവന്നു ശേത്ത് എന്നു പേരിട്ടു.” (ഉല്പ, 4:25). ശേത്തിനു 105 വയസ്സുള്ളപ്പോൾ ഏനോശ് ജനിച്ചു. ശേത്തിന്റെ ആയുഷ്ക്കാലം 912 സംവത്സരമായിരുന്നു. (ഉല്പ, 4:25,26; 5:3-8; 1ദിന, 1:1; ലൂക്കൊ, 3:38).

ശിമ്യോൻ (Simeon)

പേരിനർത്ഥം – കേട്ടു

മശീഹയെ കാണുന്നതിനു മുമ്പ് മരണം കാണുകയില്ലെന്നു പരിശുദ്ധാത്മാവിനാൽ അരുളപ്പാടു ലഭിച്ച മനുഷ്യൻ. ഇയാൾ നീതിമാനും യിസ്രായേലിന്റെ ആശ്വാസത്തിനു വേണ്ടി കാത്തിരുന്നവനും ആയിരുന്നു. ശിശുവായ യേശുവിനെ ദൈവാലയത്തിൽ പ്രതിഷ്ഠിക്കുവാൻ കൊണ്ടുവന്നപ്പോൾ പൈതലിനെ കൈകളിലെടുത്തു ദൈവത്തെ വാഴ്ത്തി: “ഇപ്പോൾ നാഥാ തിരുവചനം പോലെ നീ അടിയനെ സമാധാനത്തോടെ വിട്ടയക്കുന്നു. ജാതികൾക്കു വെളിപ്പെടുവാനുള്ള പ്രകാശവും നിന്റെ ജനമായ യിസ്രായേലിന്റെ മഹത്വവുമായി നീ സകല ജാതികളുടെയും മുമ്പിൽ ഒരുക്കിയിരിക്കുന്ന നിന്റെ രക്ഷയെ എന്റെ കണ്ണു കണ്ടുവല്ലോ’ എന്നു പറഞ്ഞു. (ലൂക്കൊ, 2:25-35).