റിബെക്കാ (Rebekah)

പേരിനർത്ഥം — പാശം

അബ്രാഹാമിന്റെ സഹോദരനായിരുന്ന നാഹോരിന്റെ പുത്രനായ ബെഥൂവേലിന്റെ പുത്രിയും, ലാബാന്റെ സഹോദരിയും യിസഹാക്കിന്റെ ഭാര്യയും. (ഉല്പ, 29:15). യിസ്ഹാക്കിനു ഒരു ഭാര്യയെ എടുക്കുവാൻ അബ്രാഹാം തന്റെ ദാസനായ എല്യേസറിനെ സ്വന്തദേശത്തേക്കു അയച്ചു. അവൻ റിബെക്കായെ കണ്ടുമുട്ടുകയും അവളുടെ ഭവനക്കാരുമായി സംസാരിച്ച് കാര്യങ്ങൾ ഉറപ്പിക്കുകയും ചെയ്തു. എല്യേസറിനോടൊപ്പം അബാഹാമിന്റെ ഭവനത്തിലെത്തിയ റിബെക്കാ യിസ്ഹാക്കിനു ഭാര്യയായി. വിവാഹശേഷം പത്തൊൻപതു വർഷത്തോളം റിബെക്ക മച്ചിയായിരുന്നു. റിബെക്കയ്ക്കു വേണ്ടി യിസ്ഹാക്ക് ദൈവത്തോട് അപേക്ഷിച്ചു. പ്രാർത്ഥനയ്ക്ക് ഉത്തരമായി അവൾക്കു ഒരേ പ്രസവത്തിൽ ഇരട്ട കുഞ്ഞുങ്ങളെ നല്കി. അവരിൽ ഏശാവ് മൂത്തവനും യാക്കോബ് ഇളയവനുമായിരുന്നു. മൂത്തവൻ ഇളയവനെ സേവിക്കാമെന്നു ദൈവം റിബെക്കായാടു അരുളിച്ചെയ്തു. (ഉല്പ, 29:21-26). ഈ പ്രവചനത്തിന്റെ പ്രേരണകൊണ്ടാണോ എന്നറിയില്ല റിബെക്കാ യാക്കോബിനെ കൂടുതൽ സ്നേഹിച്ചു. കാഴ്ച നഷ്ടപ്പെട്ടുപോയ പിതാവിൽ നിന്നു ജ്യേഷ്ഠനുള്ള അനുഗ്രഹം തട്ടിയെടുക്കുവാൻ ഏശാവിന്റെ വേഷത്തിൽ യിസ്ഹാക്കിന്റെ അടുക്കൽ ചെല്ലുവാൻ യാക്കോബിനെ പ്രേരിപ്പിക്കുകയും സഹായിക്കുകയും ചെയ്തതു റിബെക്കായാണ്. (ഉല്പ, 21:1-30). ഇത് ഏശാവിനു യാക്കോബിനോടുള്ള വൈരത്തിനു കാരണമായി. ഇരുവർക്കും ഒരേവീട്ടിൽ ഒരുമിച്ചു പാർക്കാൻ കഴിയാത്ത സ്ഥിതിയിലായി. റിബെക്കായുടെ നിർദ്ദേശമനുസരിച്ചു യാക്കോബ് പദൻ-അരാമിൽ പോയി പാർത്തു. (ഉല്പ, 27:42-46). അതിനുശേഷം റിബെക്കാ യാക്കോബിനെ കണ്ടിട്ടില്ല. റിബെക്കാ മരിച്ചപ്പോൾ അവളെ മക്പേല ഗുഹയിൽ അടക്കി. (ഉല്പ, 49:31). 

റാഹേൽ (Rachel)

പേരിനർത്ഥം — പെണ്ണാട്

ലാബാന്റെ ഇളയ പുതിയും  യാക്കോബിന്റെ ഭാര്യയും. റാഹേലിന്റെ പുത്രന്മാരാണു യാസേഫും ബെന്യാമീനും. (ഉല്പ, 29:6,16,18,31, 30:1-9). യാക്കാബിന്റെ അമ്മയായ റിബക്കയുടെ സഹോദരനാണ് ലാബാൻ. (ഉല്പ, 28:2). ഏശാവിനെ വഞ്ചിച്ചു പിതാവിൻ്റെ അനുഗ്രഹം കൈക്കലാക്കിയതിനാൽ ഏശാവിന്റെ കാിനവിദ്വേഷത്തിനു യാക്കോബ് പാത്രമായി. എശാവിന്റെ ക്രോധം ശമിക്കുവോളം അല്പകാലം യാക്കോബ് സ്വഗൃഹത്തിൽ നിന്നകന്നു പദൻ-അരാമിൽ ലാബാനാടൊപ്പം കഴിയുന്നതു നല്ലതാണെന്നു റിബെക്കാ നിർദ്ദേശിച്ചു. (ഉല്പ, 27:43-45). പദൻ-അരാമിലെത്തിയ യാക്കോബ് റാഹേലിനെ കണ്ട് അവളിൽ അനുരക്തനായി, അവൾക്കുവേണ്ടി യാക്കോമ്ബ് ഏഴുവർഷം ലാബാനെ സേവിച്ചു. (ഉല്പ, 29:18). എന്നാൽ മൂത്തമകളായ ലേയയെയാണു യാക്കാബിനു ഭാര്യയായി നല്കിയതു. യാക്കോബ് റാഹേലിനുവേണ്ടി വീണ്ടും ഏഴുവർഷം ലാബാനെ സേവിച്ചു. (29:30). ലാബാന് ആൺമക്കൾ ഇല്ലായിരുന്നിരിക്കണം. അതിനാലാണ് ലേയയെയും റാഹേലിനെയും യാക്കോബിനു നല്കി കുടുംബത്തിന്റെ അവകാശിയായി ദത്തെടുത്തത്. എന്നാൽ പിന്നീട് ലാബാന് ആൺകുട്ടികൾ ജനിച്ചു. അതിനാലാണ് ‘യാക്കോബ് ലാബാന്റെ മുഖത്ത് നോക്കിയാറെ അതു തന്റെ നേരെ മുമ്പ് ഇരുന്നതുപോലെ അല്ല എന്നു കണ്ടതു’ (31:15). അപ്പന്റെ സമ്പത്തു മുഴുവൻ യാക്കോബ് അപഹരിച്ചുകളഞ്ഞു എന്നു ലാബാന്റെ പുത്രന്മാരും പറഞ്ഞു. (31:1). റാഹേൽ മച്ചിയായിരുന്നു. റാഹേൽ തൻ്റെ ദാസിയായ ബിൽഹയെ യാക്കോബിനു കൊടുക്കുകയും അവൾ ദാനിനെയും നഫ്താലിനെയും പ്രസവിക്കുകയും ചെയ്തു. അനന്തരം റാഹേൽ ഗർഭം ധരിച്ചു യോസേഫിനെ പ്രസവിച്ചു. (30:24). യാക്കോബം കടുംബവും സ്വന്തസ്ഥലത്തേക്കു മടങ്ങി. (31:22). ലാബാൻ ഗൃഹബിംബം റാഹേൽ മോഷ്ടിച്ചു കൊണ്ടുപോയിരുന്നു. ലാബാൻ പിന്നാലെ വന്നു അന്വേഷിച്ചുവെങ്കിലും ഗൃഹബിംബം കണ്ടെടുക്കുവാൻ കഴിഞ്ഞില്ല. (31:37). അവർ ബേഥേലിൽ നിന്ന് പുറപ്പെട്ടു എഫ്രാത്തയിൽ എത്താറായപ്പോൾ റാഹേൽ ബെന്യാമിനെ പ്രസവിച്ചു. ഉടനെതന്നെ റാഹേൽ മരിച്ചു. യാക്കോബ് അവളെ എഫ്രാത്തയിൽ അടക്കി. കല്ലറയിൽ ഒരു തൂണും നിർത്തി. (ഉല്പ, 35:19-20).

പുതിയനിയമത്തിൽ റാഹേലിനെക്കുറിച്ചു യിരെമ്യാ പ്രവാചകൻ്റെ ഒരു പ്രവചനമാണ് മത്തായി ചേർത്തിരിക്കുന്നത്; “യഹോവ ഇപ്രകാരം അരുളിച്ചെയ്യുന്നു: രാമയിൽ ഒരു ശബ്ദം കേൾക്കുന്നു! വിലാപവും കഠിനമായുള്ള കരച്ചിലും തന്നേ; റാഹേൽ തന്റെ മക്കളെക്കുറിച്ചു കരയുന്നു; അവർ ഇല്ലായ്കയാൽ അവരെച്ചൊല്ലി ആശ്വാസം കൈക്കൊൾവാൻ അവൾക്കു മനസ്സില്ല.” (യിരെ, 31:15, മത്താ, 2:17).

രോദാ (Rhoda)

പേരിനർത്ഥം — റോസ

മർക്കൊസിൻ്റെ അമ്മയായ മറിയയുടെ വീട്ടിലെ ബാല്യക്കാരത്തിയാണ് രോദാ. അവൾ പത്രൊസിൻ്റെ ശബ്ദം തിരിച്ചറിഞ്ഞു; പത്രൊസ് പടിപ്പുരയ്ക്കൽ നില്ക്കുന്ന വിവരം മറ്റുള്ളവരെ അറിയിച്ചു. (പ്രവൃ, 12:12-13).

രൂത്ത് ((Ruth)

പേരിനർത്ഥം — സഖി

രൂത്ത് എന്ന പുസ്തകത്തിലെ നായികയായ ഇവൾ ന്യായാധിപന്മാരുടെ കാലത്ത് ജീവിച്ചിരുന്നു. എലീമെലെക്കിൻ്റെയും നൊവൊമിയുടെയും മൂത്ത മകനായ മഹ്ലോൻ രൂത്തിനെ വിവാഹം കഴീച്ചു. എലീമെലെക്കും ഭാര്യ നൊവൊമിയും പുത്രന്മാരായ മഹ്ലോൻ, കില്യോൻ എന്നിവരുമായി ക്ഷാമം നിമിത്തം യെഹൂദ്യയിലെ ബേത്ലേഹേം വിട്ടു മോവാബിൽ പോയി പാർത്തു. അവിടെവെച്ച് പിതാവും ആൺമക്കളും മരിച്ചു. നൊവൊമി സ്വന്തസ്ഥലത്തേക്കു മടങ്ങിയപ്പോൾ മഹ്ലോൻ്റെ ഭാര്യയായ രൂത്ത് അവളോടു കൂടി നാട്ടിലേക്കു വന്നു. മോവാബിൽ താമസിച്ചുകൊള്ളുവാൻ നൊവൊമി ഉപദേശിച്ചു എങ്കിലും നൊവൊമിയുടെ ദൈവത്തെക്കുറിച്ചും, ജനത്തെക്കുറിച്ചുമുള്ള വലിയ കാഴ്ചപ്പാട് അവളെ നൊവൊമിയോടു കൂടി പോകുവാൻ പ്രേരിപ്പിച്ചു. (രൂത്ത്, 1:1-18) ബേത്ലേഹേമിൽ വന്നശേഷം യവക്കൊയ്ത്തിൻ്റെ കാലത്ത് എലീമേലെക്കിൻ്റെ ബന്ധുവും ധനവാനുമായ ബോവസിൻ്റെ വയലിൽ കതിർ പെറുക്കുവാൻ രൂത്ത് പോയി. അവളുടെ പരിശ്രമശീലവും സ്വഭാവഗുണവും ബോവസിനെ ആകർഷിച്ചു. നൊവൊമിയോടുള്ള അവളുടെ കൂറും കണ്ടിട്ട് കോയ്ത്തുകാരോടു കൂടെ ഭക്ഷിക്കുവാൻ ബോവസ് രൂത്തിനെ അനുവദിച്ചു. (രൂത്ത്, 2:1-14). കൊയ്ത്തിനുശേഷം മെതി തുടങ്ങിയപ്പോൾ നൊവൊമിയുടെ നിർദേശമനുസരിച്ചു രൂത്ത് രാത്രിയിൽ മെതിക്കളത്തിൽ ചെന്ന് സംരക്ഷണം ആവശ്യപ്പെട്ടു. പ്രഭാതമായപ്പോൾ ആറിടങ്ങഴി യവം നല്കി അവളെ മടക്കി അയച്ചു. (രൂത്ത്, 3:1-15). ദേവരവിവാഹ നിയമമനുസരിച്ചു അടുത്ത ചാർച്ചക്കാരൻ വിവാഹം കഴിച്ചില്ലെങ്കിൽ താൻ വിവാഹം ചെയ്യാമെന്ന് ബോവസ് വാക്കുകൊടുത്തു. ദേവരവിവാഹ ക്രമമനുസരിച്ചു രൂത്തിനെ സ്വീകരിക്കേണ്ട ചാർച്ചക്കാരൻ തന്റെ അവകാശം ഒഴിഞ്ഞു. ബോവസ് രൂത്തിനെ വിവാഹം ചെയ്തു. അവരുടെ ആദ്യപുത്രനായ ഓബേദ് ദാവീദിൻ്റെ വല്യപ്പനാണ്. (രൂത്ത്, 4:1-15). യേശുവിന്റെ വംശാവലിയിൽ പറഞ്ഞിട്ടുള്ള അഞ്ചു സ്ത്രീകളിൽ ഒരാളാണ് രൂത്ത്. (മത്താ, 1:5).

രാഹാബ് (Rahab)

പേരിനർത്ഥം — വിശാലം

യെരീഹോവിലെ പട്ടണമതിലിൽ പാർത്തിരുന്ന ഒരു വേശ്യ. യോശുവ ശിത്തീമിൽ നിന്ന് കനാനെ യെരീഹോ വരെ ഒറ്റുനോക്കാനായി രണ്ടുപേരെ അയച്ചു. അവർ രാഹാബിന്റെ വീട്ടിൽ പാർത്തു. ലിനൻ നിർമ്മിക്കുകയും ചായം മുക്കുകയും ചെയ്തിരുന്ന അവൾ യിസ്രായേലിന്റെ അത്ഭുതകരമായ പുരോഗതിയെക്കുറിച്ചു കേട്ടിരുന്നു. യഹോവ കനാൻ യിസ്രായേല്യർക്കു  കൊടുത്തിരിക്കയാണെന്നു അവൾ മനസ്സിലാക്കി. അതിനാൽ ഒറ്റുകാരെ വീട്ടിൻ മുകളിൽ കൊണ്ടുപോയി അവിടെ അടുക്കിവച്ചിരുന്ന ചണത്തണ്ടുകളുടെ ഇടയിൽ ഒളിപ്പിച്ചു. അവരെ പിടിക്കാൻ വന്ന ഉദ്യോഗസ്ഥന്മാരോടു നഗരവാതിൽ അടയ്ക്കുന്നതിനു മുമ്പു അവർ പോയി എന്നു പറഞ്ഞു. രാത്രിയിൽ ഈ വിവരം അവൾ അവരെ ധരിപ്പിച്ചു. യെരീഹോ നശിപ്പിക്കുമ്പോൾ തന്റെ കുടുംബത്ത അപകടം കൂടാതെ രക്ഷിക്കണമെന്നും അപ്രകാരം ചെയ്യുമെന്നുള്ളതിനു ഒരടയാളം നല്കണമെന്നും രാഹാബ് അപേക്ഷിച്ചു. അപ്രകാരം ചെയ്യാമെന്നു അവൾക്കു വാക്കുകൊടുത്തു. അവളുടെ വീടു തിരിച്ചറിയേണ്ടതിനു കിളിവാതിലിൽ ചുവപ്പുചരടു കെട്ടുകയായിരുന്നു അവർ നല്കിയ അടയാളം. അവൾ അവരെ കിളിവാതിൽ വഴി ഇറക്കിവിടുകയും രക്ഷപ്പെടേണ്ട മാർഗ്ഗം അവർക്കു ഉദേശിച്ചുകൊടുക്കുകയും ചെയ്തു. (യോശു, 2:1-24). ഇതിനു പ്രതിഫലമായി യെരീഹോ പട്ടണം പിടിച്ചടക്കിയപ്പോൾ യോശുവ രാഹാബിനെയും കുടുംബത്തെയും അപകടം കൂടാതെ രക്ഷിച്ചു. (യോശു, 6:17, 22-25). യേശുവിന്റെ വംശാവലിയിൽ ഉൾപ്പെട്ട അഞ്ചു സ്ത്രീകളിൽ ഒരുവൾ രാഹാബാണ്. (മത്താ, 1:5). ശല്മോന്റെ ഭാര്യയും ബോവസിന്റെ അമ്മയുമാണു രാഹാബ്. എബ്രായ ലേഖന കർത്താവു വിശ്വാസവീരന്മാരുടെ പട്ടികയിൽ രാഹാബിന്റെ  പേർ ഉൾപ്പെടുത്തി. (എബ്രാ, 11:31). ഇവളുടെ വിശ്വാസം പ്രവൃത്തിയിലൂടെ നീതീകരിക്കപ്പെട്ടു എന്ന് യാക്കോബും വ്യക്തമാക്കി. (യാക്കോ, 2:25). 

ആകെ സൂചനകൾ (2) — എബ്രായ, 11:31, യാക്കോ, 2:25.

യോഹന്ന (Joanna)

യോഹന്നാൻ എന്ന പേരിന്റെ സ്ത്രീലിംഗരൂപം. ഹെരോദാവ് അന്തിപ്പാസിൻ്റെ കാര്യവിചാരകനായിരുന്ന കൂസയുടെ ഭാര്യ. യേശുവിനെ ഗലീലയിൽനിന്ന് അനുഗമിച്ച സ്ത്രീകളുടെ കൂട്ടത്തിൽ യോഹന്നായും ഉണ്ടായിരുന്നു. (ലൂക്കോ, 8:1-3). പുനരുത്ഥാനദിവസം കല്ലറയ്ക്കൽ ചെന്നവരുടെ കൂട്ടത്തിലും യോഹന്ന ഉണ്ടായിരുന്നു. (ലൂക്കോ, 24:10).

ആകെ സൂചനകൾ (2) — ലൂക്കോ, 8:3, 24:10.

യൂലിയ (Julia) 

യൂലിയോസ് എന്ന പേരിന്റെ സ്ത്രീലിംഗരൂപമാണിത്. റോമാ സഭയിൽ ഈ പേരിൽ ഒരു വിശ്വാസിനി ഉണ്ടായിരുന്നു. അവർക്ക് ലേഖനമെഴുതുമ്പോൾ സകല വിശുദ്ധന്മാർക്കൊപ്പം ഈ സഹോദരിയുടേയും പേർപറഞ്ഞ് പൗലൊസ് വന്ദനം അറിയിക്കുന്നുണ്ട്. (റോമ, 16:15). ഈ വാക്യത്തിൽ പറയുന്ന ഫിലൊലൊഗൊസിൻ്റെ ഭാര്യയാണ് യൂലിയ എന്ന് ഒരു വിശ്വാസമുണ്ട്.

യൂനിക്ക (Eunice)

പേരിനർത്ഥം — സദ്വിജയം

തിമൊഥെയൊസിന്റെ അമ്മ. (2തിമൊ, 1:5). യെഹൂദസ്ത്രീയായ യുനീക്കയുടെ ഭർത്താവു ഒരു യവനൻ ആയിരുന്നു. (പ്രവൃ, 16:1). അപ്പൊസ്തലനായ പൗലൊസ് ഇവളുടെ വിശ്വാസത്തെ പുകഴ്ത്തുന്നു. ചെറുപ്രായത്തിൽ തന്നെ തിരുവെഴുത്തുകൾ നല്ലവണ്ണം പഠിക്കുവാൻ തിമൊഥയൊസിനെ സഹായിച്ചത് വിശ്വാസിനിയായ മാതാവായിരിക്കണം. (2തിമൊ, 3:15). പിതാവ് യവനൻ ആണെന്ന് യെഹൂദന്മാർക്കൊക്കെ അറിവുള്ളതുകൊണ്ടാണ് തിമൊഥയൊസിനെ പരിച്ഛേദനം കഴിപ്പിച്ചത്. (അപ്പൊ, 16:1-3). 

ആകെ സൂചനകൾ (2) — പ്രവൃ, 16:1, 2തിമൊ, 1:5.

യുവൊദ്യ (Euodias)

പേരിനർത്ഥം — സുഗന്ധി

ഫിലിപ്പിയ സഭയിലെ ഒരു വിശ്വാസിനി. ആ സഭയിലെ മറ്റൊരംഗമായ സുന്തുകയും യുവൊദ്യയും തന്നിൽ എന്തോ ഒരു പ്രശാനം ഉണ്ടായിരുന്നു. അവരെ ഏകമനസ്സോടിരിപ്പാൻ പൗലൊസ് ഉപദേശിച്ചു. സുവിശേഷ ഘോഷണത്തിൽ പൗലൊസിനൊപ്പം പോരാടിയവരാണ് യുവൊദ്യയും സുന്തുകയും. (ഫിലി, 4:2).

മാർത്ത (Martha)

പേരിനർത്ഥം — മാന്യവനിത

യേശുവിന്റെ സ്നേഹിതനായ ലാസറിൻ്റെയും, യേശുവിനെ തൈലം പൂശിയ മറിയയുടെയും സഹോദരി. (ലൂക്കോ, 10:38-42, യോഹ, 11:1-39, 12:1-8). ഒരു ആരാമ്യ ധാതുവിൽനിന്ന് നിഷ്പന്നമായ നാമമാണ് മാർത്ത. ലാസറും സഹോദരിമാരും, ഇവർ മൂന്നുപേരും ഒരു വീട്ടിലാണ് പാർത്തിരുന്നത്. മാർത്ത ആയിരിക്കണം ഗൃഹനാഥ രണ്ടു സഹോദരികളും അവിവാഹിതകൾ ആയിരുന്നവെന്ന് കരുതപ്പെടുന്നു. ഈ കുടുംബവുമായി യേശുവിനു ഹൃദ്യമായ ബന്ധം ഉണ്ടായിരുന്നു. യേശു മാർത്തയുടെ വീട്ടിൽ വന്നപ്പോൾ യേശുവിനെയും ശിഷ്യന്മാരെയും സൽക്കരിക്കുന്ന തിരക്കിലായിരുന്നു മാർത്ത. മറിയ യേശുവിന്റെ കാല്ക്കൽ ഇരുന്നു വചനം കേൾക്കുകയായിരുന്നു. മറിയയുടെ ഉദാസീനതയിൽ പ്രകോപിതയായ മാർത്ത യേശുവിനോടു പരാതിപ്പെട്ടു. “കർത്താവേ, എൻ്റെ സഹോദരി ശുശ്രൂഷയ്ക്ക് എന്നെ തനിച്ചു വിട്ടിരിക്കുന്നിതിൽ നിനക്കു വിചാരമില്ലയോ? എന്നെ സഹായിക്കാൻ അവളോടു കൽപ്പിച്ചാലും” (ലൂക്കൊ, 10:40) എന്നു പറഞ്ഞു. ‘മറിയ നല്ല അംശം തിരഞ്ഞെടുത്തു’ എന്നു യേശു മറിയയെ ശ്ലാഘിക്കുകയാണു ചെയ്തത്. ലാസർ ദീനമായി കിടന്നപ്പോൾ വിവരം യേശുവിനെ അറിയിച്ചു. യേശു ബേഥാന്യയിൽ എത്തിയപ്പോൾ ലാസർ മരിച്ചു നാലുദിവസം കഴിഞ്ഞിരുന്നു. യേശു വരുന്നു എന്നു കേട്ടപ്പോൾ മാർത്ത ചെന്നു അവനെ എതിരേറ്റു. യേശു അവിടെ ഉണ്ടായിരുന്നു എങ്കിൽ ലാസർ മരിക്കയില്ലായിരുന്നുവെന്നു അവൾ പറഞ്ഞു. ലാസറിനെ യേശു ഉയിർപ്പിക്കുമെന്നു മാർത്തയ്ക്കു വിശ്വസിക്കാൻ കഴിഞ്ഞില്ല. ലാസറിന്റെ വീട്ടിൽ വച്ചു നടന്ന വിരുന്നിൽ ‘മാർത്ത ശുശ്രൂഷ ചെയ്തു’ എന്ന പ്രസ്താവനയോടെ അവളുടെ ചരിത്രം പൂർണ്ണമാവുന്നു. (യോഹ, 12:2).

ആകെ സൂചനകൾ (12) — ലൂക്കോ, 10:38, 10:40, 10:41, യോഹ, 11:1, 11:5, 11:19, 11:20, 11:21, 11:24, 11:30, 11:39, 12:2.