ഒലുമ്പാസ് (Olympas)

പേരിനർത്ഥം – അതിമനോഹരം

റോമാ സഭയിലെ ഒരു ക്രിസ്ത്യാനി. പൗലൊസ് ഇയാൾക്ക് വന്ദനം ചൊല്ലുന്നു. “ഒലുമ്പാസിന്നും അവരോടുകൂടെയുള്ള സകല വിശുദ്ധന്മാർക്കും വന്ദനം ചൊല്ലുവിൻ.” (റോമ, 16:15).

ഒമ്രി (Omri)

പേരിനർത്ഥം — യഹോവയുടെ ശിഷ്യൻ

വിഭക്തയിസ്രായേലിലെ ആറാമത്തെ രാജാവ്. ഭരണകാലം ബി.സി. 885/84-874/73. ഒമ്രി യിസ്രായേൽ രാജാവായ ഏലയുടെ സേനാനായകനായിരുന്നു. ഗിബ്ബെഥോൻ നിരോധനത്തിൽ ഏർപ്പെട്ടിരിക്കുമ്പോൾ ഏലാരാജാവിന്റെ രഥനായകനായ സിമ്രി രാജാവിനെ വധിച്ച് അധികാരം കൈയടക്കി എന്നറിഞ്ഞു. ഉടൻ തന്നെ സൈന്യം പാളയത്തിൽ വെച്ചു ഒമ്രിയെ രാജാവായി വാഴിച്ചു. ഒമ്രി സൈന്യവുമായി ചെന്ന് തിർസ്സയെ നിരോധിച്ചു. പട്ടണം പിടിക്കപ്പെട്ടു എന്നു മനസ്സിലാക്കിയ സിമ്രി ഉൾമുറിയിൽ പ്രവേശിച്ചു രാജധാനിക്കു തീ വെച്ചു ആത്മഹത്യ ചെയ്തു. (1രാജാ, 16:15-18). യിസ്രായേൽ ജനം രണ്ടു പക്ഷമായി പിരിഞ്ഞു. ഒരു ഭാഗം ഗീനത്തിന്റെ മകനായ തിബ്നിയെ രാജാവാക്കാൻ ശ്രമിച്ചു. ഒരു ഭാഗം ഒമ്രിയുടെ പക്ഷത്തുനിന്നു. തുടർന്നു നാലുവർഷം ആഭ്യന്തരയുദ്ധം നടന്നു. അതിനുശേഷം ഒമ്രി യിസ്രായേലിന്റെ അധിപനായി. (1രാജാ, 16:21,22). ആദ്യത്തെ ആറുവർഷം തിർസ്സയിൽ ഭരിച്ചു. തുടർന്നു ശേമെരിനോടു ശമര്യാമല രണ്ടു താലന്ത് വെള്ളിക്കുവാങ്ങി തലസ്ഥാനം പണിതു ശമര്യാ എന്നു പേരിട്ടു. യുദ്ധതന്ത്ര പ്രാധാന്യമുള്ള സ്ഥലമായിരുന്നു ശമര്യാമല. രാജവംശത്തെ ഉറപ്പിക്കാൻ ഏത് ഉപായവും പ്രയോഗിക്കാൻ ഒമ്രിക്കു മടി ഉണ്ടായിരുന്നില്ല. അരാംരാജാവായ ബെൻ-ഹദദ് ഒന്നാമനോടു ഉടമ്പടി ചെയ്തു അരാമിൽ നിന്നു പിടിച്ചെടുത്ത പട്ടണങ്ങളെ വിട്ടുകൊടുത്തു. (1രാജാ, 20:34). സോര്യരാജകുമാരിയായ ഈസേബെലിനെ തന്റെ മകനായ ആഹാബിന് ഭാര്യയായി എടുത്തു. അങ്ങനെ ഒമ്രി അരാമ്യരുമായി സഖ്യം ഉറപ്പിച്ചു. അതോടുകൂടി ബാൽപൂജ യിസ്രായേലിൽ വളർന്നു. ഒമ്രി യഹോവയ്ക്കു അനിഷ്ടമായതു ചെയ്തു. (1രാജാ, 16:25,26). പന്ത്രണ്ടു വർഷത്തെ ഭരണത്തിനു ശേഷം ഒമ്രി മരിച്ചു; പുത്രനായ ആഹാബ് അവനു പകരം രാജാവായി.

ഒനേസിമൊസ് (Onesimus)

പേരിനർത്ഥം – പ്രയോജനമുള്ളവൻ

ഒളിച്ചോടിയ അടിമയാണ് ഒനേസിമൊസ്. ഒനേസിമൊസിനു വേണ്ടിയാണ് അപ്പൊസ്തലനായ പൗലൊസ് ഫിലേമോനുള്ള ലേഖനം എഴുതിയത്. കൊലൊസ്യ സഭയ്ക്കു എഴുതുമ്പോൾ ഒനേസിമൊസിനെക്കുറിച്ച് ‘നിങ്ങളിൽ ഒരുത്തനായ’ എന്ന് പൗലൊസ് സൂചിപ്പിക്കുന്നതിൽനിന്നും ഒനേസിമൊസ് കൊലൊസ്യയിൽ നിന്നുള്ളവൻ എന്ന് അനുമാനിക്കാം: (കൊലൊ, 4;9). ഫിലേമോന്റെ അടുക്കൽ നിന്നൊളിച്ചോടിയ ഒനേസിമൊസ് റോമിൽവച്ച് പൗലൊസിൽ നിന്നും സുവിശേഷം കേട്ടു ക്രിസ്ത്യാനിയായി: (ഫിലേ, 1:10). മാനസാന്തരപ്പെട്ടശേഷം പൗലൊസിന് പ്രയോജനകരമായ ശുശ്രൂഷ ചെയ്തു. അതുകൊണ്ട് അവനെ തന്നോടൊപ്പം നിറുത്തിക്കൊള്ളുവാൻ ആഗ്രഹിച്ചു. എങ്കിലും അതു ഫിലേമോന്റെ അവകാശത്തിന്മേലുള്ള കൈകടത്തലായിരിക്കും എന്നു കരുതി ഫിലേമോനുള്ള ലേഖനവും കൊലൊസ്യർക്കുള്ള ലേഖനവും കൊടുത്ത് തിഹിക്കൊസിനോടൊപ്പം ഒനേസിമൊസിനെ അയച്ചു. “തടവിലായിരിക്കുമ്പോൾ ഞാൻ ജനിപ്പിച്ച എന്റെ മകൻ’ എന്നാണ് ഒനേസിമൊസിനെക്കുറിച്ച് പൗലൊസ് എഴുതുന്നത്.

ഒനേസിഫൊരൊസ് (Onesiphorus)

പേരിനർത്ഥം – പ്രയോജനപ്രദൻ

എഫെസൊസിൽ പൗലൊസിന് പ്രയോജനകരമായ ശുശ്രൂഷ ചെയ്ത ഒരു വിശ്വാസി. അപ്പൊസ്തലൻ റോമിൽ രണ്ടാം പ്രാവശ്യം കാരാഗൃഹത്തിലായിരുന്നപ്പോൾ അയാൾ അന്വേഷിച്ചു ചെന്ന് അപ്പൊസ്തലനെ കണ്ടെത്തി ശുശ്രൂഷിച്ചു. പലപ്പോഴും ‘എന്നെ തണുപ്പിച്ചവൻ’ ‘എന്റെ ചങ്ങലയെക്കുറിച്ചു ലജ്ജിച്ചില്ല’ എന്നിങ്ങനെ അപ്പൊസ്തലൻ ഒനേസിഫൊരൊസിനെ ശ്ലാഘിക്കുന്നു. തന്റെ ഒടുവിലത്തെ ലേഖനത്തിൽ പൗലൊസ് ഒനേസിഫൊരൊസിന്റെ കുടുംബത്തിനു് വന്ദനം ചൊല്ലുന്നു: (2തിമൊ, 1:16-18; 4:19). 

ഐനെയാസ് (Aeneas)

പേരിനർത്ഥം – അഭിനന്ദനീയമായ

ലുദ്ദയിൽവെച്ച് പത്രൊസ് സൗഖ്യമാക്കിയ ഒരു പക്ഷവാതരോഗി. എട്ടു വർഷമായി രോഗിയായിരുന്ന ഐനയാസ് സൗഖ്യമായതുകണ്ട് ലുദ്ദയിലും ശാരോനിലുമുള്ളവർ കർത്താവിൽ വിശ്വസിച്ചു: (പ്രവൃ, 9:32-35).

ഏസെർ-ഹദ്ദോൻ (Esar-haddon)

പേരിനർത്ഥം – അശ്ശൂർ ഒരു സഹോദരനെ തന്നു

അശ്ശൂർ-അഹ്-ഇദ്ദിൻ എന്ന അശ്ശൂര്യനാമത്തിന്റെ എബ്രായരൂപമാണ് ഏസെർ-ഹദ്ദോൻ. സൻഹേരീബിൻ്റെ പുത്രനും മഹാപ്രതാപിയും ബലശാലിയുമായിരുന്നു ഏസെർ-ഹദ്ദോൻ. അദ്ദേഹത്തിന്റെ ഭരണകാലം ബി.സി. 68-669. പുത്രന്മാരായ അദ്രമേലെക്കും ശരേസെരും കൂടി സൻഹേരീബിനെ വധിച്ചശേഷം അരാരാത്തിലേക്കു ഓടി രക്ഷപ്പെട്ടു: (2രാജാ, 19:37; യെശ . 37:38). സൻഹേരീബ് ഇളയപുത്രനെ അധികം സ്നേഹിച്ചതായിരുന്നു ഈ വധത്തിനു കാരണം. പിതാവിന്റെ വധത്തെക്കുറിച്ചറിഞ്ഞ ഏസെർ-ഹദ്ദോൻ ഉടനടി നീനവേയിലേക്കു മടങ്ങിവന്ന് വിപ്ലവത്തെ അമർച്ചചെയ്തു. സൻഹേരീബ് നശിപ്പിച്ച ബാബിലോൺ നഗരത്തെ ഏസെർ-ഹദ്ദോൻ ഉദ്ധരിച്ചു. ഏലാമ്യരോടും ബാബിലോന്യരോടും യുദ്ധം ചെയ്ത് അനേകംപേരെ ബന്ദികളാക്കിക്കൊണ്ടുപോയി. ഇവരിൽ ചിലർ ശമര്യയിൽ പാർപ്പുറപ്പിച്ചു: (എസ്രാ, 4:2). പലസ്തീനിലെയും അരാമിലെയും സാമന്തരാജാക്കന്മാരിൽ നിന്ന് ഭാരിച്ച കപ്പം ഈടാക്കി. യെഹൂദയിലെ മനശ്ശെ രാജാവ് ഏസെർ-ഹദ്ദൊനു കപ്പം കൊടുത്തു. ഏദോം, മോവാബ്, അമ്മോൻ തുടങ്ങിയ ദേശങ്ങളിലെ ഭരണകർത്താക്കളെ സാമന്തരാക്കി. ഈ പ്രദേശങ്ങളിൽ മിസ്രയീം ചെലുത്തിക്കൊണ്ടിരുന്ന സ്വാധീനം നിയന്ത്രണ വിധേയമാക്കി. ബി.സി. 676-ൽ ഏസെർ-ഹദ്ദോൻ സീദോൻ നിരോധിക്കുകയും മൂന്നു വർഷത്തെ നിരോധത്തിനു ശേഷം അതിന്റെ ഒരു ഭാഗം തന്റെ സാമ്രാജ്യത്തോടു ചേർക്കുകയും ചെയ്തു. ചില അഭയാർത്ഥികളെ ഒരു പുതിയ പട്ടണത്തിൽ പാർപ്പിച്ചു. ഈ കാലത്ത് ഗസ്സയും അസ്കലോനും അശ്ശൂരിനു വിധേയപ്പെട്ടു.

പലസ്തീൻ, അരാം എന്നീ രാജ്യങ്ങളെ നിരന്തരം മത്സരത്തിന് ഇളക്കിവിടുകയായിരുന്നു ഈജിപ്റ്റ്. തന്മൂലം ഈജിപ്റ്ററ്റിനെ കീഴടക്കുവാൻ ഏസെർ-ഹദ്ദോൻ ഒരുങ്ങി. ഹാരാൻ വഴിയായിരുന്നു ഈജിപ്റ്റിലേക്കു കടന്നുപോയത്. ഹാരാനിൽ വച്ച് ചന്ദ്രദേവനായ സീനിൽനിന്ന് ശുഭശകുനങ്ങൾ ലഭിച്ചു. ആദ്യം പരാജയം അനുഭവിക്കേണ്ടിവന്നു എങ്കിലും യുദ്ധം തുടരുകയും തിർഹക്കായെ തോല്പിക്കുകയും ചെയ്തു. പെട്ടെന്നുള്ള മുന്നേററത്തിൽ മെംഫിസിനെ ആക്രമിച്ചു കീഴടക്കി. അശ്ശൂരിന്റെ ആധിപത്യത്തിന്നെതിരെ ഈജിപ്റ്റിൽ ലഹള പൊട്ടിപുറപ്പെട്ടു. ബി.സി. 669-ൽ ഏസെർ-ഹദ്ദോൻ ഒരു പുതിയ ആക്രമണത്തിനൊരുങ്ങി. ഈജിപ്റ്റിലേക്കുള്ള മാർഗ്ഗമദ്ധ്യേ ഏസെർ-ഹദ്ദോൻ രോഗബാധിതനായി മരിച്ചു. ഇളയമകനായ അശ്ശൂർ ബനിപ്പാൾ സിംഹാസനത്തിന്റെ അനന്തരാവകാശിയായി.

ഏശാവ് (Esau)

പേരിനർത്ഥം – രോമാവൃതൻ

യിസ്ഹാക്കിന്റെയും റിബെക്കയുടെയും ഇരട്ടപ്പിളകളിൽ മൂത്തവൻ: (ഉല്പ, 25:24,25). ചുവന്നവനും മേൽമുഴുവൻ രോമമുളളവനും ആയിരുന്നു. ഏശാവിന്റെ മറുപേരായ ഏദോമിന് ചുവന്നവൻ എന്നർത്ഥം. വനസഞ്ചാരിയും വേട്ടക്കാരനുമായി അവൻ വളർന്നു. വേട്ടയിറച്ചിയിൽ കൊതിമൂത്ത യിസ്ഹാക്ക് ഏശാവിനെ അധികം സ്നേഹിച്ചു. ഒരിക്കൽ ഏശാവ് വയലിൽ നിന്ന് വിശന്നു ക്ഷീണിച്ചു വന്നു. യാക്കോബ് തയ്യാറാക്കിക്കൊണ്ടിരുന്ന ചുവന്ന പായസം ഏശാവ് ആവശ്യപ്പെട്ടു. ജ്യേഷ്ഠാവകാശം വാങ്ങിക്കൊണ്ട് യാക്കോബ് ഏശാവിനു പായസം നല്കി. ചുവന്ന പായസത്തിൽ നിന്നാണ് ഏദോം എന്ന പേര് ഏശാവിനു ലഭിച്ചത്. 

നാല്പതാമത്തെ വയസ്സിൽ ഏശാവ് രണ്ടു ഭാര്യമാരെ എടുത്തു. അവർ ഇരുവരും കനാന്യ സ്ത്രീകളാകയാൽ അപ്പനും അമ്മയും അവരെ ഇഷ്ടപ്പെട്ടില്ല. “ഈ ഹിത്യ സ്ത്രീകൾ നിമിത്തം എന്റെ ജീവൻ എനിക്കു അസഹ്യമായിരിക്കുന്നു” എന്നു റിബെക്കാ യിസ്ഹാക്കിനോടു പറഞ്ഞു: (ഉല്പ, 27:46). ഏശാവിന്റെ ഒന്നാമത്തെ ഭാര്യ ഹിത്യനായ ഏലോൻ്റെ മകൾ ആദാ ആണ്: ( ഉല്പ, 36:2). ഉല്പത്തി 26:34-ൽ ഇവളെ ‘ബാസമത്ത്’ എന്നു വിളിക്കുന്നു. രണ്ടാമത്തെ ഭാര്യ അനയുടെ മകൾ ഒഹൊലീബാ ആണ്: (ഉല്പ, 36:2). ഉല്പത്തി 26:34-ൽ ഹിത്യനായ ബേരിയുടെ മകൾ യെഹൂദിത്ത് എന്നു പറഞ്ഞു കാണുന്നു. ഒരുപക്ഷേ വിവാഹത്തിനു മുമ്പുണ്ടായിരുന്ന പേരായിരിക്കാം അത്. യിശ്മായേലിന്റെ മകളും നെബായോത്തിന്റെ സഹോദരിയുമായ ബാസമത്ത് ആണ് ഏശാവിന്റെ മൂന്നാമത്തെ ഭാര്യ: (ഉല്പ, 36:3). ബാസമത്തിന്റെ മറുപേരാണ് മഹലത്ത്: (ഉല്പ, 28:59). 

യിസ്ഹാക്ക് വൃദ്ധനായി കാഴ്ച നഷ്ടപ്പെട്ടു, മരണകാലം അടുത്തെന്നറിഞ്ഞ യിസ്ഹാക്ക് മൂത്തമകനായ ഏശാവിനെ അനുഗ്രഹിക്കാനൊരുങ്ങി. ഏശാവ് പായസത്തിനു വേണ്ടി ജ്യേഷ്ഠാവകാശം നഷ്ടപ്പെടുത്തിയതും കനാന്യ സ്ത്രീകളെ വിവാഹം കഴിച്ചതും യിസ്ഹാക്ക് കണക്കിലെടുത്തില്ല. കാട്ടിൽ പോയി വേട്ടയിറച്ചികൊണ്ടുവന്ന് രുചികരമായ വിധത്തിൽ പാകപ്പെടുത്തിക്കൊടുക്കുന്നതിന് യിസ്ഹാക്ക് ഏശാവിനോടാവശ്യപ്പെട്ടു. അതു ഭക്ഷിച്ച് അവനെ അനുഗ്രഹിക്കാമെന്ന് വാക്കു നല്കി. ഇതു കേട്ട റിബേക്ക യാക്കോബിനെ വിളിച്ച് പിതാവിൻ്റെ അനുഗ്രഹം സൂത്രത്തിൽ കരസ്തമാക്കാനുള മാർഗ്ഗം ഉപദേശിച്ചുകൊടുത്തു. കോലാട്ടിൻ കുട്ടികളെ അറുത്ത് റിബേക്കാ ഭോജനം ഉണ്ടാക്കി. ഏശാവിനെപ്പോലെ വേഷപ്രച്ഛന്നനായി യാക്കോബ് ഭോജനം കൊണ്ടുകൊടുത്തു പിതാവിന്റെ അനുഗ്രഹം കൈക്കലാക്കി. അനുഗ്രഹവും വാങ്ങി യിസ്ഹാക്കിന്റെ മുന്നിൽ നിന്നും യാക്കോബ് പുറപ്പെട്ട ഉടൻ ഏശാവ് രുചികരമായ ഭോജനവുമായി പിതാവിന്റെ അടുത്തെത്തി. സംഭവം മനസ്സിലാക്കിയ ഏശാവ് ഉറക്കെ നിലവിളിച്ചു: അപ്പാ, എന്നെ, എന്നെയും കൂടെ അനുഗ്രഹിക്കേണമേ: (ഉല്പ, 27:34). ഏശാവ് കണ്ണുനീരോടെ വീണ്ടും വീണ്ടും അപേക്ഷിച്ചപ്പോൾ യിസഹാക്ക് പറഞ്ഞു, “നിന്റെ വാസം ഭൂമിയിലെ പുഷ്ടികൂടാതെയും മീതെ ആകാശത്തിലെ മഞ്ഞു കൂടാതെയും ഇരിക്കും. നിന്റെ വാളുകൊണ്ട് നീ ഉപജീവിക്കും; നിന്റെ സഹോദരനെ നീ സേവിക്കും. നിന്റെ കെട്ടു അഴിഞ്ഞു പോകുമ്പോൾ നീ അവന്റെ നുകം കഴുത്തിൽ നിന്നു കുടഞ്ഞുകളയും.” (ഉല്പ, 27:39-40). ഏശാവ് യാക്കോബിനെ വെറുക്കുകയും അവനെ കൊല്ലുമെന്നു ഹൃദയത്തിൽ പറയുകയും ചെയ്തു. പദ്ദൻ-അരാമിൽ ചെന്ന് ചാർച്ചക്കാരിൽ നിന്നും വിവാഹം കഴിക്കണമെന്ന് യാക്കോബിനോടു യിസ്ഹാക്ക് പറഞ്ഞത് ഏശാവു കേട്ടു. പിതാവിനു പ്രസാദം വരുത്തുവാൻ ഏശാവ് യിശ്മായേലിന്റെ മകളായ മഹലത്തിനെ വിവാഹം കഴിച്ചു: (ഉല്പ, 28:6-9).

ഏറെത്താമസിയാതെ ഏശാവ് സേയീരിലേക്കു വാസം മാറ്റി. പദ്ദൻ-അരാമിൽ നിന്നും യാക്കോബ് മടങ്ങി വരുമ്പോൾ ഏശാവിന്റെ പ്രതികാരം ഭയന്ന് അവന്റെ ക്രോധം ശമിപ്പിക്കുവാൻ ദൂതന്മാരെ അയച്ചു. എന്നാൽ ഏശാവ് 400 യോദ്ധാക്കളുമായി യാക്കോബിനെ എതിരേറ്റുവന്നു. ഏശാവ് ഓടിവന്ന് ആലിംഗനം ചെയ്ത് യാക്കോബിന്റെ കഴുത്തിൽ വീണു അവനെ ചുംബിച്ചു. അവർ ഇരുവരും കരഞ്ഞു. ഏശാവിനു യാക്കോബു നല്കിയ സമ്മാനം ആദ്യം നിഷേധിച്ചുവെങ്കിലും നിർബന്ധിച്ചപ്പോൾ അതു സ്വീകരിച്ചു. ഏശാവ് സേയീർ മലയിലേക്കു മടങ്ങിപ്പോയി. യിസ്ഹാക്ക് മരിച്ചപ്പോൾ യാക്കോബും ഏശാവും ചേർന്നാണ് ശവസംസ്കാരം നടത്തിയത്: (ഉല്പ, 35:29). തുടർന്നു കനാൻദേശത്ത് തനിക്കുണ്ടായിരുന്ന സകലസമ്പത്തും കൊണ്ടു ഏശാവ് സേയീർ പർവ്വതത്തിൽ പോയി അവിടെ പാർത്തു: (ഉല്പ, 36:6). 

ഭൂമിയിൽ നിന്നുളള പ്രാകൃതമനുഷ്യനു നിഴലാണു് ഏശാവ്. ചില കാര്യങ്ങളിലെങ്കിലും യാക്കോബിനെക്കാൾ വ്യത്യസ്തനായിരുന്നു. എന്നാൽ ഒരു ഊണിനുവേണ്ടി ജ്യേഷ്ഠാവകാശം വിററുകളഞ്ഞ് അഭക്തനായിത്തീർന്നു: (എബ്രാ, 12:16,17). അഹരോന്യ പൗരോഹിത്യം സ്ഥാപിക്കുന്നതുവരെ മൂത്തമകനായിരുന്നു കുടുംബത്തിന്റെ പൗരോഹിത്യാവകാശം. ഏശാവിന്റെ നിരാസത്തെ സംബന്ധിച്ചു തിരുവെഴുത്തുകൾ നല്കുന്ന വിശദീകരണം ദൈവത്തിന്റെ പരമാധികാരത്തെ ബന്ധപ്പെടുത്തിയുളതാണ്. “ഞാൻ യാക്കോബിനെ സ്നേഹിച്ചു, ഏശാവിനെ ദേഷിച്ചിരിക്കുന്നു.” (റോമ, 9:13; മലാ, 1:2). ദൈവത്താൽ തിരഞ്ഞെടുക്കപ്പെടാത്തവരുടെ പ്രതിനിധിയാണ് ഏശാവ്; യാക്കോബ് തിരഞ്ഞെടുക്കപ്പെട്ടവരുടെയും. യാക്കോബും ഏശാവും ജനിച്ചതിനു മുമ്പുതന്നെ യാക്കോബ് തിരഞ്ഞടുക്കപ്പെട്ടു. യാക്കോബും ഏശാവും തമ്മിലുള്ള വിദ്വേഷം ഏദോമ്യരും യിസ്രായേല്യരും തമ്മിലുള്ള ശത്രുതയായി വളരെക്കാലം നിലനിന്നു. (സംഖ്യാ, 20:18-21; 1രാജാ, 11:14; സങ്കീ, 137:7).

ഏഥാൻ (Ethan)

പേരിനർത്ഥം – ശാശ്വതൻ

ശലോമോൻ്റെ ജ്ഞാനത്തിൻ്റെ ശ്രഷ്ഠതയെ തുലനം ചെയ്യുമ്പോൾ പറയുന്ന നാലു പേരുകളിലൊന്ന്. എസ്രാഹ്യനായ ഏഥാൻ, മാഹാലിന്റെ പുത്രന്മാരായ ഹേമാൻ, കൽക്കോൻ, ദർദ്ദ എന്നിവരാണ് നാലുപേർ: (1രാജാ, 4:31). സേരഹിന്റെ പുത്രന്മാരുടെ കൂട്ടത്തിൽ ഏഥാൻ, ഹേമാൻ, കൽക്കോൻ, ദാരാ എന്നീ നാലുപേരുകളുമുണ്ട്: (1ദിന, 2:6). 89-ാം സങ്കീർത്തനം എസ്രാഹ്യനായ ഏഥാൻ്റെ ധ്യാനമാണ്.

എസ്രാ (Eara)

പേരിനർത്ഥം – സഹായം

ബാബേൽ പ്രവാസത്തിൽനിന്നും മടങ്ങിവന്ന യെഹൂദന്മാരിൽ രണ്ടാം സംഘത്തിന്റെ നായകൻ; എസ്രാ എന്ന പുസ്തകത്തിന്റെ കർത്താവ്. അഹരോന്റെ പൗത്രനായ ഫീനെഹാസിന്റെ കുടുംബത്തിൽ സെരായാവിന്റെ പുത്രൻ: (എസ്രാ, 7:1-5). യോശീയാ രാജാവിന്റെ കാലത്തു മഹാപുരോഹിതനായിരുന്ന ഹില്ക്കീയാവിന്റെ പൌത്രനായിരുന്നു സെരായാവ്. മോശയുടെ ന്യായപ്രമാണത്തിൽ വിദഗ്ദ്ധ ശാസ്ത്രിയായിരുന്നു എസ്രാ പുരോഹിതൻ: (എസ്രാ, 7:6,11,12). യഹോവയുടെ ന്യായപ്രമാണം പരിശോധിപ്പാനും അതനുസരിച്ചു നടപ്പാനും യിസ്രായേലിൽ അതിന്റെ ചട്ടങ്ങളും വിധികളും ഉപദേശിപ്പാനും എസ്രാ മനസ്സുവെച്ചു (7:10 ) എന്നു പ്രത്യേകം പറയുന്നുണ്ട്. 

ബി.സി. 597-ൽ ബാബേൽ രാജാവായ നെബുഖദ്നേസർ യെഹൂദന്മാരെ ബദ്ധരാക്കി ബാബേലിലേക്കു കൊണ്ടുപോയി. ബി.സി. 539-ൽ ബാബേൽ സാമ്രാജ്യം പാർസിരാജാവായ കോരെശിന് അധീനമായി. യെഹൂദന്മാർക്ക് മടങ്ങിച്ചെന്ന് ദൈവാലയം പണിയുവാനുള്ള അനുവാദം നല്കിക്കൊണ്ടുള്ള കല്പന കോരെശ് ചക്രവർത്തി ബി.സി. 538-ൽ പുറപ്പെടുവിച്ചു. അതനുസരിച്ചു നാല്പതിനായിരത്തിലധികം യെഹൂദന്മാർ യെരുശലേമിലേക്കു മടങ്ങിച്ചെന്നു സെരുബ്ബാബേലിന്റെ നേതൃത്വത്തിൽ ദൈവാലയത്തിന്റെ പണിപൂർത്തിയാക്കി. ശേഷിച്ചവർ പാർസികളുടെ ഭരണത്തിൻ കീഴിൽ യെഹൂദാപാരമ്പര്യം പുലർത്തിക്കൊണ്ടു ബാബേലിൽ തന്നെ സ്വൈരമായി പാർത്തു. ന്യായപ്രമാണത്തിൽ വിദഗ്ദ്ധശാസ്ത്രി ആയിരുന്ന എസ്രായ്ക്ക് ഈ കാലത്തു രാജാവിന്റെ കീഴിൽ ഉന്നതസ്ഥാനം ലഭിച്ചു. അർത്ഥഹ്ശഷ്ടാ രാജാവിന്റെ ഏഴാമാണ്ടിൽ (ബി.സി. 458) എസ്രായ്ക്ക് യെരൂശലേമിൽ പോയി ന്യായപ്രമാണം അനുസരിച്ചു യെഹൂദയിലെയും യെരൂശലേമിലെയും കാര്യങ്ങൾ ക്രമീകരിക്കുവാൻ രാജാവു കല്പന നല്കി. രാജകീയ ഭണ്ഡാരത്തിൽ നിന്നു ലഭിച്ചതും യെഹൂദന്മാരിൽ നിന്നു ഔദാര്യദാനമായി ലഭിച്ചതും ആയ വെള്ളിയും പൊന്നും കൊണ്ടുപോകുന്നതിനും നദിക്കക്കരെയുള്ള ഭരണാധികാരികളിൽ നിന്നു ആവശ്യമായ സമ്പത്തും സാധനങ്ങളും സ്വരൂപിക്കുന്നതിനും രാജാവ് എസ്രായെ അധികാരപ്പെടുത്തി. ദൈവാലയ ശുശ്രൂഷകരെ നികുതിയിൽ നിന്നും പൂർണ്ണമായും ഒഴിവാക്കി. യെഹൂദയിൽ ന്യായപാലനത്തിനു അധികാരികളെയും ന്യായാധിപന്മാരെയും നിയമിക്കാനും ദൈവത്തിന്റെ ന്യായപ്രമാണവും രാജാവിന്റെ ന്യായപ്രമാണവും അനുസരിക്കാത്തവരെ ന്യായം വിസ്തരിച്ചു അവർക്കു മരണമോ, പ്രവാസമോ, പിഴയോ, തടവോ നല്കാനും എസ്രായ്ക്ക് അധികാരം നൽകി: (7:11-28). എസ്രായോടൊപ്പം യെരൂശലേമിലേക്കുപോയ 1754 പുരുഷന്മാരുടെ പട്ടിക എസ്രാ 8-ൽ ഉണ്ട്. നെഹെമ്യാവ് 7-ലും, എസ്രാ 2-ലും ചേർത്തിട്ടുള്ള മടങ്ങിവന്നവരുടെ പൂർണ്ണമായ പട്ടികയിൽ ഇവരും ഉൾപ്പെടുന്നുണ്ട്. 

മടങ്ങിപ്പോകേണ്ട പ്രവാസികളെ എസ്രാ അഹവാ നദിക്കരികെ കൂട്ടിവരുത്തി അവിടെ മൂന്നു ദിവസം പാർത്തു. മടങ്ങിപ്പോകേണ്ടവർ 1754 പേർ ആയിരുന്നു. എന്നാൽ അവരിൽ ലേവ്യർ ആരും ഉണ്ടായിരുന്നില്ല. ലേവ്യർ കൂട്ടമായി പാർത്തിരുന്ന കാസിഫ്യയിലേക്കു എസ്രാ ഒരു പ്രതിനിധി സംഘത്തെ അയച്ചു. 38 ലേവ്യരും 220 ദൈവാലയ ദാസന്മാരും അവരോടൊപ്പം വന്നു. ദൈവാലയത്തിനുള്ള വിലയേറിയ വഴിപാടുകൾ ജാഗ്രതയോടെ സൂക്ഷിച്ചു യെരുശലേമിൽ എത്തിക്കുന്നതിനു പുരോഹിതന്മാരും ലേവ്യരുമായി പന്ത്രണ്ടു പേരെ ചുമതലപ്പെടുത്തി. യാത്രയിൽ സമ്പത്തിന്റെയും ജനത്തിന്റെയും സുരക്ഷയ്ക്കു വേണ്ടി രാജാവിനോടു പടയാളികളെയും കുതിരച്ചേവകരെയും ആവശ്യപ്പെട്ടില്ല. ദൈവത്തിൽതന്നെ പൂർണ്ണമായി ആശ്രയിച്ചു: (8:15-22). ശുഭയാത്രയ്ക്കു വേണ്ടി മൂന്നു ദിവസം ഉപവസിച്ചു പ്രാർത്ഥിച്ചശേഷം അവർ ഒന്നാംമാസം ഒന്നാം തീയതി യാത്ര പുറപ്പെടുകയും അഞ്ചാം മാസം ഒന്നാം തീയതി യെരൂശലേമിൽ എത്തിച്ചേരുകയും ചെയ്തു: (7:8). നാലുമാസം കൊണ്ട് 1400 കി.മീ. സഞ്ചരിച്ചാണ് അവർ വിശുദ്ധ നഗരത്തിലെത്തിയത്. മൂന്നു ദിവസത്തെ വിശ്രമത്തിനു ശേഷം അവർ കൊണ്ടുവന്ന വെള്ളിയും, പൊന്നും, ഉപകരണങ്ങളും തൂക്കി ദൈവാലയാധികാരികളെ ഏല്പിക്കുകയും യഹോവയ്ക്ക് യാഗങ്ങൾ അർപ്പിക്കുകയും ചെയ്തു. അതിനുശേഷം രാജാവിന്റെ കല്പനകൾ സംസ്ഥാനപതിമാർക്കും നാടുവാഴികൾക്കും കൊടുത്തു: (8:31-36). 

രാജകല്പനയനുസരിച്ച് പരമോന്നത ന്യായാധിപതിയായിത്തീർന്ന എസ്രാ ന്യായപ്രമാണ പ്രകാരം യെരുശലേമിലെ കാര്യങ്ങളെ ക്രമീകരിക്കുവാനൊരുമ്പെട്ടു. യെരുശലേമിൽ പാർത്തിരുന്ന യെഹൂദന്മാരിൽ പലരും ദൈവികല്പനയ്ക്കു വിരുദ്ധമായി വിജാതീയസ്ത്രീകളെ വിവാഹം കഴിച്ചിരുന്നു. ഇതു മനസ്സിലാക്കിയ എസ്രാ ദൈവസന്നിധിയിൽ വിലപിച്ച് ആത്മതപനം ചെയ്തു. ദൈവവചനത്തിൽ ഭയമുള്ളവർ എസ്രായുടെ അടുക്കൽ വന്നു. സന്ധ്യായാഗത്തിന്റെ സമയത്തു ആത്മതപനത്തിൽ നിന്നെഴുന്നേറ്റ എസ്രാ മുട്ടുകുത്തി പ്രാർത്ഥിച്ചു. ഈ സമയത്തു ഒരു നല്ലകൂട്ടം യിസ്രായേല്യർ എസ്രായുടെ ചുറ്റും കൂടി. അവരും വളരെയധികം കരഞ്ഞു. ഒടുവിൽ വിജാതീയ സ്ത്രീകളെ ഉപേക്ഷിക്കുന്ന കാര്യത്തിൽ എസ്രാ നേതൃത്വം നല്കണമെന്ന ശെഖന്യാവിന്റെ അഭിപ്രായം സ്വീകരിച്ചു. മൂന്നു ദിവസത്തിനകം എല്ലാ യിസ്രായേല്യരെയും യെരുശലേമിൽ വിളിച്ചു കൂട്ടുന്നതിനു തീരുമാനിച്ചു. ഒമ്പതാം മാസം ഇരുപതാം തീയതി വന്മഴ പെയ്തിട്ടും യിസ്രായേല്യരെല്ലാം കൂടിവരുകയും അവർ തങ്ങളുടെ പാപം ഏറ്റു പറഞ്ഞ് അന്യജാതിക്കാരികളെ വിവാഹം ചെയ്തിരുന്നവർ അവരെ ഉപേക്ഷിക്കുവാൻ തീരുമാനമെടുക്കുകയും ചെയ്തു: (എസ്രാ, 10). ഈ പ്രവർത്തനങ്ങൾക്കെല്ലാം കൂടെ ഏകദേശം എട്ടുമാസം വേണ്ടി വന്നു. 

തുടർന്നു പതിമൂന്നുവർഷം എസ്രാ എന്തുചെയ്തുവെന്നു വ്യക്തമല്ല. എസ്രാ യെരൂശലേമിൽ തന്നെ കഴിഞ്ഞുവോ, അതോ മടങ്ങി ബാബേലിലേക്കു പോയോ എന്നറിയില്ല. എസ്രാ മടങ്ങി ബാബേലിലേക്കു പോകുകയും നെഹെമ്യാവിനോടൊപ്പം തിരികെ വരികയും ചെയ്തു എന്നു കരുതുന്നവരുണ്ട്. യെരൂശലേം മതിലുകളുടെ പൂർത്തീകത്തിനുശേഷം നെഹെമ്യാവിനോടൊപ്പമാണ് പിന്നെ നാം എസ്രായെക്കുറിച്ചു കേൾക്കുന്നത്. എസ്രാ യെരുശലേമിൽ ഉണ്ടായിരുന്നുവെങ്കിൽ നെഹെമ്യാവു വന്നപ്പോൾ കണ്ട ആത്മീയതയുടെ അഭാവം ഉണ്ടാകുമായിരുന്നില്ല. താത്കാലിക ക്രമീകരണങ്ങൾക്കു വേണ്ടിയായിരുന്നു രാജാവ് എസ്രായെ അയച്ചത്. എന്നാൽ നിർബന്ധ വിവാഹമോചനം നിമിത്തം ജനം എസ്രായിൽ നിന്നകന്നുപോയി എന്നും നെഹെമ്യാവിന്റെ വരവുവരെ എസ്രാ ശാന്തനായി യെരൂശലേമിൽ കഴിഞ്ഞുവെന്നും ചിന്തിക്കുന്നവരുണ്ട്. ന്യായപ്രമാണം വായിക്കുക, വ്യാഖ്യാനിക്കുക, ജനത്തിനു വേണ്ടി പ്രാർത്ഥിക്കുക, മതിൽ പ്രതിഷ്ഠയിൽ സഹകരിക്കുക, നവീകരണത്തിനു നേതൃത്വം നല്കുക എന്നിങ്ങനെ പുരോഹിതശുശ്രൂഷയാണ് എസ്രാ നിർവ്വഹിച്ചുവന്നത്: (നെഹ, 8:9; 12:26). 

അർത്ഥഹ്ശഷ്ടാവ് രണ്ടാമന്റെ കാലത്തിനു മുമ്പ് (ബി.സി. 398) എസ്രാ യെരൂശലേമിൽ വന്നില്ലെന്നു വാദിക്കുന്ന പണ്ഡിതന്മാരുണ്ട്. അവർ തെളിവായി ചൂണ്ടിക്കാണിക്കുന്നതു മൂന്നു ഭാഗങ്ങളാണ്: 1. എസ്രാ 9:9-ൽ നഗരമതിലിനെക്കുറിച്ചു പറയുന്നു. പക്ഷേ നെഹെമ്യാവിന്റെ കാലം വരെ നഗരമതിൽ പണിതിട്ടില്ല. എന്നാൽ അർത്ഥഹ്ശഷ്ടാവ് ഒന്നാമന്റെ കാലത്തു ഒരു വിധത്തിലുള്ള മതിൽ പണിതുവെന്നും (എസ്രാ, 4:12) ആ മതിലിന്റെ നാശത്തിന്റെ സൂചനയാണു എസ്രാ 4:23-ലും നെഹെമ്യാവ് 1:3-ലും കാണുന്നത് എന്നു മനസ്സിലാക്കുമ്പോൾ ഈ വൈരുദ്ധ്യം നീങ്ങും. 2. യെരുശലേമിൽ ഒരു മഹാസഭയെക്കുറിച്ചുള്ള പരാമർശം എസ്രാ 10:1-ൽ ഉണ്ട്. എന്നാൽ പട്ടണത്തിൽ കുറച്ചു ജനമേ ഉള്ളു എന്നു നെഹെ, 4:7-ൽ കാണുന്നു. എസ്രാ 10-ലെ മഹാസഭ യെരൂശലേമിനു ചുറ്റും നിന്നു വന്നവരാണെന്നും നെഹെമ്യാവ് 4:7-ൽ പറഞ്ഞിട്ടുള്ളതു നഗരത്തിനുള്ളിലെ നിവാസങ്ങളെക്കുറിച്ചാണെന്നും മനസ്സിലാക്കുമ്പോൾ ഈ വാദം അസ്ഥാനത്താണെന്നു കാണാം. 3. എല്യാശീബിന്റെ മകനായ യെഹോഹാനൻ എസ്രായുടെ സമകാലികൻ ആയിരുന്നുവെന്നു എസ്രാ 10:6-ൽ നിന്നുമനസ്സിലാക്കാം. എന്നാൽ നെഹെമ്യാവ് 12:22 ൾ,23-ൻ പ്രകാരം യെഹോഹാനാൻ (യോഹാനാൻ) എല്യാശീബിന്റെ ചെറുമകനാണ്. ബി.സി. 408-ൽ യോഹാനാൻ മഹാപുരോഹിതൻ ആയിരുന്നുവെന്നു ബാഹ്യരേഖയുണ്ട്. വളരെ പ്രചാരമുള്ള ഒരു പേരാണു യോഹാനാൻ. എല്യാശീബിനു യോഹാനാൻ, യോയാദാ എന്നീ രണ്ടു പുത്രന്മാരുണ്ടായിരുന്നുവെന്നും യോയാദായ്ക്ക് യോഹാനാൻ എന്ന പേരിൽ ഒരു പുത്രനുണ്ടായിരുന്നുവെന്നും ചിന്തിക്കുന്നതിൽ യുക്തിരാഹിത്യം ഒന്നുമില്ല. ഈ യോഹാനാൻ മഹാ പുരോഹിതനായിരുന്നു. എസ്രാ 10:6-ലെ യോഹാനാൻ തന്റെ കാലത്തു മഹാപുരോഹിതനായിരുന്നുവെന്നു പറഞ്ഞിട്ടില്ല എന്നതും ശ്രദ്ധാർഹമാണ്.

എവീൽ-മെരോദക് (Evil-Merodach)

പേരിനർത്ഥം – മർദൂക്കിന്റെ പുരുഷൻ

ബാബേൽ രാജാവായ എവീൽ-മെരോദക് നെബൂഖദ്നേസറിന്റെ പുത്രനും പിൻഗാമിയും ആയിരുന്നു. അമൽ-മർദൂക് എന്ന ബാബിലോന്യ നാമത്തിന്റെ എബ്രായരൂപമാണു എവീൽ-മെരോദക്. ബാബേലിലെ പ്രധാന ദേവനാണ് മർദുക്. ഇയാൾ രണ്ടുവർഷമേ രാജ്യം ഭരിച്ചുള്ളു: (ബി.സി. 562-560 ). സ്വന്തം സഹോദരിയുടെ ഭർത്താവായ നെറിഗ്ലിസർ (ബൈബിളിൽ പറയപ്പെടുന്ന നേർഗ്ഗൽ-ശരേസർ) എവീൽ-മെരോദക്കിനെ വധിച്ചു സിംഹാസനം കരസ്തമാക്കി. യെഹൂദാ രാജാവായ യെഹോയാഖീനെ അദ്ദേഹത്തിന്റെ പ്രവാസത്തിന്റെ മുപ്പത്തേഴാമാണ്ടിൽ എവിൽ-മെരോദക് മോചിപ്പിച്ചു. ബദ്ധന്മാരായ മറ്റു രാജാക്കന്മാർക്ക് ഉപരിയായ സ്ഥാനവും ജീവിതകാലം മുഴുവൻ അഹോവൃത്തിയും നൽകി: (2രാജാ, 25:27-30; യിരെ, 52:31-34). എന്നാൽ യെഹോയാഖീനെ യെഹൂദയിലേക്കു മടങ്ങുവാൻ അനുവദിച്ചില്ല.