എവീൽ-മെരോദക് (Evil-Merodach)

പേരിനർത്ഥം – മർദൂക്കിന്റെ പുരുഷൻ

ബാബേൽ രാജാവായ എവീൽ-മെരോദക് നെബൂഖദ്നേസറിന്റെ പുത്രനും പിൻഗാമിയും ആയിരുന്നു. അമൽ-മർദൂക് എന്ന ബാബിലോന്യ നാമത്തിന്റെ എബ്രായരൂപമാണു എവീൽ-മെരോദക്. ബാബേലിലെ പ്രധാന ദേവനാണ് മർദുക്. ഇയാൾ രണ്ടുവർഷമേ രാജ്യം ഭരിച്ചുള്ളു: (ബി.സി. 562-560 ). സ്വന്തം സഹോദരിയുടെ ഭർത്താവായ നെറിഗ്ലിസർ (ബൈബിളിൽ പറയപ്പെടുന്ന നേർഗ്ഗൽ-ശരേസർ) എവീൽ-മെരോദക്കിനെ വധിച്ചു സിംഹാസനം കരസ്തമാക്കി. യെഹൂദാ രാജാവായ യെഹോയാഖീനെ അദ്ദേഹത്തിന്റെ പ്രവാസത്തിന്റെ മുപ്പത്തേഴാമാണ്ടിൽ എവിൽ-മെരോദക് മോചിപ്പിച്ചു. ബദ്ധന്മാരായ മറ്റു രാജാക്കന്മാർക്ക് ഉപരിയായ സ്ഥാനവും ജീവിതകാലം മുഴുവൻ അഹോവൃത്തിയും നൽകി: (2രാജാ, 25:27-30; യിരെ, 52:31-34). എന്നാൽ യെഹോയാഖീനെ യെഹൂദയിലേക്കു മടങ്ങുവാൻ അനുവദിച്ചില്ല.

എൽഹനാൻ (Elhanan)

പേരിനർത്ഥം – ദൈവം കൃപാലു

ദാവീദിൻ്റെ സൈന്യത്തിലുണ്ടായിരുന്ന ഒരു പരാക്രമശാലി. യായീരിൻ്റെ മകനായ എൽഹാനാൻ ഗൊല്യാത്തിന്റെ സഹോദരനായ ലഹ്മിയെ വെട്ടിക്കൊന്നു. ഈ സംഭവം അല്പം വ്യത്യസ്തമായി രണ്ടിടത്തു് കാണാം. “ഗോബിൽവെച്ചു പിന്നെയും ഫെലിസ്ത്യരോടു യുദ്ധം ഉണ്ടായി; അവിടെവെച്ചു ബേത്ത്ലേഹെമ്യനായ യാരെ-ഓരെഗീമിന്റെ മകൻ എൽഹാനാൻ ഗിത്യനായ ഗൊല്യാത്തിനെ വെട്ടിക്കൊന്നു:” (2ശമൂ, 21:19). “പിന്നെയും ഫെലിസ്ത്യരോടു യുദ്ധം ഉണ്ടായപ്പോൾ യായീരിന്റെ മകനായ എൽഹാനാൻ ഗിത്യനായ ഗൊല്യാഥിന്റെ സഹോദരനായ ലഹ്മിയെ വെട്ടിക്കൊന്നു:” (1ദിന, 20:5)? ഗിത്യനായ ഗൊല്യാത്തിനെ അല്ല, ഗിത്യനായ ഗൊല്യാഥിന്റെ സഹോദരനായ ലഹ്മിയെയാണ് എൽഹാനാൻ വെട്ടിക്കൊന്നത്. 2ശമൂ, 21:19-ലേതു ദൂഷിത പാഠമാണ്. ശുദ്ധപാഠം ദിനവൃത്താന്തത്തിലേതത്രേ.

എല്യേസർ (Eliezer)

പേരിനർത്ഥം – ദൈവം എന്റെ സഹായം

ദമ്മേശെക്കുകാരനായ എലേസർ: (ഉല്പ, 15:2). അബ്രാഹാമിന്റെ വീട്ടിൽ ജനിച്ച ദാസൻ. (15:3). യിശ്മായേലും യിസ്ഹാക്കും ജനിക്കും മുമ്പ് അബ്രാഹാം ഇയാളെ ദത്തെടുത്തിരിക്കണം. മക്കളില്ലാത്തവർ മറ്റു കുടുംബങ്ങളിൽ നിന്നൊരാളെ ദത്തെടുക്കുന്ന സമ്പ്രദായം മെസപ്പൊട്ടേമിയയിലും മറ്റും ബി.സി. രണ്ടാം സഹസ്രാബ്ദത്തിൽ നിലവിലിരുന്നതിന് തെളിവുകളുണ്ട്. യിസ്ഹാക്കിനു ഭാര്യയെ എടുക്കുവാൻ അബ്രാഹാം അയച്ച അജ്ഞാതനാമാവായ ദാസൻ എല്യേസർ ആയിരിക്കണം: (ഉല്പ, 24:2).

എല്യാശീബ് (Eliashib)

പേരിനർത്ഥം – ദൈവം യഥാസ്ഥാനപ്പെടുത്തും

നെഹെമ്യാവിന്റെ കാലത്തെ മഹാപുരോഹിതൻ: (നെഹെ, 3:1,20,21). എല്യാശീബ് സഹോദരന്മാരായ മറ്റു പുരോഹിതന്മാരോടൊപ്പം ദൈവാലയത്തോടു ചേർന്നുള്ള കിഴക്കെപട്ടണമതിൽ പുതുക്കിപ്പണിതു: (നെഹ, 3:1). “ദൈവത്തിന്റെ ആലയത്തിലെ അറകൾക്കു മേൽവിചാരകനായി നിയമിക്കപ്പെട്ടിരുന്ന എല്യാശീബ് പുരോഹിതൻ തോബീയാവിന്റെ ബന്ധുവായിരുന്നതിനാൽ അവന്നു ഒരു വലിയ അറ ഒരുക്കിക്കൊടുത്തിരുന്നു:” (നെഹെ, 13:4). കുറെനാൾ കഴിഞ്ഞിട്ടു നെഹെമ്യാവ് രാജാവിനോടു അനുവാദം വാങ്ങി യെരൂശലേമിലേക്കു ചെന്നപ്പോൾ എല്യാശീബ് തോബീയാവിനു ദൈവാലയത്തിന്റെ പ്രാകാരങ്ങളിൽ ഒരു അറ ഒരുക്കിക്കൊടുത്തതിനാൽ ചെയ്ത ദോഷം അറിഞ്ഞു. അതു നെഹമ്യാവിനു അത്യന്തം വ്യസനമായതുകൊണ്ടു അവൻ തോബീയാവിന്റെ വീട്ടുസാമാനമൊക്കെയും അറയിൽനിന്നു പുറത്തു എറിഞ്ഞുകളഞ്ഞു, അറകളെ ശുദ്ധീകരിച്ചു. (നെഹെ, 13:7-9). എല്യാശീബിന്റെ ചെറുമകൻ ഹോരോന്യനായ സൻബല്ലത്തിന്റെ മകളെ വിവാഹം ചെയ്തു: (നെഹെ, 13:28). യോയാക്കീമിന്റെ മകനായിരുന്നു എല്യാശീബ്: (നെഹെ, 12:10,22).

എല്യാക്കീം (Eliakim)

പേരിനർത്ഥം – ദൈവം ഉറപ്പിക്കും

യെഹൂദാരാജാവായി ഹിസ്ക്കീയാവിന്റെ രാജധാനിവിചാരകൻ: (2രാജാ, 18:18; 19:2). അഹങ്കാരത്തിന്റെ ശിക്ഷയായി ശെബ്നയെ നീക്കിയശേഷമാണ് ഹില്ക്കീയാവിന്റെ മകനായ എല്യാക്കീമിനെ പ്രസ്തുതസ്ഥാനത്ത് നിയമിച്ചത്: (യെശ, 22:15-20). അശ്ശൂർ രാജാവായ സൻഹേരീബ് അയച്ച റബ്-ശാക്കയോടു സംസാരിക്കാൻ ഹിസ്ക്കീയാ രാജാവയച്ച മൂന്നുപേരിൽ എല്യാക്കീം ഉൾപ്പെട്ടിരുന്നു: (2രാജാ, 18:18; യെശ, 36:3,11,12). അനന്തരം രാജാവ് എല്യാക്കീമിനെയും ശെബ്നയെയും പുരോഹിതന്മാരിൽ മൂപ്പന്മാരെയും ദൈവനിയോഗം അറിയാൻ വേണ്ടി യെശയ്യാ പ്രവാചകന്റെ അടുക്കൽ അയച്ചു: (യെശ, 37:2). ‘എന്റെ ദാസൻ’ എന്നു എല്യാക്കീമിനെ യഹോവ വിശേഷിപ്പിക്കുന്നു: (യെശ, 22:20). ദാവീദ് ഗൃഹത്തിന്റെ താക്കോൽ (യെശ, 22:22) രാജധാനിയിലെ അധികാരമാണ്; ദൈവഗൃഹത്തിന്റെ അധികാരമല്ല. എല്യാക്കീമിൽ മശീഹയുടെ പ്രതിരൂപം ദർശിക്കുന്ന വ്യാഖ്യാതാക്കളുണ്ട്.

എല്ദാദ് (Eldad)

പേരിനർത്ഥം – ദൈവം സ്നേഹിച്ചു

മരുഭൂമിയിൽവച്ച് മോശെയെ സഹായിക്കുവാൻ നിയമിക്കപ്പെട്ട എഴുപതു മൂപ്പന്മാരിൽ ഒരാൾ: (സംഖ്യാ, 11:24-29). ഈ മൂപ്പന്മാർ സമാഗമന കൂടാരത്തിന്റെ വാതിലിനുചുറ്റും കൂടി ദൈവത്തിൽനിന്നും പ്രവചനാത്മാവു പ്രാപിച്ചു. എല്ദാദ് മേദാദിനോടൊപ്പം കൂടാരത്തിൽ പോകാതെ പാളയത്തിൽ തന്നെ കഴിഞ്ഞു. എന്നാൽ അവർക്കും പ്രവചനവരം ലഭിച്ചു; അവർ പാളയത്തിൽ വച്ച് പ്രവചിച്ചു. ഈ വിവരം ഒരു ബാല്യക്കാരൻ മോശെയെ അറിയിച്ചു. അവരോടു വിലക്കണമെന്നു യോശുവ മോശയോടു പറഞ്ഞു. എന്നാൽ മോശയുടെ മറുപടി ഇപ്രകാരമായിരുന്നു. “എന്നെ വിചാരിച്ചു നീ അസൂയപ്പെടുന്നുവോ? യഹോവയുടെ ജനം ഒക്കെയും പ്രവാചകന്മാരാകയും യഹോവ തന്റെ ആത്മാവിനെ അവരുടെമേൽ പകരുകയും ചെയ്തതെങ്കിൽ കൊള്ളായിരുന്നു: (സംഖ്യാ, 11:29).

എലെയാസാർ (Eleazar)

പേരിനനർത്ഥം – ദൈവം സഹായി

മഹാപുരോഹിതനായ എലെയാസാർ അഹരോന്റെയും എലീശേബയുടെയും നാലു പൂത്രന്മാരിൽ മൂന്നാമൻ: (പുറ, 6:23; 28:1). എലെയാസാർ തീയേലിന്റെ മകളെ വിവാഹം കഴിച്ചു. അവർക്കു ജനിച്ച മകനാണ് ഫീനെഹാസ്: (പുറ, 6:25). നാദാബും അബീഹുവും മക്കളില്ലാതെ മരിച്ചതുകൊണ്ട് ലേവ്യരുടെ പ്രധാനിയായി എലെയാസാർ നിയമിക്കപ്പെട്ടു. എലെയാസാർ പ്രധാനപ്രഭുവും വിശുദ്ധമന്ദിരത്തിലെ കാര്യം നോക്കുന്നവരുടെ മേൽവിചാരകനും ആയിത്തീർന്നു: (ലേവ്യ, 10:1; സംഖ്യാ, 3:4,22). പിതാവായ അഹരോൻ ജിവിച്ചിരുന്ന കാലത്ത് എലെയാസാർ സഹോദരനായ ഈഥാമാരിനോടൊപ്പം പുരോഹിത ശുശ്രൂഷ ചെയ്തു. ഹോർ പർവ്വതത്തിൽ വച്ച് അഹരോൻ മരിച്ചപ്പോൾ ദൈവകല്പനയനുസരിച്ച് അഹരോന്റെ സ്ഥാനവസ്ത്രങ്ങൾ മോശെ എലെയാസറിനെ ധരിപ്പിച്ചു. അങ്ങനെ എലെയാസാർ മഹാപുരോഹിതനായിത്തീർന്നു. (സംഖ്യാ, 20:25-29). യുദ്ധപ്രാപ്തരായ യിസ്രായേൽ മക്കളുടെ എണ്ണമെടുക്കുവാൻ എലെയാസാർ മോശെയെ സഹായിച്ചു. (സംഖ്യാ, 26:1-4). യിസ്രായേല്യർക്കു ദേശം വിഭാഗിച്ചുകൊടുക്കുവാൻ മോശെ യോശുവയെയും പുരോഹിതനായ എലെയാസാറിനെയും നിയോഗിച്ചു. (സംഖ്യാ, 34:17). എലെയാസാറിന്റെ മരണം തിരുവെഴുത്തുകളിൽ രേഖപ്പെടുത്തിയിട്ടില്ല. ഏലിയുടെ കാലംവരെ മഹാപൗരോഹിത്യം എലെയാസാറിന്റെ കുടുംബത്തിൽ നിലനിന്നു. സാദോക്കിന്റെ കാലത്താണ് മഹാപൗരോഹിത്യം വീണ്ടും എലെയാസാറിന്റെ കുടുംബത്തിലേക്കു വന്നത്: (1ശമൂ, 2:27; 1ദിന, 6:8; 24:3; 1രാജാ, 2:27).

എലീഹൂ (Elihu)

പേരിനർത്ഥം – അവൻ എന്റെ ദൈവം

ഇയ്യോബിന്റെ ഒരു സുഹൃത്ത്: (ഇയ്യോ, 32:2, 4-6; 34:1; 35:1; 36:1). രാം വംശത്തിൽ ബൂസ്യനായ ബറഖേലിന്റെ മകൻ. ഇയ്യോബുമായി സംവാദത്തിൽ ഏർപ്പെട്ടവരിൽ ഏറ്റവും പ്രായം കുറഞ്ഞവനായിരുന്നു എലീഹൂ. ഇയ്യോബിന്റെ പുസ്തകം 32-37 അദ്ധ്യായങ്ങളിൽ ഇയ്യോബിനോടുള്ള എലീഹൂവിന്റെ സംവാദം കാണാം. ഇയ്യോബിനെ കാണാൻ വന്ന മൂന്നു സാനേഹിതന്മാരുടെ പേരുകളോടൊപ്പം എലീഹൂവിന്റെ പേരില്ല: (ഇയ്യോ, 2:11).

എലീസാഫാൻ (Elizaphan)

പേരിനർത്ഥം – ദൈവം സംരക്ഷിച്ചു

പുറപ്പാടിലും ലേവ്യപുസ്തകത്തിലും എത്സാഫാൻ എന്ന സംക്ഷിപ്തരൂപമാണ് കാണുന്നത്: (പുറ, 6:22; ലേവ്യ, 10:4). ഉസ്സീയേലിന്റെ മകനാണ് എലീസാഫാൻ. ലേവ്യഗോത്രത്തിൽ കെഹാത്യ കുടുംബങ്ങളുടെ പ്രഭു. നിയമപെട്ടകം, മേശ, നിലവിളക്ക്, പീഠങ്ങൾ, ഉപകരണങ്ങൾ, തിരശ്ശീല എന്നിവയും അവയുമായി ബന്ധപ്പെട്ട വേലയും നോക്കേണ്ടത് എലീസാഫാന്റെയും കുടുംബത്തിന്റെയും കർത്തവ്യമായിരുന്നു: (സംഖ്യാ, 3:30,31). യഹോവയുടെ സന്നിധിയിൽ അന്യാഗ്നി കത്തിക്കുകമൂലം മരിച്ച നാദാബ്, അബീഹു എന്നിവരുടെ ശരീരം വിശുദ്ധമന്ദിരത്തിന്റെ മുമ്പിൽനിന്ന് പാളയത്തിനു പുറത്തു കൊണ്ടുപോയത് എത്സാഫാനും ജ്യേഷ്ഠനായ മീശായേലും കൂടിയായിരുന്നു: (ലേവ്യ, 10:4). ദാവീദിന്റെ കാലത്ത് ദൈവത്തിന്റെ പെട്ടകം യെരുശലേമിലേക്കു കൊണ്ടുവന്നപ്പോൾ അതുമായി ബന്ധപ്പെട്ട ശുശ്രൂഷകളിൽ എലീസാഫാന്യരും പങ്കെടുത്തു: (1ദിന, 15:8). ഹിസ്കീയാ രാജാവിന്റെ കീഴിൽ നടന്ന നവീകരണത്തിലും അവർക്കു പങ്കുണ്ടായിരുന്നു: (2ദിന, 29:13).

എലീയാസർ (Eleazar)

പേരിനർത്ഥം – ദൈവം സഹായിച്ചു

യേശുവിൻ്റെ വംശാവലിയിൽ ബാബേൽ പ്രവാസാനന്തരം പത്താം തലമുറയിലെ വ്യക്തി. അതിനുശേഷം മൂന്നാം തലമുറക്കാരനായിരുന്നു മറിയയുടെ ഭർത്താവായ യോസേഫ്. (മത്താ, 1:15).