സസ്യജാലം

സസ്യജാലം (flora)

പലസ്തീനും സിറിയയും സസ്യസമ്പന്നമാണ്. ബൈബിളിലെ സസ്യങ്ങളെക്കുറിച്ചു സൂക്ഷ്മമായ വിവരണം നല്കുക അല്പം വിഷമമാണ്. രണ്ടു അനുമാനങ്ങളെ മുന്നിൽ കണ്ടുകൊണ്ടു മാത്രമേ ഒരു വിവരണത്തിന്നൊരുമ്പെടാൻ ആകുകയുള്ളൂ. ഒന്ന്; ബൈബിളിലെ സസ്യവർഗ്ഗം ലോകത്തിന്റെ വിവിധഭാഗങ്ങളിൽ ഇന്നറിയപ്പെടുന്ന അതേപേരുകളിൽ വിളിക്കപ്പെടുന്നവ തന്നെയാണ്. രണ്ട്; പലസ്തീനിൽ ഇന്നുകാണുന്ന സസ്യങ്ങൾ തന്നെയാണ് വേദകാലത്ത് ഉണ്ടായിരുന്നവ. ഈ രണ്ടനുമാനങ്ങൾ സ്വീകരിച്ചാൽ തന്നെയും നമ്മെ അലട്ടുന്ന ചില വൈഷമ്യങ്ങളുണ്ട്. ബൈബിളിന്റെ വിവിധപരിഭാഷകൾ സസ്യങ്ങളുടെ പേരുകളെ വ്യത്യസ്തമായിട്ടാണ് വിവർത്തനം ചെയ്തിട്ടുള്ളത്. തന്മൂലം ആധുനിക സസ്യശാസ്ത്ര വർഗ്ഗീകരണവുമായി അവ ഇടയുന്നു. ബൈബിൾ എഴുതിയ കാലത്ത് ആധുനിക സസ്യവർഗ്ഗ വിഭജനവും അതുപോലുള്ള കാര്യങ്ങളും പ്രശ്നമായിരുന്നില്ല. അന്നത്തെ ജനതയ്ക്ക് ഇതേ പേരുകളിൽ നിർദ്ദിഷ്ട സസ്യങ്ങൾ പരിചിതമായിരുന്നു. പല ബൈബിൾ വിവർത്തനങ്ങളും നടന്നത് പലസ്തീനിലെ സസ്യചരിത്രത്തെ കുറിച്ചു വളരെ കുറച്ചുമാത്രം അറിയപ്പെട്ടിരുന്ന കാലത്താണ്. ഈ കാരണങ്ങളാൽ പല സസ്യങ്ങളും ഏവയാണെന്നതിനെ കുറിച്ചു ഇന്നും അഭിപ്രായവ്യത്യാസം നിലവിലുണ്ട്. താഴ്ന്നപ്രദേശങ്ങളിൽ വളരുന്നവയും മലമ്പദേശങ്ങളിൽ വളരുന്നവയായും 124 ഗോത്രങ്ങളിലും 850 ഗണങ്ങളിലുമായി ഏകദേശം 3500 ജാതി സസ്യങ്ങൾ പലസ്തീനിലുണ്ട്. ഇവയിൽ വെറും നൂറു പേരാണ് ബൈബിളിൽ കൊടുത്തിട്ടുള്ളത്. അവയിൽ പ്രധാനപ്പെട്ടവ:

1. അകിൽ (സദൃ . 7:17)